【裝修名人堂】Hero 設計師應連結美感與生活 連結客人與師傅
2021年04月14日
0
36395
紅褲仔出身，現今已是三十年經驗的室內設計師Hero。Hero由做工程起步，最終走入到對美感與現實生活協調的室內設計行。
「我對美術嘅興趣由細到大都有，好鍾意啲嘢有美感。做裝修之後，跟師傅開始接觸到乜係室內設計，變咗對生活空間有要求，唔單止自己，可以就我嘅工程經驗，分享俾啲客，等客人都可以有舒適又有美感嘅生活空間。」
連結美感與生活 連結客人與師傅
設計師不能只著重美感，還要連結生活，連結客人與師傅。
「有工程經驗嘅設計師係一個橋樑，知道戶主喜好，先可以將設計概念同戶主嘅喜好融入到個生活空間，但我哋又要連結個師傅，因為我哋設計出嚟嘅嘢要師傅做得到，而顧客又要滿意嘅。」
「做中間橋樑做得好，咁就可以幫個戶主減少咗裝修流程要煩惱嘅事，因為所有裝修都係繁複嘅，俾咗我哋去協調到所有嘅嘢，而做咗出嚟嘅效果，得到滿意嘅效果就最好。」
客人與師傅之間會因施工方法出現不少問題，Hero認為此時設計師不能只單考慮表面的美感，也要考慮長遠的生活需要。
「例如好普遍會覺得個櫃會遮住牆身，所以櫃背後嘅牆身，油漆師傅唔需要明確地處理得好好。」
「但我哋就會同油漆師傅講，因為個客可能會諗而家有個櫃，但遲啲可能會唔要個櫃，咁牆身點算呢？解釋返俾個師傅聽，個師傅知道啦，就可以再做埋嗰部份，就解決咗個問題。所以重點係唔好只諗當下夠唔夠靚，要好切身喺個客度諗，係要未來都靚。」
專業施工團隊 優質室內設計師
經過多年的發展，Hero的工作模式與理念已徹底融入公司。「我哋啲師傅已經知道我哋對設計嘅要求，達到我哋標準，非常暢順。而家個客嚟到，我哋會帶佢去現場睇睇，從而感受到我哋嘅細心同師傅嘅做工。」
施工手藝有保障之餘，回歸設計與美感，Hero相信不同設計師有個人擅長的設計風格，要配合所有客人的期望，致力引進了不同優秀的設計師。
「同埋開始多咗唔同設計師幫手，因為好多時一個設計師會特別擅長一個風格，所以有見及此就會請多啲擅長唔同風格設計師，請佢哋繼續鑽研自己擅長嘅，為公司增加多啲有深度有實力嘅idea，各種風格都有。跟據客人想要邊種風格，再分流到唔同設計師俾佢。」
開心見誠 引導客人表達心中所想
Hero認為幫助客人完成美好家居，不只有工程施工和設計的水準，還有引導客人講出心中所想，而其成功來自經驗、親和力與溝通。
「客人會對工程好緊張，個人就會好繃緊。我覺得大家坐埋一齊其實係解決問題。我哋應該要接觸同和善溝通，努力表達我哋嘅認真同善意。建立到友誼關係，大家溝通得好，出嚟嘅效果一定會好啲。」
裝修公司和客人從來不是對立面，而是在我哋係同一條船，其實應該互相扶持。Hero多次提到要柔軟和善面對客人。「所以我哋係會輕鬆啲，同埋想大家開心見誠講出嚟。如果能夠咁樣做，好多時好多問題都能夠解決得到。」
會面時態度輕鬆，氛圍舒適，以良好輕鬆關係誘導客人了解自己需要。「氣氛良好，自然易溝通。我哋就可以更容易啟發到客人，佢之前可能唔覺架喎，但後來客人會發現：『原來我對家居有咁嘅需要！』。」
「了解客人平時生活同喜好，有時客憑空想象係未必諗到未來家居係點，佢冇框框，我俾case相，又會即場畫俾佢睇，有圖有相客人就理解到我哋講乜嘢，佢就會更清楚知道自己想要乜。」
「正因為我哋係裝修設計嘅專業，成日接觸唔同工程唔同客人，見到好多人對生活唔同嘅要求，我哋就可以引導到唔同嘅客人聯想得到自己未來生活。」
謹慎而行 先有能力再承擔
和善的Hero對待客人態度親和，卻對自己十分嚴謹，紅褲仔足足穿了十多年才決定自己開公司，一切也是責任心。
「其實都做咗十年，先有自己公司，因為我覺得自己出嚟做嘢，要交個貨俾個客人，咁我哋要有承擔，一定要確保質量好手工好。」
「我真係要自己做過，有個底先。做裝修唔係做貿易公司，我哋真係做一個手工貨俾人，所以我哋本身要有足夠嘅手工同知識，先可以出嚟行，工藝知識完全冇問題先可以承諾到個客我做啲嘢係冇問題，係好。」
「我哋唔會因為手工唔得都強行接啲工程，因為我哋係踏實去做裝修設計。」累積三十年經驗，了解自己的實力，Hero不卑不亢，從不誇大其詞，只做實事，為客人帶來美好的生活空間。
案例欣賞：
想裝修屋企/維修家居？登記「裝修佬」免費裝修報價，24小時內專人回覆，為你推介最適合你的裝修公司。
