低咀高咀自由咀有咩好？ 座廁馬桶種類選擇 高咀、低咀、自由咀 究竟有咩分別?地去水又是什麼？
2018年04月25日
111
80407
自由咀有咩好？自由咀座廁、高咀座廁、低咀座廁究竟有咩分別? 地去水又是什麼？
第一次裝修嘅朋友, 有無試過去買坐廁嘅時候, 一入到去個店員問你要高咀低咀自由咀?
跟住自己完全無知佢講乜企咗係度? 又或者跟住俾人問要買普通定加長? 再傾下先知道原來個世界唔係只得一種沖水模式，如果你有咁嘅經驗，呢篇文就啱你睇啦!
買電視你都會關心用咩插頭咩線接駁其他AV產品，買左駁唔到又點用得到呢? 呢D所謂嘅咀係指座廁去水位，其實就係指坐廁出水喉與大廈去水喉嘅高度 ，購買安裝馬桶嘅時候要按照廁所去水位高度購買合適嘅坐廁。咁呢3款有咩分別呢？裝修佬話你知。
高咀座廁
所謂高咀，係指座廁嘅去水位的中位，離地１８０ｍｍ（即６吋）左右，現時市面上絕大多數嘅樓宇設計都係高咀，由於現時接駁座廁嘅出水位係可以用一種名為〔風琴喉〕嘅物料，所以就算原有大廈屎渠去水位係低位，都係可以用高咀座廁。
低咀座廁
所謂低咀，係指座廁嘅去水位的中位，離地１００ｍｍ（即４吋）左右，沖水，通常比較舊式，大約樓齡已有３０年嘅樓宇，大喉（屎渠）去水位比較多為低咀式設計．現時市面上低咀座廁嘅款式為數不多了。如果買咗低咀座廁而去裝一個高去水嘅去水喉，日後會影響排水，所以唔好買低咀座廁去裝高去水位嘅大喉！
地去水座廁
所謂地去水，係指大廈嘅大喉位置唔係牆身，而係地下， 地去水又分兩大類，分別係大廈大喉位嘅入口位置，離牆９吋，抑或１１吋。
自由咀座廁
所謂自由咀，係座廁出水位向內縮入咗，因此有足夠空間俾師傅駁長去水喉來接駁大廈嘅大喉位，所以高論是高去水，低去水，甚至是地去水，自由咀都可以應用到。
座廁馬桶簡直係世紀偉大發明，屋企無左佢都咪話唔大件事，既然一個座廁安裝到之後，當然佢就要執行佢最重要既任務 – 沖廁! 依家裝修佬問大家一個問題，唔知你有無留意到馬桶係使用完沖水時的水流模式？係旋轉、有水直沖、定吸走？咁究竟仲有咩學問？點解先可以揀到一個好沖既廁所，想知嘅朋友記得留意裝修佬啦！
其他常見問題
問: 廁板油壓爆咗，有冇得換呢？成塊換好浪費
答: 有得換，自己換好簡單, Make sure 兩粒螺絲中間嗰隔距啱就可以了
問:沖完水，再流出黎浸住馬桶的水有多深
答: 座廁唔同設計唔同形狀都好影響個深度，以香港常見既型號好多時都會有80mm深，哩啲水就係用黎阻隔大渠內既氣味傳番入屋
問: 馬桶水箱要幾大至夠力沖，舊屋果個沖晒成水箱水都沖唔乾淨
答: 除咗水箱大小, 仲有好多原因會影響沖水是否乾淨…例如，上文提到的沖水模式，同坐廁本身表面材料等，詳細既我地下期再講 ！
想留意更多座廁知識，請留意裝修佬專欄另外一篇文章：浴室裝修小知識(二) 座廁邊隻沖水夠力D? (直沖式、虹吸式、雙旋渦式)
如果大家仲有其他問題想知，歡迎留言提問!
