【裝修名人堂】「客人鍾意就開心」Oscar 深明懂施工造就好設計 找尋最新建材物料用得放心

識裝修、熟建材，為何如此重要？設計師並非師傅，是否需要懂得施工呢？鄰居無理投訴裝修噪音，設計公司應該如何應對？裝修佬馬上帶大家看看 Oscar 團隊如何解答這些難題。

香港地寸金尺土，「蝸居」成窩居不是容易的事，必須依賴室內設計師的功力。投身室內設計行業已有10年的 Oscar，一直致力精心設計貼合香港家居的室內設計，而他走的路並非明星路線的設計師，他沒有架子，凡事親力親為，全因他想令工程更完美。

「其實一直以來，我都鍾意學多啲唔同技能同技巧，例如想知多啲工程上嘅嘢，我會落手做執漏。一個單位點樣製造出嚟嗰個過程其實非常有趣，有好多學識喺入面，所以我會成日跟地盤。如果你講呢啲施工技巧知識，同師傅溝通絕對百利而無一害。」

室內設計需以技術支撐美感

Oscar 深信要自己懂得施工才懂得設計，了解單位結構尤其重要，這是他從過往錯誤中汲取的經驗。

「室內設計其實唔係只係諗要設計到幾靚，更重要係個設計喺實際情況下可唔可行，如果結構唔啱，就會塌。」

「啱啱開始出嚟做嘢嘅時候，畫圖時唔小心刪咗條柱，去到差唔多有定案先發現。嗰一次經驗，令我認知到畫圖之前，一定要認真、透徹，理解同了解個室內結構先。當下次畫圖時，就算無咗條柱，都會意識到結構有問題，喺問題發生前已經處理好。」

巧思妙想 功能美感兼備

Oscar 對單位的結構有深入了解，善用這番心思，Oscar 設計過不少具功能與美感的傢俬，而這些奇思妙想源於他喜歡設計細單位。

「我比較鍾意設計細屋。無論大屋或細屋，住戶都有一樣嘅生活需求，但細屋嘅空間確實細啲，就要諗點樣令到佢感覺空間大咗，又可以擺到多啲嘢，要好認真去安排，花多啲心思，呢種思考係最有趣嘅地方。」

聆聽客人的生活習慣，配合自己對美感的要求，加上對結構的認識，貼合客人生活，令人驚豔的家居就在 Oscar 腦海中浮現。

「有一個客有10支結他，佢要有一個位置儲存，我就諗喺個鞋櫃嘅側面做一個趟板，(趟板)一拉就可以抽出嚟，趟晒十支結他出嚟。(趟板)前面就可以擺張梳化，儲物之餘又可以方便佢拎支結他出嚟。」

「變形傢俬其實都好適合而家嘅家居，我都有做過，曾經整過一幅電視櫃牆，後面就係一個書架，兩邊書架可以再敞開，最入面就係一個儲物室，三重嘅設計，非常有趣。」

引入優質建材 帶最好給客人

除了精緻的傢俬外，Oscar 一直致力給予客人最好的家居，不斷找尋及研究最新建材物料引入香港，而當中 Oscar 公司最擅長的就是藝術漆。

Oscar 熱情地分享他所發現的優質建材。「有隻冰島漆個價錢係比普通油漆貴好多，但佢無甲醛，無咁多有害物質，所以我哋一直都想俾客人試下。佢表面係防水、防花、耐磨，可能你髹一次係頂幾種油漆，平時普通油漆可能兩、三年你要翻髹，佢五、六年你先需要再髹。」

「其實而家唔係好多人識整藝術漆，唔係好多油漆師傅肯去學，所以好多人用藝術漆都要搵返嗰間藝術漆公司嘅畫師嚟，成本較高。但工程上，我哋特別擅長藝術漆，我哋有專職嘅髹油師傅做藝術漆嘅，所以會搵啲好新、好特別、好靚嘅藝術漆俾客人。」

聆聽需求 確保客人放心

Oscar 有百般裝修相關的武藝於一身，但最重要是聆聽客人的心。他認為多好的設計，只要不是客人所想，就沒有意思了。

「設計公司最重要係聆聽，必定要不厭其煩去聆聽客人嘅要求去設計，要確保客人感覺到安心。」

「我哋每一日工地都會有師傅喺度。如果無人喺度，我哋會提前同個客講，交代返呢兩日因為要等水泥乾，或者傢俬到，所以就無人。要俾個客知『放心我哋有做嘢』。」

Oscar 又舉出另一個為戶主「拆彈」的例子。試過有一次為九龍區某高檔私人住所裝修，鄰居因疫情需 work-from-home，每天投訴裝修噪音影響其工作。Oscar 坦言，「管理處都知道呢個係無理投訴，所以很多師傅可能對此置之不理，但就會影響戶主日後的鄰里關係，嚴重更會引起針對。」Oscar 當時的處理方式，是與客戶溝通後，透過管理處作中間人，以影響客戶工期最小的方式，安排時間讓投訴人完成重要會議，鄰居亦表示感謝。

才能與技術是支撐好設計的基本，聆聽和服務是錦上添花，也是帶給客人美好家居的必要條件，而努力不懈的 Oscar 所得來的回饋就是客人的笑容。

「客人睇到設計圖話鍾意，令到客人開心，同埋肯定到我做出嚟單位佢哋鍾意，呢部份我係最開心嘅地方。」

 ＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝