裝修名人堂偉仔體貼客人需求為家裝做最完善的守尾門工作

2020年09月09日

35388

二十六歲說不上年幼也不是老練，偉仔如常每天忙碌地管理自己的裝修公司，他在裝修界中打滾已是十年。或許他不善辭令，但為人厚實，專心認真對待每單工程。

偉仔喜愛的裝修範疇是泥水，「做瓦仔」（鋪磁磚）更是他得心意手的一門技藝，他興奮的訴說著。「我鍾意做牆身磚，牆身磚觀感好過地磚好多，地磚驚跣要啞面，光打落去冇咁靚。燈光打落牆身嘅光面磚，閃令令。」

而他最欣賞的裝修範疇是油漆，他現在有自己公司，他見識過不少油漆師傅的手藝。「油漆靚真係行近都冇掃痕，啲師傅好勁，我會用欣賞藝術品嘅心態去睇佢哋嘅作品。師傅話將油掃拖長啲，中間唔好斷，一斷就會有掃痕，其實要好集中好有定力，我而家都仲學緊。」

守尾門是裝修公司老闆必備能力

身為老闆的偉仔在百忙中仍會落手，因為裝修公司中老闆就是守尾門的一個人。「做得裝修公司老細，要識執手尾，因為任何一單野點都有啲嘢要執手尾，請得幾多次師傅翻手做？細執嘅就自己做翻啦，所以話其實老闆反而要範範都識。」

「但而家做老細，唔能夠好似師傅咁㗎啦。」裝修師傅與裝修公司老闆許多人也無法仔細分辯，偉仔自己從師傅到老闆，仔細體會其變化與差別。

「以前打人哋工唔會諗咁多嘢，就踎喺度默默做，唔會理其他嘢，只會望住自己眼前嘅工地。做老細邊同，冇得日日匿埋做嘢，要見客，個腦要不停諗唔同嘅事，要諗點修口等等。咩都唔諗嘅話，係做唔到老細。」雖愛工藝，但偉仔脫離了專注工藝的心，成了管理層，為有才能的師傅們張羅一餐飯。

要為自己的伙伴們張羅一頓飯從不簡單，當中有無數的技巧去保持公司的穩定，而偉仔在逆市其間仍能穩定養活員工，靠他的努力。「其實而家還好，一般年頭難捱啲，以前有試過好難捱嘅時候，逐個客打電話去問需唔需要維修，幫補下，最後都係咁捱過，而家已經穩定返，雖然有疫情，但而家都ok，有單。」

努力認真的態度讓偉仔公司成為有口碑的裝修公司。談及公司的優勢時，偉仔思考了一會，笑言：「就得客囉。」「例如做到一個點，個客已經唔能夠加錢，我哋都會就我哋嘅標準做好佢，唔會因為差嗰幾千蚊做啲hea嘢俾人。」

除了體諒客人，讓自己從多間裝修公司中脫穎而出也靠對客人的誠心。「仲有，一開頭就要同佢講晒啲嘢俾佢聽，要俾佢睇到你好誠心，唔好呃佢，千祈唔好呃佢。要講人哋唔會同佢講嘅嘢。」例如？「教佢點再慳啲，令對方知你唔會呃佢錢。」

「若果一開始知道個客需要盡量慳錢，慳錢地方就係有部份錢自己唔賺。例如廚櫃，報$1000呎，我俾廠電話佢，叫佢自己訂，到時我幫你裝，就只係賺人工錢。」讓客人自己也能掌控裝修，從而增加對方的信任。

體貼客人同時保持作為裝修師傅的堅持，贏得的是口碑，是下一個客。「做老細要睇得長遠少少，做好個招牌，個客就會介紹下一單俾你。為少少錢同個客計較，只會輸咗下個客。」

偉仔隨家人的腳步走入裝修界，現在是已獨當一面，原來是他想在原本家人的路上走出自己的成就。「佢哋做開熟客冇諗住大搞，搵兩餐就算，但我後生唔可以咁，冇得咁就算，所以開咗公司，有時仲會請返屋企人嚟幫手。」青出於藍而勝於藍，偉仔的家人也非常高興他走出了自己的路。

不過，偉仔當然不會在此止步，想想僅有二十六的偉仔在裝修界絕對是年輕一輩，有毅力同時有更多的活力和可能性。「想等疫情過後，就要開間地舖，做裝修賣建材，門啊櫃啊浴衛設備嗰啲。一定唔會停喺度。」

本文章內容及圖片均由本專欄作者提供及上載，並不代表本公司立場，如有任何版權問題，請與本公司聯絡。

關键字：裝修佬; 裝修; 故事;