裝修名人堂 周先生 凡事以客為本 每次相遇是緣份

2020年05月13日
3
24587
裝修名人堂 周先生 凡事以客為本 每次相遇是緣份

「一間裝修公司開咗五六年,起初係比較艱難,係一個過程,風浪過去就可以慢慢上正軌,最緊要對自己有信心,要勤力。」周生先用厚實的聲線道出了許多裝修故事,盡是克儉克勤的傲人事蹟。

周先生從十幾歲就開始學做泥水工程,之後斷斷續續地做裝修工程。直到五年前開始與做咗三十幾年嘅師傅一齊組建公司,經過努力現已有一支手工精湛,經驗豐富及非常合拍嘅師傅團隊。

以客為本是裝修之道

多年判頭經驗令他得出很多道理,最重要的是從「客人角度去諗」。「裝修係人生咁大件嘅事,唔可以俾客擔心。如果客人急,就要以客人所急嚟幫佢,咁就啱啦。」

「第二同第三就係細心同責任心。呢兩樣都好緊要。」

周先生的勤勞深深讓人佩服,每天察視地盤是他多年的守則,從不缺席。每早八點幾已經現身地盤,做好安排才去下一地盤。儘管師傅完工會拍照給周先生,但他認為只有親身細睇才能知道有沒有錯,錯了可以馬上改,免得拖延進度及客人擔心。

「我哋做到邊一part,都會錄影俾個客。個客要返工未必每日都落去個地盤睇,咁你要令到佢安心,俾佢知道就算佢係邊度做嘢,都知道工程都進展緊。人哋拎錢出嚟,信任你,就要令客人放心。」

「從清拆開始,一路做落去嘅工程,如果唔成日落去睇落去跟,你就根本唔知個進度,個客問你做到邊度,你就根本唔會知,下下都要問師傅,就唔好啦。而家就係做到唔需要佢問,你主動報告,咁客就可以安心啦!」

「所以每日每個地盤都要去,有師傅開工嘅地盤都一定要去。」周先生堅定的語氣道。

裝修相遇是緣份 定竭力完成

曾有一位客人找了八個判頭度尺,周先生是最後一位。他細心的講解了每一part要如何做,說出了九成該客人的要求。裝修報價後,當天客人就直說:「得㗎啦,就係你!」。

周先生鐵漢的性格下,意外有一份柔情浪漫。他回想那次經歷說:「全港好多萬間裝修公司,都有百幾萬嘅業主。你買樓裝修竟然可以搵到我,我可以遇到你,呢啲係緣份。既然有呢個緣份,你就一定要同人做好佢,咁個客先可以覺得『我揀你呢個師傅冇揀錯』。」

小事不計較利發展 大事清晰指引利客人

「凡事諗下個客,唔好諗自己太多。當然,一間公司要賺錢係好緊要,因公司要費用要周轉,但一定要賺『良心錢』,下下賺到盡係唔得㗎!」

周先生從來沒與客人發生爭執,因為在營運上他也有自己堅持的原則。「我同個客每一part講解點做,嗰啲細工程唔可以收佢錢,可以做得到咪同人做咗佢,下下同人計錢就唔係幾好。」

小事不計較,大事則要清晰列明。「而家我面對呢啲情況,如果小嘅一定會講『呢個我唔收錢做埋』,如果工程比較大就要講『我要報個價錢俾你先,同意咗先做好唔好啊?』。明碼實價,黑字白字。我每一部份都係咁,仲要有記錄,如果唔咁做,就一定會有意見,會產生誤會。」

「有時有啲後生仔買咗樓冇咩錢做裝修,佢哋每一部份都好緊張。一路裝落去一路有啲新工程出現,你後加工程報個價佢都好緊張,但我哋係用真心去報價。同客人有商有量,只會報成本價錢,而且每次報價客同意左先做。」

為年輕客細心打算 提早溝通免爭執

說到年輕業主,周先生同時非常關懷客人。「香港年輕人做嘢好勤力,年紀輕輕就買樓置業,值得敬佩。」佢明白有些後生一輩買咗樓之後,未有寬餘能力裝修,他會處處為他們著想,盡量就客人嘅預算做好佢。

帶十客睇盤九簽約 勤勉不懈結良緣

裝修是難得的緣份,周先生珍重每次的相遇,凡事以客為本,以勤勞的個性得到無數的讚賞。談及最開心的事,他說「試過兩個月帶過十個客去睇我客人嘅盤,有九個客同我簽約,係最開心最深刻的事!個業主好好人,入住咗都俾我帶客上去睇,我要好好感謝佢。」凡事不忘積善,才能有好相遇,有好緣份。

裝修名人堂 周先生 凡事以客為本 每次相遇是緣份
裝修名人堂
151篇