【設計名人堂】 Oscar 巧思妙想精緻設計 建造貼合生活的完美家居
2021年10月20日
3
35392
香港地寸金尺土，蝸居成窩居不是容易的事，必須依賴室內設計師的功力。投身室內設計行業已有十年的Oscar，一直致力精心設計貼合香港家居的室內設計，而他走的路並非明星路線的設計師，他沒有架子，凡事親力親為，全因他想令他的工程更完美。
「其實一路以來，我都鍾意學多啲唔同技能同技巧，例如想知多啲工程上嘅嘢，我會落手做執漏。一個單位點樣製造出嚟嗰個過程其實非常有趣，有好多學識喺入面，所以我會成日跟地盤。如果你講呢啲施工技巧知識，同師傅溝通絕對百利而無一害。」
室內設計需以技術支撐美感
Oscar深信要自己懂施工才懂設計，了解單位結構尤其重要，這是他過往的錯誤中所吸收的經驗。
「室內設計其實唔係只係諗要設計到幾靚，更重要係個設計喺實際情況下可唔可行，如果結構唔啱，就會塌。」
「啱啱開始出嚟做嘢嘅時候，畫圖時唔小心刪咗條柱，去到差唔多有定案先發現。嗰一次經驗，令我認知到畫圖之前，一定要認真、透徹，理解同了解個室內結構先。當下次畫圖就算冇咗條柱，你都會意識到結構有問題。係問題發生前已經處理好。」
巧思妙想 功能美感兼備設計
Oscar對單位的結構有深入了解，善用這番心思，Oscar設計過不少具功能與美感的傢俬，而這些奇思妙想源於他喜歡設計細單位。
「我比較鍾意設計細屋。無論大屋細屋，住戶都有一樣嘅生活需求，但細屋嘅空間確實細啲，你就要諗點樣令到佢感覺空間大咗，又可以擺到多啲嘢，要好認真去安排，要花多啲心思，呢種思考係最有趣嘅位置。」
聆聽客人的生活習慣，配合自己對美感的要求，加上對結構的認識，一個個貼合客人生活，令人驚豔的家居就在Oscar腦海中浮現。
「有一個客佢有十支結他，佢要有一個位置儲存，我就諗係個鞋櫃嘅側面做一個趟板，一拉就可以抽出嚟，趟晒十支結他出嚟，而前面就可以擺張梳化，佢儲物之餘又可以方便佢拎支結他出嚟。」
「變形傢俬其實都好適合而家嘅家居，我都有做過，曾經整過一幅電視櫃牆，後面就係一個書架，兩邊書架可以再敞開，最內面就係一個儲物室，三重嘅設計，非常有趣。」
致力引入優質建材 帶最好的給予客人
除了精緻的傢俬外，Oscar一直致力給予最好的家居客人，不斷找尋了研究最新建材物料引入香港，而當中Oscar公司最擅長的就是藝術漆。
Oscar熱情地分享他所發現的優質建材。「有隻冰島漆個價錢係比普通油漆貴好多，但佢冇甲醛，冇咁多有害物質，所以我哋一直都想客人試下。佢表面係防水防花耐磨，可能你油一次係頂幾種油漆，平時普通油漆可能兩三年你要翻髹，佢五六年你先需要再髹。」
「其實而家唔係好多人識整藝術漆，唔係好多油漆師傅肯去學，所以好多人用藝術漆都要搵返嗰間藝術漆公司嘅畫師嚟，成本就高，但工程上我哋特別擅長藝術漆，我哋有專職嘅油師傅做藝術漆既，所以會搵啲好新好特別好靚嘅藝術漆俾客人。」
聆聽客人最為緊要 確保客人安心放心
Oscar有百般裝修相關的武藝於一身，但至關重要的是耹聽客人的心。他認為多好的設計，只要不是客人所想，就沒意思了。
「設計公司最重要係聆聽，必定必定要不厭其煩去聽客人嘅要求去設計，要確保客人感覺到安心。」
「我哋每一日工地無論個客幾時嘅working hours都會有個師傅喺度。如果冇人喺度，我地會提前同個客講，交代返呢兩日因為要等水泥乾，或者傢俬到，所以就冇人。要俾個客知『放心我哋有做野嘢』。」
才能與技術是支撐好設計的基本，聆聽和服務是錦上添花，也是帶給客人美好家居的必要條件，而努力不懈的Oscar所得來的回饋就是客人的笑容。
「客睇到設計圖話鍾意，令到客人開心，同埋肯定到我做出嚟單位佢哋鍾意，呢部份我係最開心嘅地方。」
本文章內容及圖片均由本專欄作者提供及上載，並不代表本公司立場，如有任何版權問題，請與本公司聯絡。
關键字：
