【裝修名人堂】 林記 戶主從來唔驚佢走佬 裝修公司令人信心爆棚 1句關鍵說話要講定先!
2022年01月19日
1
33108
![【裝修名人堂】 林記 戶主從來唔驚佢走佬 裝修公司令人信心爆棚 1句關鍵說話要講定先!](https://hkdecoman.com/Hkdecoman/upload//hk2022-01-19/image/722235cc-3365-4769-a991-97e8c3089fca.png)
林記由林氏父子檔組成,人稱林師傅的「大林生」縱橫裝修界二十年,近年兒子林仔也步隨爸爸的步伐踏入裝修界,努力傳承爸爸的專業。
深厚經驗帶領戶主一步一步邁向理想家園
「我做水電入行,喺呢方面較專業。後來做室內裝修,一做就做到而家,所以對於各方面嘅技術都熟悉。」林師傅的裝修之路由一屋的根基—水電開始做起,對他而言,水電亦是裝修最重要的項目。
「公司正常做法係會先睇位度尺,問戶主成間屋想點樣做,傾完之後我哋再分享吓經驗,畀啲意見戶主參考。」想像總是天馬行空,戶主對於自己的家居通常都有著許多念頭,在現實中卻未必能呈現理想的效果,這個時候正正需要經驗豐富的裝修師傅出謀獻策。
「例如話做燈槽,腦入面諗係好靚,但如果由門口開門入去睇起,成個感覺又會唔同咗,所以我哋要幫戶主留意埋呢啲細節,同佢哋一路傾,一路調節,一路做。」
裝修是服務性行業 與客人溝通最為重要
不要看林師傅外表氣概豪邁,他坦言做裝修其實如從事服務性行業般,除了需要長時間跟客人溝通,還要處處以顧客為出發點去考慮:
「始終住嗰個係業主嘛,一定要尊重佢嘅意見。一路傾嘅時候少不免會有磨擦,但唔緊要嘅,慢慢磨合就得啦,最後都會傾得掂!」
現時爛尾工程屢見不鮮,不少客人都十分擔心自己會成為下一位苦主,所以在整個裝修過程都相當緊張。林師傅卻認為,他遇過的客人都很公道,並不如外界提到般無理取鬧。工作多年,他自然是有一套與客人商洽的秘訣,就是在工程開始前就講清楚,溝通好,講好每一日的進度,即時拍照給客人看:
「咁樣人哋先會覺得我哋有交帶,會信任我哋。從來都冇客人擔心過我公司走佬!」
雙方都要不嫌其煩 一句說話要講定先
師傅長期準時報告工程進度,好處是幫助雙方溝通,加強戶主對師傅的信任。師傅就不嫌其煩,但萬一怕煩的是業主自己呢?經常電話、短訊來往,對於日理萬機的香港人來說,真的有空間去處理嗎?原來關鍵是在工程開展前說這句話:
「我會喺一開始就同客人講:『裝修係好麻煩架,請你要有準備我會成日麻煩你!』冇辦法,畢竟每個人嘅選擇唔同,我唔可以每件事都為戶主落決定,而且有時候戶主未必太熟悉裝修細節,都要我要聯絡佢解釋,所以我之前提到話要一路做一路傾,咁先做到戶主最想要嘅效果!」
信任原是一切的基礎
其實一直與記者聯絡的是林仔,但去到採訪當日,林仔卻甚少發言,把分享的大權完全讓給父親。當林仔被問到是不是十分尊敬爸爸?二人笑而不語。
「大林生」、「細林生」在訪問期間一心分享「林記」的故事,當被問到兩父子的關係,比起分享裝修工程上的細節,二人可說是支吾以對,大家可以想像那個少許尷尬的畫面。也許是華人不習慣把對家人的愛宣之於口,在父子之間更甚,惟說起爭拗問題時就滔滔不絕:
「兩父子點會冇爭拗呀!拗就一定嘅,不過係操作上,我會相信佢個套,因為佢經驗豐富呀嘛!」林仔鮮有地發言。
林師傅嘴角牽起一絲微笑:「佢啱啱入行,要帶多啲,但其實好多事情,時間耐咗,佢都熟悉哂,公司有多個熟人睇住都係好事。」
對話中其實不難發現他們二人父慈子孝,一個放手讓兒子成材,一個虛心受教。而林仔本人也有不同的想法,例如在工程上,他就指自己較喜歡做木工:「客人通常都係先看櫃嘅成果,木工手藝畀客人嘅印象好重要,所以我會更加重視呢個方面,希望可以畀到客人穩陣嘅第一印象。」
林仔更坦言,其實一開始隨爸爸入行都是為生計,後來才發掘當中的樂趣:「一開頭可以有咩諗呀?都係為左賺錢,但做到最尾,個製成品出嚟嘅時候,突然發覺,呢個好似自己個仔!後來自自然然更用心去做,愈做愈有幹勁。只要係自己造嘅成品,好似特色牆咁,做完出嚟我都好滿意!」
而對於老練的林師傅來說,對兒子當然有相當的信任,很多時候都放手讓他自己做,當然,他也有一群可信的班底一直幫忙:
「啲師傅一拎架生,我就睇得出佢有冇料!」林師傅不怕豪言,因為遇見過的人很多,也知道哪些師傅是能幹的。他清楚每個師傅的做法可能有異,所以總是會與師傅們溝通好,再給予絕對的信任。
身為老師傅的林生作全方位的裝修「技術支援」,而年輕人則負責開拓新市場,在兩父子的雙劍合壁下,期望開展林氏的另一片天。