【 裝修仝人誌.Anna篇 】機會眾多必須自學自理 勇於先行再反覆檢討

2021年08月15日
1
413
【 裝修仝人誌.Anna篇 】機會眾多必須自學自理 勇於先行再反覆檢討

常聽說於初創公司工作,一人身兼多職,學到的總比傳統大公司多,成長亦非常迅速。事實又是否如此?今次由於裝修佬任職兩年的Senior UX/UI Designer Anna分享走入初創公司的心路歷程。

擁有數年平面設計經驗的Anna,看準UX/UI的前境,決定轉換跑道,選擇以新人的身份轉職UX/UI Designer,希望自己平面設計的經驗令學習UX/UI時事半功倍,然而她遇到的第一個困難卻是來自設計師的尊嚴。員工嘔心瀝血的作品,總是期望能得到嘉許或是坦率的評價,但在步伐急促的初創公司內,Anna曾遇到讓她無所適從的情況。

放下身段工作為首 計劃自然走得更快

Anna初接觸UX/UI,嘗試提交一份界面草圖,結果成品面世卻是部門主管重新再畫的版本,Anna頓感挫敗,繼而與部門主管發生爭執。「部門主管可能覺得個草圖唔夠完善又唔夠時間,佢就自己再畫咗個新嘅交出去睇,我嗰刻感覺『咦?我原本個設計呢?』,嗰下覺得自己白做咗。」

「又有時我做嘅設計唔夠好,佢會提出好多意見要去改,最尾就將我原來版本改到完全唔係嗰回事。作為一個設計師,通常都唔想俾人改設計,俾人改到面目全非會覺得洩氣。」

「我覺得經驗比較豐富嘅主管,佢睇到個設計唔好,應該會同我反映返有咩問題先,但佢冇講到呢一部份,佢就直接出咗個新嘅,呢個可以話係導火線,我就抵唔住頸同佢嘈交,情況去到佢差啲想炒我。」

設計師有其尊嚴,加上年少氣盛,沒有適當處理有磨擦是常見的事。一間公司若需要年輕人的拼勁,保持公司發展與形象更有活力,必然要處理這問題,花時間讓雙方得以磨合,以免年輕有活力的人才流失。

「當時Benny介入,結果大家拎出嚟傾,雙方都道咗歉。明白喺一個時間緊拙嘅project內實在未必有空間慢慢改慢慢學。反而有乜改咗之後講返,就會慢慢知公司其實需要乜,個product目標係乜,自然就知要點幫公司做設計。最重要係既然兩個都要留低喺度工作嘅時候,就唔好比件心情影響到工作。鬥氣對件事冇益處。」

員工皆為人,相處間產生情緒在所難免,更重要的是建立合適的溝通方式,公司應提供渠道讓雙方溝通及理解公司目標。現今上司與Anna已找到合適的相處模式,兩人都明白應以工作為首,放下身段,反而更能推動計劃向前,同樣警戒自己日後與下屬共事,自己應多加明白與關心下屬心態。

超越執行視野 新造價值高於審舊改進

情緒化解,工作自然順心。UX/UI逐漸上手之後,Anna能參與策劃的部份增多,計劃中她接觸到不同部門,了解各持份者的意見,並了解怎樣才能令計劃走得更前。

「我負責設計DIY班等等課程嘅資訊頁面。開會嘅時候,發現啲班接納唔到更加多嘅收生,如果喺我作為設計師嘅角度,我會諗可能係我而家呢個頁面設計得唔夠好,好自然就會傾向以UX角度諗點樣改進頁面,例如點可以更人性化更易用等等。」

「但Benny就話,『由零創造出嚟嘅product嘅價值,一定會比原本已經有嘅嘢更加高。』,而家頁面本身係可以收到生,但既然我哋頁面吸引唔到潛在客戶,就唔應該喺我哋原來頁面度修改,而係整其他唔同嘅新頁面出嚟,吸引嗰啲原有頁面吸引唔到嘅客源。」

「我覺得呢個概念啟發到我,我之前都冇諗過原來仲呢種方法。學UX/UI會知道,其實要改進一個舊嘅嘢,要花嘅時間唔一定會比你整一個新嘢出嚟少。我哋以舊嗰個為參考去整個新嘅,其實個方向會去得快啲。反而快過你去慢慢發掘舊嗰個有乜問題,同時都因為創造新嘅嘢,就會知道舊嗰個有乜問題,次序唔同咗,但效率同得著反而多咗。所以整一個新嘢嘅價值增長,一定會比原本嗰個高。」

Anna於裝修佬工作,發現自己的身份不僅僅是設計師,還能接觸不同層面的工作領域、部門、人,這些經歷讓她視野得以提升,不再只執著於以自己角色身份出發去看事情,而是以一個更宏觀的角度去審視計劃。

【 裝修仝人誌.Anna篇 】機會眾多必須自學自理 勇於先行再反覆檢討
(圖片說明:Anna(左二)憑著認真對待工作的態度而獲得本年「2020裝修佬全年最佳員工獎」,她表示於初創公司面對多元且繁多的工作,腦內藍圖必須清晰,排好工作先後次序,不要過份依賴旁人。)

機會眾多必須自學自理 軟技能增市場競爭力

除了視野層次上的不同,Anna體驗為了走得更遠,各方的基礎知識有助自己對計劃了解更深。Anna一直專注於平面設計,由於接觸UX/UI,到為了要和相關部門溝通得更順暢,繼而要學到程式編碼。計劃中不同工作領域之間環環相扣,Anna作為計劃中的一員,明白不能只專注於自己領域的理論和概念,總有機會接觸自己不熟悉的層面。

「我本身讀設計,對編碼唔熟,但因為我砌裝修MALL同裝修學院嘅界面,就要用到編碼嘅知識,又或者同IT team溝通時都要用IT用語。冇㗎,聽唔明就自己google搵,係會有啲麻煩,但點都要學。」

Anna也強調在初創公司學習新事物,要自己懂得照顧自己。在職場上要接觸一個自己完全不擅長的領域,員工自學自理就相當重要,這是一個解難的過程,提升解難能力這個軟技能有助增自己的市場競爭力。

「呢度成個風氣大家都好認真去做自己嘢,即係其他公司可能總會有一啲你睇唔順眼嘅『Hea』人,但呢度係好需要大家都好into自己工作,要有效率,全部人都會有output俾你見到。」

成事宜自律排先後次序 勇於先行再反覆檢討

接觸不同知識領域、負責推動計劃、思考管理層面的問題,還要堅守基本工作,面對眾多層面的工作,Anna是如何自處的?

「我覺得要喺度做得好,就係要好清楚自己做嘅嘢係咩。因為好多ad hoc嘅工作會出現,要考慮呢個工作緊唔緊急,重唔重要,然後腦入面個藍圖要好清晰,有新嘢加入,就要即刻排先後次序。」

「我覺得裝修佬唔係一個好多時間比你去發問問題嘅地方,呢度每個人本身要做嘅嘢都好多,冇理由仲要人哋去湊住你做嘢,好多時要我哋適應能力好強。」

「可能你朝早一返到嚟,你就要知道自己嚟緊要做啲乜。唔好問人哋點樣做,可能要自己試咗先,可能會唔肯定自己嘅output做出嚟好唔好,但你都要做咗先,再俾你上司去決定,然後檢討調整,唔好要人哋全程take care你。」

回顧兩年,Anna憑藉自己的努力,配合公司給予的機會把視野變得更高更闊。由這故事可見於發展急促的初創公司需要高效率,懂自理自學的員工,同時公司亦需要提供足夠的溝通渠道,及改善的空間及時間,才能使員工更能發揮才能,讓公司走得更遠。

【 裝修仝人誌.Anna篇 】機會眾多必須自學自理 勇於先行再反覆檢討
裝修仝人誌
23篇