轉季執衫我有計

2018年11月22日

382145

話咁快冬天又過去喇 ! 又係時候執拾衣櫃，將冬天衣物從各個收納位置拎番出嚟喇 ~ 每到呢個時候，又係大家頭痕嘅時候… 究竟有咩辦法可以令執拾衣櫃變得更輕鬆簡單呢 ? 不如睇睇裝修佬有咩建議吖 !

首先要善用衣櫃空間，放更多衣物嘅話，淨係將衣物摺得靚靚係唔夠o架 ! 喺執拾細小衣物，例如係襪、內衣褲嘅時候，可以考慮用有分隔功能嘅貯物袋、貯物盒收納好，整齊得嚟又容易搵到想要的衣物呢 ~

另外一個做法係善用真空收納袋，只要未有需要穿著嘅衣服按類別摺疊好放入真空袋，再用吸塵機將真空袋裡面嘅空氣抽走 ! 有效縮減原有體積高達4成，可以騰出更多衣櫃空間，擺放到更多衣物o架 ~

假如你有拎衣物去洗衣店清新嘅習慣嘅話，都唔難發現衣物清新過後，店員都會將衣物摺得整齊，仲會入埋個大膠袋o添 ! 其實只要將清潔後嘅轉季衣物連埋個膠袋，整整齊齊咁放入衣櫃，就可以慳番唔少功夫同埋時間喇 !

最後想講講，其實坊間仲有執拾衣櫃方式o架，以上內容只係冰山一角咋 ! 假如大家有更有效嘅執拾衣櫃技巧，不妨話俾裝修佬知吖 !

本文章內容及圖片均由本專欄作者提供及上載，並不代表本公司立場，如有任何版權問題，請與本公司聯絡。

關键字：裝修佬; 裝修; 衣物; 衣櫃; 轉季;