Teddy於16年前回流香港，子承父業，與父親一同打拼裝修界。屹立不倒30多年的裝修公司，並非浪得虛名，Teddy見盡多種裝修界的風浪，結論是「做
裝修要有誠信」。
Teddy見識過不少中伏個案，深明很多業主為何覺得裝修界龍蛇混雜。小則「偷工減料，或者趕時間強行做，裝修次序亂晒」，大則「皮包公司，話我幫你搞掂，收咗錢就閃人。」。
面對可憐苦主，不少同行也怕麻煩不願意接手「爛尾裝修」，Teddy本著雙贏的想法，接手過不少別人的手尾。「有個客買樓俾個女結婚，搵咗其他公司做，結果好多甩漏。好多公司唔肯做執手尾嗰個，但我哋覺得佢個女趕住結婚，就決定幫佢執。起碼做生意嘅時候可以幫到人啊！我有生意開心，客人有得著又開心，大家咪winwin囉！」
受害者其實不單客人，Teddy自己也曾經歷過「走數」。「嗰時係爸爸做，客人前期ok，到第三期就開始拖數。客人好多刁難，爸爸話『唔緊要！點都幫你執到滿意為止！』，最後滿足晒佢嘅要求，上去收尾數時，佢就鬧走我哋，話『就係唔俾！』，坦白講，蝕錢是小，但當時真係覺得屈辱。」
報價見真章 良心公司遇良心客
但裝修界如此之大，怎樣才能讓良心公司對上良心客呢？Teddy語重心長地說：「搵唔搵我做都好，我成日提醒啲客，唔好只係睇價錢，有時真係一分錢一分貨，點解有啲公司咁鬼貴，可能人哋服務同質素好。」
「始終係你嘅屋企嚟，唔好揀最平，要揀就揀間
裝修報價單清晰嘅，至少你睇得出佢有心報俾你。」
從不偷步 根基結實
Teddy為人誠實，總相信凡事要一步步進行，不能偷步。「返香港後再返讀室內設計，有個老師教嘅今時今日都用得返。佢話不論工程大定細，都要從基礎開始，循序漸進。起屋都係由地起上去，唔會由上面起返落嚟！」
「唔好強行做，唔好調亂次序，都唔可以偷雞玩花樣。我做統籌，頭腦同思路要清晰，要確保自己班師傅一步步去完成工程。」Teddy身為統籌，享受從冇到有，一手一腳搭建家居的過程。
先耹聽 後建議
管理一家有30多年歷史的裝修工程公司，Teddy從父親身上學到不少。「係爸爸身上學到最重要真係溝通。生意成唔成事，真係睇你令個客舒唔舒服，令佢知道你真係會好比心機裝修佢嘅屋企。」，「同埋要先耹聽，要仔細聽晒個客講咩先好下判斷，再俾專業意見佢，一步步進行溝通，唔急得。」
本著誠信與踏實，Teddy的公司得到不少客人的信任，他的下個目標是更有規模的運行家居市場，同時繼續開源，接觸不同地區和種類的裝修，希望把這份認真的態度傳承下去。
