裝修名人堂 Hevin 優秀溝通與行動力引領客人見證出眾工藝

2020年08月05日

35392

裝修是一門大學問，而當中最重要的必然是工藝與溝通。Hevin從初入行裝修配對平台即明白這道理，到現在有自己的裝修工程公司也把這份理念靈活運用。

他與陳師傅合力創辦裝修公司，兩人一文一武。「陳師傅管工地，技術上嘅，我就喺前門招呼客人，負責同客人溝通。」

溝通需有充分準備眼明手快

溝通是Hevin的強項，源於他多年的sales經驗。他明白要取得客人的信任，需做充分的準備。「上門之前我哋已經同客人通咗電話先，我哋知道佢要咩style，搵定晒相，到時可以傾得smooth啲。」

Hevin亦希望讓拍檔更專注於他所長，自己則要成為眼明手快的角色。「例如你出咗份報價，通常客人會whatsapp覆一份好長嘅疑問同調整list，一般師傅未必能夠回覆得好全面，只係得一段錄音答，但我哋就可以即時跟進返，喺客未有進一步行動，我哋已經改埋報價單俾佢。」

「大部份判頭唔興即時打報價，上完門都唔即時出，隔幾日先做。我係一個sales，對呢方面我係幾敏感，好多時我即晚就俾客，如果有更新，七點傾完我九點就做好份報價俾佢。啲嘢做得快啲，個客都可以決定得快啲，其實係促進件事成功嘅重要一步。」

另一方面作為師傅與客人的橋樑，對裝修的認知也不能只略懂皮毛。「基本裝修流程知識一定要有。報價個時個客會問你嘅問題你識唔識呢？媒氣定石油氣都搞清楚未、屎渠改唔改得等等，呢啲好多時都真係要落現場睇得多先識。」

先有知識才能有更好的交流，方取得信任，才能「度得一手準尺」。「姐係例如個客想用電熱水爐，其實單相電箱唔夠力，但你連單相三相都未識分，呢啲技術層面嘅嘢要熟知。雖然我係sale，但做平台時我跟得師傅多，呢方面既經驗有唔少。我認為咁先能夠度到一手準嘅尺，同埋個報價先精準，就唔會報錯價同有咁多後加後減。」

整個裝修工程的完善配套亦是建立與客人良好關係的好辦法，為此Hevin設立了一個小課程給予客人。「我哋會帶個客出去，有一個兩小時嘅「揀料教學」。基本上份合約唔包嘅，要自行去買嘅建材，我哋都會帶佢落去旺角建材舖頭度行一趟教佢。」

「咁當然揀貴定平我哋會交俾個客決定，但邊度能夠買到大陸磚、馬來西亞磚、靚嘅歐洲意大利磚，坐廁點分高咀低咀自由咀，或者鋅盤有分檯底檯面，客人唔識嘅，我哋都會透過呢兩個鐘trip，教晒份合約未包嘅嘢點買，上堂咁。」

「等佢預埋呢啲料要幾多錢，條數好計啲。平時好忙嘅師傅一定唔會去多做呢啲，但為咗令客人學到更多，更容易達到佢地心目中嘅家，呢啲就交俾我去諗去做。」

除了溝通之外，師傅手工可說是裝修的根基，帶客人到工地睇師傅手工已是Hevin的習慣。「幾份工程報價單，價錢分別三十、三十五、四十萬，其實show唔到個價值喺邊。四十萬嗰間手工唔一定係最好，三十萬嗰間都未必係最差。」

「我同啲客人會真實講嘅說話：你拎住份報價一定要嚟埋工地睇我哋手工，你先知呢個價錢係買緊乜野質素，否則你揀最平嗰份係最好，定中間果份係最好，其實都係冇定案。」

參觀工地的過程，讓不少客人見識到Hevin拍檔優秀的手工。「我好欣賞拍檔嘅手工，係我哋公司嘅大優勢。我接觸過咁多唔同嘅師傅入面我哋師傅唔算平嘅，中上價位，但性價比絕對高，油漆嘅順滑度，啲角真係90度等等，各式各樣。」

「大部份客人嚟我哋單位睇，客人都會覺得超出佢哋嘅期望，好滿意，會明白點解我哋點解唔係街邊水電檔嘅收費。」

「其實裝修案例相一定係執過，而且揀最靚嘅俾你睇，唔能夠反映到細節，所以我覺得呢啲呈現最真實嘅一面好值得做。真係同個客講十次電話都不如帶佢上嚟睇一次咁緊要。」

一次工地的觀察勝過千言萬語，Hevin以優秀的溝通力引領客人了解優質手工，成就最完善的家居。

想裝修屋企/維修家居？登記「裝修佬」免費裝修報價，24小時內專人回覆，為你推介最適合你的裝修公司。

本文章內容及圖片均由本專欄作者提供及上載，並不代表本公司立場，如有任何版權問題，請與本公司聯絡。

關键字：裝修佬; 裝修; 故事;