裝修名人堂 Tim 不斷革新完善裝修計劃 致力回饋裝修戶主
2020年09月30日
7
35416
Tim入行16年，從氣焰自滿的少年經歷了裝修界的洗練，現今他成了受員工敬重成熟的裝修設計公司老闆。
Tim自幼家境窮困，早早出來工作，憑著才智在電訊和網絡供應公司中創出一片天地。「賣得好好，電訊盈科就出咗信俾我哋做嗰間公司，加許連續九個月打贏佢哋個增長率。」隨著時間，Tim發現不久將來市場便會飽和，不安於現況的他又創立了新業務，但最終因經營不善而創業失敗。
他隨後加入了一間有名的室內設計公司，決定重頭做起。「當時嘅老細就係我師傅，帶我入行。佢話1日100個cold call，平均會有一個中，我照跟第一日就約到appointment 。」「最重要就係要企係客人角度，由頭到尾我都係咁覺得。我覺得冇咗單唔緊要，做到朋友嘅話冇咗單生意都冇所謂，最緊要係令客人覺得舒服，溝通順暢。」
優秀的業績讓年輕的Tim非常自滿，到後來自己重新創業開設自己的裝修設計公司，又再一次因為年少輕狂而再一次挫敗。「嗰時細個覺得自己好叻，成日都覺得客人周街都有，對待單唔認真，結果管理不善，地盤問題出晒嚟，差唔多要執笠。」
多次碰釘後，他終明白自己的氣焰自傲讓他無法細心照料業務和客人。「而家老咗咪知，以前自己監管不力，仲要自滿以為自己當年好成功。原來以前自己以為好係神嘅嘢其實只係運氣。」
「當時衰到個客安慰返我：『後生仔你經一事長一智，其實你嘅性格係會成功㗎。雖然而家間屋結果係咁，不過你唔洗介意而家咁樣嘅，改好咗第時冇人會理你以前發生過咩事。』」在如此令人迷失的情況下仍得到客人的鼓勵，證明客人能感受到Tim的本質不壞，仍有無限的機會在等著他奮鬥。
合作商的離去，客人流失，是裝修公司的大困境，Tim是如何重新振作？「我走得出，因為我夠正面。我相信自己會冇事，最多咪打返工。我覺得冇困難係解決唔到，然後就用免費設計去搞返掂，因為總有貴人會幫手，因為人夠正面啊嘛！之後就慢慢有返單，一切重新開始。」洗心革面，破斧尋舟。
開始踏實做裝修的Tim，再次重新以客人角度出發，配合自己對營商銷售的知識，開創了獨家的裝修免息分期計劃，幫助想裝修而「手緊」的大眾市民。
「做返大眾市民市場，所以我就諗到分期plan。呢個計劃唔洗經銀行同信用卡，唔洗審批時間，亦唔怕好似出面公司咁已經被銀行代付全款，而家個客係真正可以免息分12期找數俾我。咁做可以回饋返俾市民，我希望盡量令佢哋開心，我哋又可以出名，同埋呢啲作品，我又可以拎得出街。」
Tim對這計劃充滿信心，思前想後也考慮全面，反饋也非常好。「朋友同過我講我唔交俾銀行做會好蝕，我完全唔係咁睇。你幫咗客人，佢一定都會繼續找數，做到而家都冇客拖過數。」是考慮周全，也是信任和真誠。
「喺香港唔平靜嘅時期我哋推出分期plan，廣告一出街反應好好。好多客網上指名要搵我，佢哋唔知覆嗰個其實就係我，因為CS錢都慳返，就係我由朝做到晚係咁覆客。」商業和裝修從來不只有自己賺錢，唯有同時盡力考慮雙方才能持續良好發展。
Tim人生大起大落，銳氣仍鋒芒，同時更多了踏實與對裝修戶主的關懷。他總是不安於現況，不斷有創新Idea，現在已是一家有自己工廠，木工師傅多達50人的裝修設計公司的老闆。他仍笑言自己還是蚊型公司，但員工和客人們對他的信賴有增無減，本著站在對方的角度去看的心態做事，接下來他又會有甚麼優質的「新搞作」呢？
「唔好俾人哋覺得間公司只係想賺錢，最重要係好似我成日同客講：『我想你哋住得開心啲。』」
想裝修屋企/維修家居？登記「裝修佬」免費度尺報價服務，24小時內專人回覆，為你推介最適合你的裝修公司。
