【House730專欄】市道行情｜超級豪宅一年管理費 夠供4年細價樓
2026年01月15日
1
15324
文章由House730提供｜
有啲數字，需要用少少時間消化！如果講到4.8萬呢個數，會諗起咩？人工？金價？一個頂級入門版名牌手袋？一個豪華旅行團使費？原來可以…係一個月管理費！西半山超級豪宅天御，一個分層近5,000呎豪宅，一個月管理費要4.8萬元，一年交嘅管理費要58萬元，買到一個沙田第一城車位！
豪宅管理費夠供樓
打工仔每月供樓開支，應該都佔去大半收入；但有冇想過，在香港供一層價值約400萬元的細價樓，4年供款竟等同超級豪宅一個月的管理費？呢個唔係假話，係活生生的香港樓市寫照。近排「億億聲」嘅超級豪宅頻頻錄得成交，例如深水灣道6號嘅兩幢獨立屋，成交22億元；山頂種植道又錄大屋5.58億元成交，愉景灣兩組大屋9.88億成交，貴價大屋咁火熱，分層豪宅點呢？
在西半山天御用餐，有維港海景伴飯
「VIP席」欣賞整個維港海景
位於半山衛城道嘅天御，周邊都係頂級豪宅，好似干德道天匯就係代表之一。天御位處傳統豪宅地段，半山起兩幢大廈，可想而知，都係攞維港天際海景做賣點。想日日都可以「免費VIP席」欣賞整個維港海景兼兩岸繁華大都會景，價值幾錢？以天御第2座50樓為例，全層達4,710呎，面積幾乎係沙田第一城16個實用面積284呎細單位，早排招標成交咗3.55億元，每呎75,363元，價錢包括兩個車位及一個電單車位。普通打工仔對呢個價錢，可能覺得好「離地」，就連個單位管理費，都望塵莫及。
雲石浴室
58萬一年管理費，可以點理解？
呢個「煙花海景王」超級豪宅50樓單位全層，4間房全部都係套房，單係客廳面積大約600呎，相當於香港標準車位（每個134呎）嘅4個車位面積，甚至係兩個普通300呎細單位。單位內仲有溫室、安全室、工作間、儲物室等多項功能空間。睇翻招標文件，原來個單位淨係管理費每個月要48,290元，每呎管理費超過10.2元，即一年要畀58萬元管理費。
400萬樓月供12,186元
換個角度，如果以400萬元買一層沙田第一城284呎細單位，做七成按揭、30年期、3.25%利率，每月供樓約12,186元，假設利息不變，扣除本金攤還等因素，唔計水電費，單係天御一年管理費，已近呢個400萬單位4年嘅供款。近期沙田第一城5期有單號車位，以48萬元成交，天御分層豪宅一年管理費，夠買一個沙田第一城車位。
