浴室裝修小知識(五) : 智能廁板有咩好?
2018年07月13日
121
80063
智能廁板或智能座廁相信大家無用過都聽過，佢常見於日本大型商場、五星級酒店。冬天半夜用時真係好享受，暖Lup Lup坐得舒服。夏天又可以直接用水洗重要部位，唔再醃住同痕癢。如果想係屋企都享受到，不妨考慮智能廁板。
安裝智能廁板有咩好？集恆溫、清洗、吹乾等功能於一身嘅智能廁板，全屋裝修或者直接加安裝都可以，唔受排污喉管限制，係入門嘅升級選擇 。而且使用簡單，特別適合屋企有孕婦，老人家或有行動不便既人士。香港夏天又熱又焗，洗得乾淨可以減少皮膚敏感發炎嘅機會。
現時市面上智能廁板牌子種類多，佢地無論係款式或者功能上都大同小異，係選擇購買上多少會有困難，到底有D咩功能需要留意呢？相信大家都有好多疑問，裝修佬話你知。
1) 選擇獨立噴嘴
現時市面上智能廁板都會具有一條移動式噴嘴噴暖水清洗下身，但人體結構上男女有別，使用上多少會有差別。最好選擇有獨立分開兩條噴嘴設計，除咗基本臀部清洗之外，加有特別針對女性清洗噴嘴，避免交叉感染。
*參考圖片American Standard Pristine智能廁板
擔心會有衛生問題？放心，噴嘴係每次使用前都會先自行清潔。加埋防護檔板避免尿漬、污漬彈入，沖得乾淨之餘更保障衛生。
2) 抗菌暖板
智能廁板除咗清洗功能之外，最吸引人嘅莫過於係暖板功能~ 冬天使用真係勁窩心。智能廁板會配合人體溫度令廁板保持於27°~36°之間，但潮濕溫暖嘅廁所環境容易滋生唔同嘅細菌及大腸桿菌，有見及此，坊間已經研發到將抗菌技術融入到廁板當中。可以留意廁板上有無抗菌製品技術協會SIAA嘅抗菌驗證。
*參考圖片INAX 日本製智能廁板（CW-RS3-W/BW1）
智能廁板應該點揀？
留意返每個座廁嘅長短尺寸不同，揀選前可以自己度下座廁3個距離，如果符合到智能廁板規格要求，咁基本上有8成配合到 。
睇到呢度相信大家已經對智能廁板已經有一定嘅了解，咁日後揀選嘅時候就容易得多啦~
溫馨提示：留意係香港買行貨智能廁板時候可以問店員有無安裝師傅可以轉介。水電等問題雖然安裝師傅會處理，下一篇亦會講下相關既基本知及同大家探討智能座廁，敬請留意~
其他常見問題：
問 : 為何智能廁板的坐圈size，通常是很細？
答: 因為智能廁板要預留空間收藏發熱線，令大家冬天時坐得舒適。
問 : 用咗智能座廁/廁板仲需要使用廁紙嗎？
答:唔需要。多個硏究報告中，廁紙係生產過程中可能已經受到汚染，係潮濕嘅廁所環境中容易滋生細菌，如果品質較差嘅廁紙可能情況更惡劣。所以做用智能座廁/廁板，水洗完直接吹乾，係衛生上比廁紙更佳，對老人家，孕婦或行動不便人士亦更方便。
問 : 一家多人使用會否變得唔衛生?
答: 大多數智能座廁/廁板會係每一次使用前後都會先自行清洗噴咀，選購時可以留意是否用抗菌物料製造，有沒有獨立噴咀及擋板。
