【設計名人堂】Kodi & Carry 美感觸覺與技術經驗成就美滿工程 濃厚責任感完善工程質素
2021年09月29日
0
35392
在Carry經營的這一間規模大，有三十人的裝修設計公司裡，Kodi是一位鋒芒畢露的室內設計師。曾做婚紗攝影的Kodi投身室內設計行業，現今已有二十年室內設計經驗，尤其擅長設計和他打扮一樣型格的工業風。
細心營造單位風味 美感觸覺心思技術兼備
工業風設計的單位就是他的成名作，事隔多年Kodi再憶述起單位事蹟時仍難掩興奮之情。
「客人單位係新樓，我個設計直情係要將個全新鋪嘅雲石廁所拆咗佢，成間屋大改造。客人本身有過裝修嘅經驗，今次都睇咗好多間設計公司。佢睇到我個3D圖已經好鍾意，但都擔心做唔做到出嚟，連佢個細路都好人細鬼大咁同我講『似同唔似都係一線之差㗎咋』，哈哈！所以我就更加要做好佢。」
有幸得到客人的信心，Kodi多番研究如何營造「真正」的工業風。「最緊要係出到個氣氛。事實上出面真係好多工業風，但效果唔好。因為唔單純只係拎咗隻有工業風味道嘅物料砌上去就夠，例如紅磚牆，只放啲紅磚上去只會係一遍紅，完全唔係嗰回事，所以我做紅磚牆係用幾隻唔同嘅磚，然後再做啲泥水，加強個殘舊感，工業風嘅氣氛就出嚟。」
利用過往身任攝影師所得的美感觸覺與美感訓練及盡力達成設計的心思與技術全無白費，眾多傳媒也紛紛採訪Kodi的成品，而更重要的是贏得客人的信任。「因為個客信任我，直接借條鎖匙俾我自己上去拍攝受訪，好少會咁做。」
技術知識的重要性 以嘗新的心不斷增加經驗
今日Kodi於室內設計這番成就，也是經過二十年的磨練。攝影師的身份培養他於顏色、光線及比例等等的美感觸覺，而裝修設計則讓他學會了「技術知識」。
「設計應該重視嘅其實唔單止係『靚』，『畫到做到』更為重要。工程有好多範疇，你要識到相關嘅知識，例如結構承重，有數計，你唔識嘅話個櫃就會塌，而呢啲就係經驗，浸出嚟，我都有過唔識嘅時候，就要不恥下問，唔好怕慳底。」
配合工程技術是願意去嘗新的心。「當你見到啲好勁嘅設計師嘅案例，你會覺得『嘩！咁都做到喎！』，就會主動想去研究下佢點樣做到，盡量去學。例如一啲冇扶手嘅樓梯，以前就會覺得『嘩好難做』，外國有，而家自己識咗，就有技術喺度，有乜配件，有埋牆點樣承托可以重啲。」
「而累積的經驗可以令你由初頭構思嗰部份已經唔會行錯路，經驗較淺嘅人可能會喺初頭構思有錯仍唔自覺，做落先發現有問題就要花費更多額外嘅時間去處理。有經驗嘅話就可以確保構思唔會錯，就住你嘅專業知識，你能夠預想到工程係點進行，完成之後大約會係點嘅。」
設計、創意、美感、技術與經驗兼備的Kodi現今加入了Carry的設計公司，繼續發光發亮，為客人設計更多美好的環境。
公司工程經驗豐富 為客人思前想後
Carry的設計公司除了Kodi，其他設計師皆有名氣，擅長多做風格，他們所設計的單位曾接受過不少採訪，為人熟知，這無礙是對客人一個重大的信心來源。而Carry認為除了設計師的實力外，其公司有十一年之多的工程經驗，也是客戶重點的信心來源。
三十人的工程公司於裝修界來說確實是大規模，以電訊工程起家的Carry，亦有做商業單位的工程，他望見住家裝修的先機，因而擴展室內設計業務，由有豐富經驗的師傅團隊，配合一眾有名有實力的設計，可說是天依無縫。
Carry細心了解每項工程的真正需求，為該工程思前想後，亦有不少佳績。「上一年幫一間公司做共享工作空間嘅辦公室，裝修途中已經有地產帶啲客上嚟睇，收返嚟嘅評價基本上每一個人都話好靚，效果好ok。後尾裝修完之後，啲單位唔洗一個月全部租晒，最成功係呢次，其實真係好開心。」
「租客都有讚過入到去個單位好靚好舒服，而廳面係做得最好。其實我哋諗左好耐，個共享廳面要擺啲乜元素落去先夠元善，加咗好多唔同設施，客人嚟到就覺得『呢間共享空間幾乎乜設施都有』，所有嘢都幫佢哋諗晒，客人就會用得好方便。」
「設備方面，例如我哋搵到一個電子門鐘，除咗人面識別外，佢入面有個功能，設定好啲人一定要戴口罩先至可以開門。」除了舒適感之外，Carry也花心思搜羅各種最新最實用的設備，為單位提升到另一個層次。
責任心建造完美工程 心態實力兼備
願意為各個工程花盡心思，來自Carry公司重視的「責任心」。「通常我哋跟工程最緊要就係責任心，因為觀察到好多時做工程又好，做裝修又好，往往都係到最尾嗰部份，執漏同質素問題，從而影響到有好多投訴。」
「所以喺呢部份我哋會好上心，亦放咗好多資源落去，會搵好多人去做最後果部份嘅驗收執漏，確保工程質素夠好，從而令到個客可以知道單嘢正式完工，冇手尾要跟。」
有Kodi與一眾設計師由構思開始，到Carry對工程的掌握，再到確保工程完美作結，Carry的設計公司無論是在心態還是能力上，都能達到為客人帶來美好環境的條件。
