裝修佬話你知 : 唔需要鑽牆嘅掛鈎
2018年10月14日
1
398805
牆身安裝掛鈎可以將衣物、毛巾通通掛起，令屋企更加整齊 ! 以往要安裝一個承重力高嘅掛鈎，一般都要用到電鑽幫手，鑽個窿再以螺絲扭緊掛鈎；假如大家唔識得操作電鑽鑽鑿牆身嘅話可以點算好呢 ? 一齊去文啦 !
就以浴室掛毛巾為例，其實喺好耐以前已經有唔同款式嘅吸盤式掛鈎將毛巾掛起。呢類吸盤掛鈎無需鑽窿，就能夠吸附喺牆身，使用上係極之方便；不過佢嘅缺點就係只能夠吸附光滑表面，例如係瓷磚表面，加上吸附能力未算太好，容易鬆脫，為用家帶嚟不便。
另一種就係靠強力膠貼，黏附牆身嘅掛鈎喇 ! 唔好睇佢「鈎仔細細」，其實佢承重能力都唔錯，視乎掛鈎大小，由3磅至7磅嘅物件都掛得起呢；加上適用喺多種牆身表面，唔局限於瓷磚、玻璃等表面，而且撕走膠貼亦唔會留有膠漬喺牆身，認真非常實用呢 !
