【設計名人堂】 Hugo 好設計不只有美 更有「人情味」
2021年10月06日
3
35392
裝修是師傅與裝修戶主的「一期一會」，戶主可能會擔心裝修是機關算盡的行業，但入行20年的室內設計師Hugo仍相信能以真摯的人情味取勝。
連結Hugo與裝修設計行業是他的父親，隨做判頭的父親入行，Hugo也開始自己動手做學師仔。父親的早逝卻沒有讓他離棄裝修，反而因此結下了不解之緣。Hugo一邊半工讀設計，一邊做學徒，至今他已有自己室內設計公司。
好設計是解決問題 以專業滿足客人要求
Hugo並沒有室內設計師常有的傲氣，反而是一位親切溫文的設計師。被問到設計師對自己風格的堅持時，Hugo回應道：「自己讀設計嘅時候，阿sir第一堂就講設計呢兩個字真正意思係『解決問題』。」
「其實設計一樣嘢，唔係做一件藝術品，設計係幫個客人用設計去解決問題，將佢想要嘅嘢點樣去調整，然後令件事可以呈現出嚟係最好嘅效果，咁樣先係好嘅設計。」
「特別係做住家裝修，end user永遠係客人，如果我哋只係忠於自己嘅設計，客人其實對住間屋都唔會開心，咁樣嘅設計係失敗。」
「我哋做住家為主，最常面對家庭嘅客人，佢哋各自會有好多唔同嘅想法，我哋就要去諗點『解決問題』。」
「例如個男主人喜歡藍色，女主人就喜歡粉紅色，可能兩隻色根本唔可以放埋一齊，色調上可能唔夾。我哋就要諗點協調，究竟藍定粉紅，呢個其實係最有值得研究嘅地方。」
「通常我做法就係首先將呢兩隻色都撇開，變成一個細部份，可能係一張粉紅色梳化，而張牆紙就藍色，兩樣都唔會佔屋企面積大部份，用嚟做eye catching嘅地方，就會容易配合得到之餘，又可以令到兩個人嘅需求都得到滿足。」Hugo巧妙運用專業的設計技巧，把客人的需求融入於設計之中。
深入了解客人所需 貼合客人生活習慣
三四個月裝修工期說長不長，說短也不短，Hugo尤其重視與客人建立關係。從陌生人到建立如朋友般的關係，是經過深切了解，是一個透過溝通打開心扉的過程。
「見過咁多客人，其實我明白要對住一個陌生人去表達自己想要嘅嘢，有時自己都未必講得好清楚，又驚自己講錯，又唔敢表達。我哋就要做到令佢放鬆啲。」
「例如有時客人只係講佢喜歡黃色，你要知點解佢想要揀呢隻顏色。其實可能個原由係佢去旅行嗰時見到某樣嘢好鍾意，想將佢擺入屋喎，咁就唔單純係因為鍾意黃色，你只要知道背後原因，你就會容易啲企係佢角度諗點設計。」
除了了解客人喜好，設計更要貼合他們的生活。「又例如客人話想要無印風，當然冇問題，但櫃入面想點樣做呢？要俾我知道你櫃入面會放啲乜嘢先，鞋？遮？等等……我哋係需要慢慢引導，同指引客人去思考佢可能已經習慣晒而冇發現嘅生活習慣。」
「有時客人覺得搵一間設計公司，就係『總之你幫我整靚間屋啦！』，靚當然我哋有信心把關，但如果因為唔了解你，結果出到嚟都唔方便你嘅生活，咁樣就冇意思，所以到最後我一直覺得係要堅持追求返客人自己想嘅嘢。」
「所以我一直都鼓勵客人多啲表達自己，其實愈多資料，對設計師同師傅嚟講都係會容易啲掌握到你心中追求家居嘅面貌。」
人情味最為重要 竭力完成客人心願
如此著重與客人深入溝通，Hugo亦特別鍾情於住家裝修，只因Hugo公司重視的是「人情味」。而最令Hugo深刻且自豪的經歷，並非成品最完美的單位，而是一次以裝修完成客人心願的經歷。
「記得有位客人啱啱係半山買咗樓搵我哋做設計裝修，開始嘅時候突然問我可唔可快少少。你知裝修流程入面，特別係大單位都最少要三四個月工期，咁我哋就同佢了解點解突然咁急。」
「原來關於佢屋企人，佢話佢終於搵到錢，係半山買咗層樓，諗住可以裝修好同爸爸講自己終於事業有成，裝修咗層靚嘅樓，但爸爸患咗急病，可能好快就會走，所以就想我哋有咁快得咁快，做好個單位，可以帶爸爸上去睇一睇。」
「我就用多咗啲人日夜加班去做，盡可能加快進度，後尾兩個月內做起，等客人嘅爸爸可以睇到佢嘅成就，跟住佢爸爸真係睇完之後冇幾耐就走咗。呢個就係我好難忘嘅經歷，因為真係透過我哋嘅努力，幫到人完成心願。」家居是一個成就的展現，是一個維持「家」的地方，而裝修是一個「家」的開始。
「其實裝修過程確實係困難，時間唔能夠壓縮太多，加上半山區唔係隨時隨地都可以上去施工。我哋諗盡方法可以縮短時間，就將個空間一分為二去做，舉例水電就做一邊先，泥水師傅就做另一邊，就變相好多嘢可以同時疊住去做。」
「當然因為空間限制，工時會長咗，師傅一定做得辛苦好多，但同佢哋講解點解要咁做，大家都好配合去處理，好有人情味。坦白講未必咁大得益，付出嘅嘢多咗，但覺得好開心可以幫到人。」
「有時我覺得做裝修設計，我哋幫人哋做好咗件事，令到人哋成家開心啲，咁個家庭就和睦啲，我有時真係唔介意做多步，令大家都開心。」裝修其實可以不只是一單交易，Hugo更把它視之為一件富有人情味的交流。
一期一會 珍而重之建構每個家居
歷經20年，Hugo仍保持對待客人認真的態度，耐心的交流，因為他反覆提醒自己仍是打工仔時，老闆的一番說話。
「好多時一個家庭儲咗好耐錢，可能係用咗一生積蓄去買層樓，然後佢哋可能已經三四十歲，用所餘無幾嘅積蓄去裝修，可能一生只裝修一次。你可能一年做十幾個project，會覺得都係咁做㗎啦，但人哋可能一生一次，所以你哋要俾多啲心機，多啲係客人角度去諗下點解人哋咁擔心，點解每一個細節都好似要咁斤斤計較。」
「當你代入得到客人諗法嘅時候呢，咁就會明白點解人哋要咁樣去焦急，咁自不然就會覺得好多嘢都講得通，只不過係緊張啲姐，咁我哋就用返啲好嘅方法溝通，同埋用我哋嘅專業，去話返比個客聽唔需要擔心，一定幫你做好佢。」
裝修是室內設計師Hugo與裝修戶主的「一期一會」，定必全心全意的為你們建造貼合你的家居。
裝修室內設計案例欣賞：
想裝修屋企/維修家居？登記「裝修佬」免費裝修報價，24小時內專人回覆，為你推介最適合你的裝修公司。
