裝修名人堂 Ivan: 設計二十載 與香港共同成長
2020年01月15日
0
28387
受訪的那日，Ivan帶上了口罩，感染風寒的他雖然臉上掛上了倦容，但言談之間仍感受到如少年般的活力。早已渡過不惑之年的Ivan在二十年的設計生涯中經歷了不少變遷，卻坦言心中的那一團火從沒有熄滅過。
「我二十幾歲入行，初初出黎做野既時候覺得做室內設計幾好玩，最緊要係唔悶，可以接觸到好多不同既事物，無論係商業又好住宅又好，永遠都有學唔完既知識。就算而家做咗二十年都好似仲有好多嘢學咁。」
起初Ivan是一名工程經理，負責監督工程進度以及與客人溝通。後來為了讓自己的事業有新的突破，才開始投入室內設計。Ivan認為，客人透過不同渠道找到室內設計公司，設計師自然有責任為客人造出滿意的產品。幸好他十分享受每一次設計的過程，多年來都沒有對自己的工作出現厭倦，反而視之為一次又一次的挑戰。
「其實呢行都真係唔易做，雖然工作比較自由，但基本上休息既時間好少。就算你放咗工都好，有時都係要繼續覆個客解決佢既疑問。日頭又要去地盤監工，基本上可以靜靜地畫圖既時間得番臨訓前幾個鐘。而且設計工程呢行既野每年都轉緊，要跟上成個行業既潮流先係最難既野。」
「我由以前係報紙雜誌上面落廣告就已經可以吸引到一堆客，做到而家要係網上平台到賣廣告，其實成個行業都已經變化咗好多。我地做室內設計師既如果做唔到與時並進好快就會比人淘汰。就以材料為例，近十年以來大家都開始用多好多大陸材料，因為佢地平得理手工亦做得唔錯，我地以前做嗰陣邊有咁多。最近又開始流行智能家居，我地又要開始研究點樣融入呢啲元素入去。雖然我已經做咗二十年，但只要你唔努力咁增值自己，好快就會比人淘汰。做設計最緊要係比人感受到你啲設計有活力，生意先做得長。」
Ivan更表示，雖然現在有了家庭的負擔，需要對自己的家人負責任，不能不斷轉換公司以學習新的知識。但在閒餘時間亦會到街上看看有什麼新的產品，又或是留意最新的行業消息，充實自己。從初初入行的黃毛小子，變成了如今老成練達的中年，即使面對過多少變遷，Ivan對設計的熱誠並沒有減少過。作為一名稱職的設計師，貼近時代的腳步，才能找到自己生存的價值。
想了解更多裝修行業資訊，請留意裝修佬專欄。
