裝修佬話你知:地氈清潔方法
2016年12月23日
4
373873
地氈唔單止係一件家居用品，仲可以係一件裝飾品，地氈顏色豐富、款色多樣，令腳感舒適，美化家居環境，為單調嘅屋企增添色彩。但就算平時再愛護，都難免會沾上各種污漬，清洗起身的確麻煩，令人頭痛。唔使怕，裝修佬教大家地氈嘅清潔方法，一齊去文！
最好每個禮拜吸一次塵，目前，市面上嘅吸塵機有抽吸式、拍打式同鬃刷旋轉式三種，均適用於絨頭緊密嘅地氈，而長毛地氈，只可以用有抽吸功能嘅吸塵機。
用吸塵機時應順著絨頭方向進行，要留意，清理時千祈唔好用齒狀或邊緣粗糙嘅工具，咁樣會損壞地氈面層纖維。
如地氈出現毛球，可用乾淨毛巾浸濕熱水抹，再用梳梳直，用熨斗墊濕布順毛熨，便可恢復原狀。
醋唔單止可以防止地氈變色或褪色，同時仲可以消除寵物異味，4升暖水加4杯醋，用毛巾浸濕擰乾後抹，梳打粉水亦具有除臭效果，抹完後，再擺係通風地方風乾即可。
先撒D鹽，鹽具有抑制灰塵飛揚效果，因為鹽可以吸附灰塵，即使再細嘅塵屑，亦可以清理得乾乾淨淨，同時，仲可以令地氈更耐用，令顏色更持久。
如果唔小心將咖啡倒係地氈時，可先用乾布或紙巾吸走水分，再混合少許白酒同酒精灑係污漬上，用乾布抹乾淨。如果無白酒時，用醋亦有同樣效果。除咗咖啡之外，包括紅茶等有顏色嘅污漬，亦可用相同方法去除。
傢俱接觸地氈，應放置腳墊或經常移動傢俱，對磨損嚴重嘅部位，除採取用覆蓋物加以保護外，仲可調換位置使用。由於地氈面層纖維，易積聚灰塵，高檔地氈保養嘅最好方法就係經常用吸塵機沿著順毛方向吸，就可以保持地氈清潔。
將一定比例嘅麵粉、鹽同石膏粉，比例為6:1:1，用水攪糊狀加溫，等冷卻成為塊狀後壓成細塊，撒係地氈污糟位，再用硬刷刷，直至滾成粉狀，然後用吸塵機吸淨即可。
如果唔小心將香口膠黐係地氈度，可以先用膠袋裝冰塊壓係香口膠上面，等凝固後用手按壓，等香口膠完全變硬時，再用牙刷將之拔除便可。
(以上圖片均來自網路，如有任何版權問題，請與本站聯絡)
