【 裝修仝人誌．Kingsly篇 】 用人唯才 拒絕僵化制度

初創講求活力創新，敢試敢做，不少員工也備有一點「叛逆」特性，不甘於墨守成規。於大公司工作多年的Kingsly，意外的投身了作為初創公司的裝修佬並任職裝修顧問，讓她感受到不一樣的體驗。

反叛源於不甘僵化制度

Kingsly曾任大公司的小職員，她眼中大公司要求的是安定不變，規矩經過長時間的營運已發展成熟，但往往忽視了規則下的活生生的員工，而她更曾被稱為「反叛」的一員。

「曾經俾人話我冇discipline，因為喺大公司需要你好似機械人咁，只要做唔好問。同埋呢行有個文化，就係OT有『補水』，所以大家會將工作慢慢做。然後上司就會覺得你OT即係好勤力，但對我嚟講，工時內就認真做，我做晒我嘅工作，咁我咪走。」

「同事真係忙嘅時間我當然幫得幾多幫幾多，各部門指派更多嘅工作我都唔會『托手踭』，但當你發現好努力為一間公司服務，唔同層面上幫到大家嘅時候，但因為隔咗咁多層，上面嘅人唔知道其實你做緊乜，同做咗乜，只係睇到你冇同其他同事一樣『OT』，然後繼續俾更多嘢你做，咁樣其實好難行落去。」

當評定員工價值的準則留於表面，工作分配及資源分配錯誤，員工的付出不被重視，員工難免覺得心灰意冷。

層層階級阻礙了解員工真正價值

「之前嘅工作內容對我嚟講並唔難，我就諗如果繼續留係一個自己做得好嘅地方，其實可以好有成功感嘅，但我面試時都有同Andy講，我唔想一世就做死呢啲工作，咁冇成長，永遠唔挑戰新嘅嘢。」

一心向上，發展更多技能的Kingsly選擇離去，然後偶然遇上了裝修佬。與過往的工作大相徑庭，Kingsly由對內部工作轉為對外的「裝修顧問」。歷經一個月轉換跑道的洗禮，Kingsly的評價由從前的「反叛」竟搖身一變為最「守規」的員工。

「而家喺裝修佬，規則冇咁死，喺呢度如果我覺得攰，係可以落去行下，買野飲。俾我覺得唔係『你做啦！總之要坐定定喺位做嘢，唔準郁，行開行埋就會俾人話』。」

「頭一個月盡能力去學新嘢，因為係一啲我完全冇接觸過嘅知識，呢啲努力我一直都覺得就係做份內事，但一個月後Andy同我review，話我做嘢好穩，跟足規則去做，佢有一個最大嘅評價就係，佢哋讚我，甚至話我係模範員工，我都呆咗，原來我做嘢情況其他人係會睇到。」

Kingsly過往的「反叛」源自於對大公司的僵化制度提出反抗，而裝修佬裝修佬作為初創公司，沒有固守的階級觀念，架構相對簡單，靈活的工作時間，令工時已不再是唯一展示員工個人貢獻的指標。員工勤奮得到賞識，也是令員工更要緊守崗位的一種督促。

讀懂規則背後意義 團隊互助發展更快

「我唔太喜歡成日聽以前嘅人講四個字——『不嬲咁做』。如果嗰種『不嬲』其實係錯嘅你仍然咁做，當問題真係出現，『不嬲都咁做』就成為擋箭牌，用呢個黎推卸責任，冇重視點樣去改進。」

沒有了大公司僵化的規則所引致的員工慣性不求甚解，只為做而做的陋習，現在於裝修佬每人都必須為自己的行為負責，同時計劃的進行也必須團隊一同努力。

Kingsly發現進入了裝修佬後，就沒有「人人只求自保」的問題，不再只斤斤計教自己與他人做得多或少，反而互相幫助才能令計劃走得更前。

「而家喺裝修佬我冇聽過『不嬲咁做』，工作有問題發生其實真係好正常，呢度大家會一齊幫手解決問題，會討論應該點樣處理，從來唔會講『個客你跟㗎，你搞掂佢啦』。有時就算我自言自語，同事都會出聲問乜事，主動嚟幫你手解決。有Team spirit喺度，我一個人工作發揮自己，同時都有一班同事一齊做事。」

（圖片說明：Kingsly表示任職裝修佬的裝修顧問後，發現與同事不再是惡性競爭的關係，明白大家的利益是要透過合作互助才能得到。）

用人唯才 為員工製訂成長方案

除了令團隊主動互助推動發展外，初創公司更要兼備令員工進步的責任，因此重視每位員工的特點，去規劃更切合每位員工的成長方案，員工的工作自然也更易於被觀察，盡力做到用人唯才，無礙對年輕人來說是大好的發揮機會。

「記得初入職時有單工程，客人同公司有拗撬，當時我第一下就覺得，死啦，一定係我問題，然後不斷諗方法想解決。我問Andy意見，佢叫我問自己，究竟我係想『踢走個問題』還是『想幫客人解決問題』，我想幫個客解決問題，Andy就根據我俾嘅答案俾建議我。」

「另外，我一直以為對客嘅工作，就係客人最大，但Andy令我知道，作為裝修顧問唔單純只係Customer Service。裝修顧問係要有說服力，有責任去用自己嘅專業知識解答客人嘅疑難，對方講咗錯誤嘅裝修觀念冇理由都答佢『客人是對的』，如果咁做就係將自己嘅位置放得太低，反而會令個客唔信你係呢一行嘅專業。」

Kingsly原本以為裝修顧問是與一般服務業一樣，但有「顧問」形象與對專業的堅持，才藉得信賴。裝修佬令Kingsly擴闊了更多工作層面，不再只埋頭苦幹，讓她更多方面的發展及成長。

「以前係對住啲死物做研究，而家要對客對師傅，就知道要靈活啲。例如我幫客約公司，公司話唔得，初頭我就會比較倔，好公事公辦咁話『唔得喎，客人已經改咗兩次』，但後來知道要了解佢哋背後嘅考慮，再配合對住唔同個性嘅對象，要有唔同嘅溝通方法，合作到而家，啲師傅會好friendly同我講『得啦得啦，有我睇住你！冇問題嘅！』。」

曾被同事笑言最沉默，一動不動靜靜做事的Kingsly，現今也有了後輩。她已不僅是一個「守規」的員工，上進的心終得以發揮，更了解了規則背後意義，是一位懂得靈活變通的裝修顧問了。

由這故事可見初創公司應善用架構優勢，透徹了解每位員工的特點，助每位獨特的員工盡其所長，員工獲得屬歸感及團隊精神，公司自然走得更遠更快。