【 裝修仝人誌．Kova X Simon篇 】如何戰勝不擅長 把握機遇發現自身價值
2021年09月05日
0
600
正所謂「尺有所短，寸有所長」，員工各自有優缺點是十分平常的事。但作為下屬，如何戰勝不擅長從而成長？作為上司又可如何應對？今次就以裝修佬Academy BU中任職Business Development Executive的Kova與上司Simon分享兩年以來的工作心得。
化弱為強 倒不如建立弱者也能做到的系統
Kova加入裝修佬前是任職「小編」，入職後需要管理DIY班的課程運作，可說是大轉變。
Kova：「課程管理牽涉很多細節，無論事前準備、當日流程、突發事項、導師安排、公司內部協調、場地管理等等，都係課程運作嘅一部份。我未掌握得好好嘅位就係容易漏咗一啲細節，例如梳化未放返好，太陽傘的污漬沒清除。數百個細節，即使每次妥善完成了99%，別人也總會覺得『次次都總有幾樣嘢未做好』。我都唔想自己樣樣差咁啲，會成問自己『點解又會漏咗嘅？點解我冇為意？』。」
當甩漏被其他同事指出，對自己和部門也會增添壓力，甚至會連累上司被懷疑其管理能力。那麼，作為Kova的上司，Simon又如何應對？
Simon：「我嘅方向唔係令佢由唔夠細心變得更細心，呢樣嘢我control唔到。我反而想同佢一齊建立一個即使唔特別細心嘅人都做得好嘅系統。單靠用腦去諗到才做，啲嘢一多實會漏。建立系統就唔需要淨係依賴一己嘅能力同狀態，亦可以幫公司持續累積經驗。」
Kova：「其中一個例子就係建立checklist和workflow，整理好留意事項，做嘅時候就可以清晰啲，有嘢漏就更新checklist，感覺做嘢會愈黎愈系統化同埋進步緊。例如而家我哋有指引同流程表俾導師，有新導師加入，我就知道要同佢go through乜嘢，唔洗下下靠自己諗或上司提。」
原來處理弱項並非一定要由弱變強。透過建立能累積知識的系統，這價值不但比訓練員工能力高，亦提升了同事的工作層次。建立系統後，即使日後新人接手，也能輕易按章完成工作。這便是累積。
（Kova的工作包括課程管理，課程管理牽涉範疇眾多，有甩漏實屬實免，而使用checklist和workflow等方法去建立系統，就能令人人也能把工作輕易上手，減少過錯。）
急急改錯 不如認真思考問題成因和自己角色
當然，建立完善系統是漫長的過程，甩漏出錯問題仍會不時發生，大部份人面對錯誤都習慣即時道歉和補鑊，Kova也不例外。
Kova：「係第一反應嚟，有乜突發問題就即時道歉，然後自己快快處理佢，覺得咁樣係解決番個問題。」
Simon：「其實咁樣係浪費咗問題。我地公司容許同事犯錯，前提是從錯誤中學習到。因為問題發生係有成本，唔起當中發現和解決成因，咁容許犯錯就無意思。一個問題出現可以帶嚟好多線索，會唔會係同事唔掌握自己角色？又會唔會係上司編配工作有問題？只解決問題而不解決成因，其實就好似啲人講，解決提出問題嘅人而唔解決問題咁，係完全一樣。好似頭先話開班有幾百樣細節記唔到，其實真正了解同消化咗背後原因就唔駛靠死記同checklist。」
「所以我覺得好重要嘅係，當Kova覺得任何嘢唔對路、無效益、低效率，唔應該默默承受，因為問題唔一定起佢身上。要明白上司同下屬唔係企係對立面，而係同一陣線。全公司你最需要佢了解你明白你嘅人，唔係CEO，而係直屬上司。大家同一陣線，互相認錯無意思，一齊思考問題成因更有用」。問題發生，即時補錯不算是解決問題，思考成因才是進步累積的關鍵。
Kova：「有次Simon發現我處事的順序有問題，於是整咗個練習俾我，列出十幾樣同時出現嘅工作，然後排先後次序，我排一次佢排一次，然後佢講解下點解佢會咁排，呢個過程令我明白點解Simon係咁排，佢背後有乜考慮。例如朝早返工，第一時間係答WhatsApp message先定處理enrolment先，背後其實反映重視緊business還是日常行政。」
Simon：「做呢個練習嘅目的，唔係希望提高Kova的能力，冇咁容易。我係希望俾佢明白點樣用high level思考，從根本解決重複出現的問題。知道咩嘢較重要同埋點解，先至會識得排序同埋花合適時間去做一樣工作，而唔係好似夢遊咁一味完成上司叫自己完成嘅任務。」
「舉個例，落雨嘅時候由上司話你知要去收太陽傘，然後你去收，咁只係留係執行層面，有手有腳就做到。但如果你自己留意到天氣，主動去收太陽傘，個level就唔同左。我想佢把握到自己嘅角色。」
「曾有能力較高的前同事，睇唔起類似開太陽傘呢D工作。但其實佢都未做到呢個角色、下下要人提佢先識做，咁我就諗，件事都未做好，又有咩資格同根據睇少件事呢？我地唔需要透過整飛機大炮去實現自己嘅價值，反而係起日常工作中，兼顧到眾多細節將件事做好，掌握到自己角色，咁已經好高級，咁先至叫做帶著靈魂番工。」
從Simon給予Kova的練習中，重要的是培養Kova了解自己的角色，而不單單是執行。多思考每項工作背後的考慮，提升思考層次，才有能力整理知識和解決問題。這也是累積。
（Simon表示想讓Kova了解到面對過錯時，不應只埋頭改錯，更應思考問題背後的成因，令自己思考層次提升，才有能力整理知識和解決問題。）
閉門造車 不如把握機會接受挑戰發展潛能
今年，Kova的職途再次迎來新挑戰，搖身一變成為家居DIY KOL，拍攝雙週「裝修WHY」短片。Kova的用心製作備受嘉許，但原來Kova在接受這個角色前，也曾經歷了多番內心鬥爭，更差點失去了這個機會。
Kova：「一開始Simon叫我試下，我覺得自己本職都未做得好好，試咗唔知會點，所以好似無咩動機試新嘢。直到有一日，發覺其他方面進步唔大，與其不斷糾結做得唔夠好嘅事，自己都想有多啲突破，終於就試下去拍片。」
Kova：「其實同事鍾意我啲片，我覺得開心之外，最大改變係我要去面對唔同嘅問題，要留意嘅嘢多咗好多，例如點同拍攝同事夾、要緊貼市場、留意有咩嘢可以食到個潮流，例如mix埋奧運同家居維修DIY，做到好嘅宣傳效果。我覺得呢件事幾特別，好似挑戰緊一樣新嘢，可能就係喺做到同做唔到之間嘅灰色位，睇下做唔做得到，睇下可唔可以跨越呢樣野。」
Kova：「之前工作做唔好，只係識匿埋做做做，希望可以專注啲就會進步，但而家pick up多咗樣嘢，反而多咗啲方向俾自己進步。」
對於工作時間表早已排滿的Kova開始專注於嘗試新事物，Simon又如何處理多出來的工作？
Simon：「Kova拍片係自己搵料寫稿備料拍攝，處理多咗嘢，一開始自然少咗時間做恆常工作同埋多咗甩漏，呢D我會cover，也少不免要幫佢孭鑊。但咁係值得嘅。因為呢D都係短期嘅成本，佢嘅進步對佢對部門都有長遠價值。」
Simon：「好多人覺得時間同腦力係用少見少，唔夠就要珍惜。但人唔係機械人，你用得多用得好，反而會有更多時間和腦力。電腦就會越用越LAG，大腦只會越用越順。」
Simon：「Kova能夠在多方面提升，可以加快佢個人層面嘅累積，而佢帶俾公司嘅意義，亦絕對唔止係多咗D likes，最主要價值係佢做呢樣嘢嘅時候，令大家對於公司嘅片覺得有趣同期待，覺得我哋嘅製作唔係死板、係有特色嘅，會鼓勵到其他同事發揮創意。我聽講剪片嘅同事剪佢條片都剪得好開心（雖然可能花最多心機）。」
「我地公司好強調試用期有三個指標，一係KPI，二係融唔融入到公司文化，三係對同事有冇正面影響。雖然好多人覺得一好重要，但其實二三更重要，因為影響更深遠，影響人數更加多。」
「拍片有創意係咪即時賺多啲錢？未必係，但有創意、大家做嘢就開心啲，唔會咁悶。氣氛好其實係提高公司生產力一環，我覺得Kova係呢個地方係有佢好嘅地方，佢敬業樂業。」
Kova這兩年的體驗，一直跌跌碰碰，但他仍保持不斷挑戰的心態，努力嘗試改進，又向多方面發展提升，開發更多技能，對員工來說是難能可貴的經驗。而管理層亦應給予空間及支援讓下屬提升，其得著對公司定必有長遠利益。
無論是建立工作系統、掌握角色和原因，還是兼顧更多職務，重點都是諗多步、行多步。最後，讓Simon以對Kova的寄語作結：「我想佢見到自己真正價值同將來，唔好誤解嘅自己角色和職責只係完成指定工作。」
（Kova主理的影片頻道「家居DIY 要搵裝修WHY」經常以近期網路流行的話題引入家居DIY，搞笑又認真的形象深得民心。）
Kova主理影片頻道：家居DIY 要搵裝修WHY
