不同版本之玻璃膠的分別與好處
2018年09月27日
2
395994
上圖展示嘅三樣產品都係犀利牌推出嘅防霉中性玻璃膠，都係要嚟用喺潮濕地方，例如係廚房、浴室嘅水龍頭、鋅盤等等配件周圍密封而設計。防霉中性玻璃膠嘅好處多不勝數，除咗黏性強、持久密封、乾後不收縮之外，仲具有防霉、防油、防蒸氣等等優點。咁既然三樣產品一模一樣，咁點解會有唔同包裝呢 ? 一齊去文睇吓啦 !
膠槍版
市面上最容易搵到嘅版本一定非膠槍版莫屬，呢種玻璃膠需要配合膠槍先可以使用，使用彈性唔高，但係因為膠槍嘅協助下，就能夠輕鬆地打出一條又直、又平均嘅玻璃膠喇 ! 而且佢300克容量，足以應付一個浴缸封邊工序，因此膠槍版玻璃膠最深得裝修師傅歡迎喇 !
手動版
呢款手動版玻璃膠係一種比較新型嘅玻璃膠，佢容量比膠槍版少，同時體積亦都較細，容易收藏，最適合就係家居用戶作小範圍維修之用喇 ! 不過使用時需要留意番，使用手動版玻璃膠時，最好就係配合除包裝附送嘅「T」字棒一齊使用，咁就能夠控制到出膠份量喇 ~
氣動版
氣動版玻璃膠，顧名思義，就係以壓縮氣體推出玻璃膠，使用過程中係無需要用到膠槍或者「T」字棒幫手，只要調較上方扭環就能夠精準地控制出膠份量，絕對適合DIY初學者使用o架 ! 不過佢唯一不足就係香港冇得賣…而且價錢都唔平呢 !
裝修佬總結
唔同版本嘅玻璃膠無論喺用途上、功能上都係一樣，佢哋嘅最大分別就係使用上嘅差異喇，所以當大家有需要用到玻璃膠又唔知揀邊個版本嘅時候，就要記得以上嘅要點喇 !
