設計名人堂 Eric 破舊立新為室內設計之道 精心研究優質精品與閣樓設計
2021年02月17日
5
36191
優質有品位的家居設計需經由設計師的歷練而成，而今次名人堂主角的Eric正是歷練三十年，國內外都經驗繁多的室內設計師。
化工根底 為客人度身訂造最合適建材
談吐溫文爾雅的Eric，原來最初是修讀化工。「我哋比較熟應用物料嘅成份、安全性同結構，所以挑選建材我哋會比較準確啲，同埋知道物料特性同會唔會對人體傷害，呢啲我哋會研究，會知道。」
這為他室內設計的生涯打了結實的根基，做出來的家居相較其他需經常維修的家居，他的設計可長達十多年後才需要開始維修。
了解每個客人家居獨特的環境細節，靈活把化工知道運用於工程之內，調節每個家居的物料使用是一個優秀的設計師會考慮的事。「好嘅物料其實就係愈少添加劑愈好，同食物一樣，愈多添加劑只係速成件事，唔等於個應用係好。例如將軍澳區經常潮濕，牆身出水，點可以令到間屋冇咁濕呢？其實只要多一個步驟，加啲石膏粉喺牆身，令到牆身多餘嘅水份比石膏吸收，就會減少出水嘅機會。」
室內設計調色與比例至關重要 精心研究閣樓設計
有結實的根基之外，設計師獨特的品位和眼光也非常重要，Eric尤其著重調色與比例，客人見到他的案例就會先被這兩樣點所吸引，這也是他培訓新進設計師的重點。「設計一間屋感覺到舒唔舒服，比例係第一，第二係調色。」
「調色要拼除自己喜好，作為一個設計師，應該冇任何偏好，視野盡量要宏觀一啲，發揮同應用嗰個層面就會變得愈大，如果只係識用黑白灰，案例永遠都係黑白灰，其實局限咗自己嘅發展，同埋限制思維上點應用啲物料。」不要被自己喜好所限，選擇合適客人的配色，全因設計師應由用家角度出發。
至於比例，Eric從十年前開始著眼於中小型單位的設計，他認為在狹窄的空間比例尤其重要，特別是現今香港納米樓盛行，閣樓設計紛紛出現。「要喺細空間入面做咁多嘢，如果你個比例一錯，你冇辦法做出生活嘅舒適感，呢個好緊要。」
「閣樓設計係為單位增加咗一層layer，望落去個視覺效果會覺得成間屋會豐富咗，但一定要合比例。例如早前有個客人想閣樓下面只做米九，要上層可以企到起身，實用性確實係做到，但美觀性舒適性就會差，因為破壞咗個平衡，住落就未必會舒服，我哋需要同佢解釋返。」
破舊立新為設計之道 眼光與實力深得客戶信任
Eric過往幫外國客戶設計裝修大屋、商舖，甚至重塑客人收藏品成實用家居飾品，各個層面都經驗豐富，最後他走到現在專注於研究細屋的可能性，研究出閣樓的完美比例，為的就是想進步，想幫到更多美好家居落成。
「設計師都有個mission，希望啲人用嘅嘢變更加好，更加舒適，呢個係設計行業嘅存在意義。以前跟嘅老闆會以佢間屋做實驗室，我幫佢喺間屋入面，設計同實現出佢想要嘅嘢，佢自己先試用過覺得舒適，就套落去佢嘅酒店設計。」
「做咗十幾年，佢唔想我走，但佢間屋已經整到好豐富，我繼續做都只係齋做維修保養，唔係設計師想停留嘅位置，我想要跳出去做好多好多設計，喺出面可以幫到其他人。」
「做設計要不斷創新不斷進步。我睇design兩個字，就咁睇以為係設計，其實唔係，『de』一個字，『sign』一個字，等於demolish the sign，中國人講緊嘅破舊立新。即係話用一啲舊嘅元素然後重新組合，就變成啲新嘅嘢，先至可以令到人嘅生活喺物質上更加向前行，如果你永遠都係重覆重覆咁做，呢個係生產，唔係設計。」
「做設計好玩之處就係你不斷去因應個現場環境，同埋自己能力知識將現存嘅嘢優化，令到件事更加靚。」
不斷跳出comfort zone的Eric，依靠過往每一個案例的經驗，再運用新事物放在現存的生活空間，去優化每一個新單位，相對市場裡其他同行他有信心自己的設計性價比走得更高。
「近期完成咗石排灣邨一個單位，兩姊妹戶主本身都好有自己嘅諗法，但完成間屋後佢哋感覺到好舒適，後來想再買再加嘅嘢完全唔敢去諗，直情同我講：『Eric幫我諗埋啦！』因為反而驚諗錯咗，會破壞成件事。」
出於對設計的熱誠、信念與眼光，Eric的客人總是接二連三的出現，亦非常信賴他，更會有新客戶因喜歡他的設計，知道他們的隊團認真對待每一個細節項目，而賣掉自己的房子買村屋讓他全盤負責，這無礙是對他的肯定。
承先啟後 與後輩合作誠心為客提供優質服務
Eric現在與後輩合作開設計工程公司達七年，並擔任項目總監，督導每個項目。後輩作為年輕一代，非常明白年輕人對家居設計有要求，卻因預算有限找裝修設計公司變得十分困難，因此想要服務這一班客人，為客人提供價錢相宜又精品優質的室內設計。
「基本上大家嘅理念方向好接近，大家都係想幫到多啲客戶。我哋公司宗旨係，同你傾好咗個合約價就係用嗰個價錢，從來唔加價，除非個客要後加嘢，先會加返工料錢。希望大家可以以一個合理且預算內嘅價錢做到一個好嘅精品家居設計，想接近民心多一啲。」
