【裝修名人堂】何先生 以豐厚經驗為客人一眼關七 靈活貼心建造美滿家居

裝修戶主排除萬難置業，只想有一個貼合自己夢想的家，但他們對裝修不熟悉，師傅就成了他們最可依靠的對象，而何先生就是那一位為這些戶主完成一個又一個夢想之家的師傅。

「因為嗰時我爸爸都係做緊呢行，我就大概十五六歲跟住佢。做做下，自己出嚟做嘢都係做呢一行，中間有轉過行嘅，執貨、飲食、服務業等等，但轉極都覺得做呢行最開心，最適合自己，成功感大啲。」人生兜兜轉轉，何先生結果還是回歸裝修行業，轉眼間就是二十多年，最令何先生尤其熱愛的就是由零到完成客人心中的家的成功感。

為客人一眼關七 以豐厚經驗解決單位疑難

隨父親腳步，何先生於裝修各個範疇上可說是樣樣全能，憑藉這些豐富的施工知識及經驗成為裝修工程的管理人後，更是靈活調動自身的崗位，為客人一眼關七。

「唔可以話科科都精，但一定要識同要做到。做得裝修管理嘅就要一眼關七，進場第一刻就要了解成個環境，例如客人講過乜嘢要留低唔留低，又或者留意啲線用唔用得，有邊啲嘢唔用得要解釋返俾客聽等等。客人唔識，就係靠我把關㗎啦，呢個係責任嚟，亦都係我嘅專業。」

何先生成為客人專業的「裝修眼睛」，看出單位各種問題，配合客人需要及利用經驗實施可行方案。

「曾經幫個客人做廚櫃，因為佢唔想個熱水爐放喺廁所，我哋就諗到熱水爐放喺廚櫃入面。咁做尺寸要好準確，要計晒數㗎，整完吊櫃就遮住個熱水爐，幫到客人廁所廚房都慳到位，望落會大啲！」

「仲有次頂層單位，幫個客將水泵搬上天台，但我發現泵上咗去天台嘅話就會同水缸平排，有機會出現唔夠力嘅情況，幫佢諗咗點搞，最後都成功咗，就令到客人屋企廚房好洗好用！」

何先生娓娓道來一個又一個為客人解決疑難的例子，用心解決客人所不知道且不了解的裝修疑難，談及每次成功，他言談間都不禁流露著對完成客人心中所想的成功與自毫感。

樂於接觸新事物 持續提升工程質素

為了確保裝修疑難得以解決及保持優質的工程質素，何先生反覆提醒師傅不能仗著自己工藝了得而固步自封，裝修建材及工具日新月異，是裝修界的進步，為了工程更完美，更應有接受新事物的心。

「其實真係要多啲接受新事物，而家好多嘢一路變化緊，唔同建材，同埋每個單位都唔同，邊個環境適合乜嘢，有時都要識得變通，靈活同肯試新嘢好重要。」

「所以我經常周圍睇而家有乜新建材，近期又出咗乜『神器』可幫到師傅施工靚啲，方便啲，減輕師傅負擔，工程又可以快啲，就會做得越嚟越好。」

樸實、認真、專業 與客人建立十年良好情誼 

善於聆聽客人需要的何先生，二十年來累積了許多客人，備受歡迎的何先生卻樸實地說：「工程好認真做除咗成功感，其實最開心係可以同啲客做到朋友，由客人轉為朋友係好珍貴嘅事。」

「記得有次個客電線有問題，搵咗好幾個師傅上嚟都查唔到乜事，最後搵到我，後尾我用咗啲時間心機落去搞，終於查到廁所有個地方漏電，又睇到佢啲電線真係好舊，整得返呢邊，好快第二度都有機會好快壞。」

「我建議佢換晒成間屋電線，好開心佢揀咗相信我，換咗之後十年都冇事發生。自此呢個客就成日搵我整裝修嘢。其實佢有好多大小問題，就算有時未必全部都幫襯我，但佢問我嘅嘢，我都鍾意答佢問題，因為我覺得我哋建立咗金錢以外嘅關係，我當佢係當朋友㗎！」

「其實我有時好簡單，客人信得過我，間中讚下我就開心㗎啦，哈哈！」

何先生一直專注於自己的專業上，看通一個又一個的單位，致力以豐厚經驗為客人建造美好家居，能持續下去的原因或許比想象中樸實，與客人建立良好的情誼，讓客人依靠自己正是支撐何先生努力認真的原因。

想裝修屋企/維修家居？登記「裝修佬」免費裝修報價，24小時內專人回覆，為你推介最適合你的裝修公司。