【裝修名人堂】Alex & Hubert 戶主夫婦鬥快聯絡負責人？商戶設計都可以好多花樣？ 最新嘅設計工程現況話你知！
2022年02月09日
3
35392
Alex和Hubert，兩位在90年代都是從事設計和工程行業，一位修讀室內設計出身，一位早期負責大型工程。因為家人的關係而結識，繼而一拍即合自組公司。
二人既是親戚，亦是工作伙伴，卻毫不諱言拗撬是必定會發生的事。但也許是公司工作的模式夠「獨立」，可以減少磨擦的機會。
「我哋負責嘅客人係分開嘅，公司係design build，我哋主張設計跟埋工程，唔同project有唔同角色，工作內容可以話係designer，亦係project manager，不過我哋好少講title。」不會特意強調職位銜頭，某程度上也是因為每個人需要負責的工作範疇涵蓋多個方面，難以用一個名銜表達，箇中原因與公司主張的工作模式有關。
新派管理方式？強調個人Ownership
「公司一直以嚟最堅持嘅，係每個客只同一個同事溝通，除咗可以提升同事對嗰項工程嘅Ownership，亦減少溝通上嘅誤會。」Hubert指，與戶主溝通的對頭人由頭到尾都是同一位同事，這種做法有助清晰地傳達顧客的訊息；相對地，萬一該項工程有任何問題，負責同事亦責無旁貸。
裝修設計工程的細節何其複雜，一個人負責跟進，其工程知識想必非常豐富。Alex 和Hubert指，工作多年，在工程現場也學到不少知識。無論風、火、水、電，甚至是現代人不可或缺的網絡問題，他們都能掌握，而公司亦會給予機會和信任度年資較淺的同事：
「就算係新入行同事，或者係實習生都好，我哋都會叫佢落地盤，睇吓師傅點樣做，咁先可以畫到圖，同到客解釋清楚，當然新同事嘅作品我哋會審批咗先。邊個畫圖就邊個跟工程，確保大家做事都會認真同上心。」
Hubert坦言，這種工作模式對同事來說一定是吃力的，但可以確保工程更順利進行；而工程完成後的滿足感就更大：
「好似做餐廳裝修工程咁，有時行過又可以幫襯吓，同時又可以話畀人知呢到係自己做嘅，見到實物個感覺好好。」
新一代的商戶設計花樣多
說到商戶的設計工程，Alex現時公司較多處理商業工程如寫字樓，卻不如外界看起來沉悶：
「好多人以為做公司工程就簡單啲，要求少啲，其實都唔係㗎。而家好多公司都做得好有特色，例如係Co-working Space又或者係開放式設計嘅公司，唔再好似以前咁有固定座位。Share place 多咗，有啲公司需要提供俾同事collaborate嘅空間，所以設計上嘅概念同以前有出入。」
時間是工程最大的敵人
關於商業工程，新式的設計需要沒有難倒Alex和Hubert，反而有一項因素是二人異口同聲地說是商業工程中最難控制的：「時間！」
「商業地方有好多限制，好似商場咁，朝頭早有人流，自然唔可以做；夜晚又怕有噪音問題，只可以髹油。更有啲地方全日都唔俾你做，好似樓下係寫字樓，樓上係酒店個種，結果只可以把握食飯12點至1點短短嘅時間趕工，真係每日都同時間競爭。」
礙於客觀條件，不少商舖都深明工程的限制，有需要時寧願加錢讓師傅們在夜晚開工通宵趕工。Alex更指，他們曾經用3日就把商舖改頭換面，讓商戶來得及在早上開幕做生意。
餐廳設計同樣可以有要求 難忘三地公司合作
「最深刻係有間法國餐廳想嚟香港開分店，而佢地有間用開嘅國內設計公司，想係香港搵裝修公司處理，所有建材同設計都同大陸運落黎。」
相關的持份者涉及三個地方，三間公司，Alex指當時他們每個禮拜定期開會與各方協調，又要遷就不同地區合作伙伴的工作時間，再加上上述提到商舖的工時限制，令工期趕急非常：「個段時間日日開夜，開足一個月。因為要同各方配合，好多嘢都都控制唔到。」幸好最後餐廳都順利開張，為Alex留下了十分深刻的經驗。
天下武功，唯「快」不破。被問到在極多限制的條件下仍可以準時起貨的秘訣，Alex直指：「請多啲人。」所謂人多好辦事，多個人，進度自然能加快，工程往往都能順利完成。
「我哋幾乎冇試過起唔到貨，其實只要前期溝通多啲，成件事就會smooth 啲，順啲。」
夫妻情趣定係潮流興？住家客夫婦鬥快聯絡項目負責人
兩人都從事這行十多二十年，提到現今的顧客跟以往有甚麼分別時，Alex就笑言有些戶主夫婦會鬥快Whatsapp自己：
「幾好笑㗎，兩公婆因為設計上嘅細節傾唔掂，好似顏色呀，儲物空間爭唔到，就索性唔用group討論，掉返轉大家私底下鬥快搵我，因為要霸咗位先。」社會上常有聲音指不少新人籌辦結婚的事宜，終究分手收場，難道現在傾裝修也有這個危機？項目負責人豈不是任重道遠？
「解決方法當然係盡可能平衡兩者嘅需要，但如果真係有衝突時，咁就要靠整體嘅設計話事。例如兩公婆想要唔同色，最客觀嘅方法就係match返設計上嘅色系；又好似紫色牆係唔襯金屬嘢咁。要平衡，就會睇下邊位嘅要求更加配合到設計。」
Hubert稱，以前的戶主很少發生這種問題，或許是現時的男戶主都想擁有自己的空間，亦可能與現時的房屋單位愈來愈小有關，在設計上也相對地比以往困難。
現代客人更為謹慎 裝修設計公司仍可保持優勢？
談到建材與設計的變遷，Hubert想起舊時的設計相對簡單，沒有太多裝飾，只要品質好就可以。現今的設計相對花巧，既要特別又要耐用。客人對建材更為講究，會唔會同時也闊綽了？
「資訊發達，問吓人或者上網check都知道唔同建材公價係幾多，所以戶主用錢係謹慎左。其實係好正常嘅，我自己買嘢之前都會上網查吓先啦。」
資訊發達或許是好處，但同時亦令行業競爭變大，Hubert則認為自己公司有信心保證：
「我哋公司做左10幾年，工作模式已經好成熟，而且我哋有自己嘅班底，有熟嘅廠，可以話好穩陣，更加唔會有溝通上嘅誤會。」
Hubert明白顧客總有懷疑和不安，他會用經驗說服客人，也會展示往績供其參考，有需要亦可帶客人到進行中的工程處解釋流程，讓他們清晰了解不同階段的工程細節，同時亦令客人看到工程的質素，提升他們對公司的信心。
溫馨提示
最後，Alex提醒有意裝修的客人要仔細閱讀報價單：
「有啲客一見到我哋嘅報價單，會驚點解咁長，有成4至5張紙。因為我哋將字眼寫得好清楚，避免不必要嘅拗撬，保障自己，亦係保障每位顧客。」
不要輕視報價單的重要性，戶主應理解清楚當中的字眼條款，並且與公司保持緊密溝通，更可確保工程順利進行。
想裝修屋企/維修家居？登記「裝修佬」免費裝修報價，24小時內專人回覆，為你推介最適合你的裝修公司。
