重視裝修真功夫 高質素工程在於懂得「 收口」
—— 裝修佬專訪：譚師傅
「基本上你講得出嘅，我都做得到」，譚師傅自豪地說道。在10年的工程經驗裏，他做過「百幾二百」個住屋裝修工程，當中大有小，有劏房，也有二千多呎的獨立屋。譚師傅認為自己是有執著的人，對工程的質素和接待客人都有一套專屬標準。他説做裝修、做傢俬一定有級數之分，「我不可能蔗渣（劣質材料）嗰啲去搞㗎，我真係唔識用嗰啲材料去搞」，他看過很多的裝修都是「影出嚟靚㗎咋」，但內在是用「蔗渣」材料做出來，譚師傅則堅定反對這種「得個樣」的裝修工程。
電工出身 由大型工程做到住屋裝修
譚師傅投身裝修行業已有10年，經驗十分老到。他原本是電工出身，入行時做一些大型工程，比如是海洋公園的基建。他説在這段期間認識到不同專科的師傅，「有啲就做泥水啊、有啲就做傢俬啦、做水喉啊」，積累了經驗，也擴闊了人脈。後來他跟著一位裝修老師傅，家庭式的公司，主力做一些居住單位的工程，他一邊做一邊學，「泥水唔夠鎅磚囉、啪磚囉，例如話做防水，或者做外牆囉，出棚、砌鋁窗」，逐漸練就出一身全科裝修功力。
注重細節 高質素工程須掌握「收口」
「咁樣講，唔係假，我係個啲追求完美嘅人嚟嘅」，譚師傅説他對於裝修工程的所有細節都十分看緊，他説很多時候不同裝修公司的施工過程其實都是大同小異，「裝修講嚟講去，個個都識嘅，其實成個施工過程，好Hea好垃圾，都係嗰啲過程嚟嘅」。而他認為區別差劣裝修與高品質裝修之間，在於「收口」兩個字，他認真地説：「假設一個櫃，你同個石膏板之間，嗰個收口做得靚唔靚，櫃入先定係石膏板入先，邊個行先，定碰埋就會咩㗎，等等個啲都係講緊個收口問題」。而且譚師傅指出「收口」不僅僅是完工階段的問題，反而是在所有單位的施工前期，你出的設計圖紙對不對，有沒有「度好實呎」，這一切都反映出工程的細節。
跳出沉悶舒適區 追求裝修品質 設計多樣性
譚師傅3年前創立了自己的裝修公司，組建的班底都是來自於當時大型工程時所認識的手足，他說這些師傅都是他有信心的，各司其職各有所長。而他跳出舒適區創立公司的關鍵原因則是：厭倦了一式一樣的裝修風格與質素。他說從前跟著師傅的年代，基本上做的都不是自己想做的工程，「劏房啊，劏開佢啊，舊樓翻新啊，租俾人，講真嗰啲係基本嘢嚟㗎唧，交貨姐，正正常常就得」，因此他漸漸心生厭倦，最後就決定自己建立公司，做更高質素和更多元的裝修單位。譚師傅神情堅定地說：「後期自己接嘅，就好講靚唔靚，同埋啲物料點樣運用呢，唔一定用膠板，用金屬都得㗎，好多唔同物料可以組合，點樣組合令到佢更好。」不滿足於完成單位就夠，譚師傅更加想帶給顧客更多元化的裝修選項。
裝修其實就是靠「溝通」和「透明度」
「其實裝修好多時候都係講溝通。」譚師傅説客人在裝修期間一定有很多自己的想法，如何可以把這係想法具體化為裝修的設計，靠的就是透過細心溝通不斷縮小客人的喜好範圍，「咁我唔會一開頭就話畫張圖俾你，唔會㗎嘛，有無望到啲咩係你鍾意啊？想走咩風格啊？俾一啲物料同example佢睇，我做過呢啲喎，加落去你喜鍾唔鍾意啊？係未想走無印風啊？」客人透過這個過程，就會與師傅建立穩固的信任基礎。
另外就是裝修的透明度，也是品質工程的一大要素，譚師傅説很多時候客人在挑選你之前，其實已經看了大量你的過往工程例子，或者是檢查過你的臨床施工水平。而如何令他們更加放心，則是在於你對於施工進度及裝修材料的透明度。「我成日同啲客講，我講到啲嘢幾靚係無用嘅，你自己摸，自己感受。我講到塊板幾硬都無用㗎，你自己摸，我呃你無用㗎，過嚟我鋪頭親眼睇」，他說最佳的增加信任方法，就是讓客人可以隨時檢測工程的材料及進程。
最大的滿足就是完工影相的一刻
譚師傅笑著説，每次全屋裝修完工時都有滿滿的成就感，「其實影相時都好滿足，我同我班細，其實嗰下係好有滿足感，抹乾淨曬、清曬場，開始影相嘅時候，因為嗰啲就係我哋嘅成果」，就是這種單純的滿足驅動譚師傅不斷打造心中完美的家居單位。
