跟親友入行是不少裝修佬的起頭，但從中找到由心底熱愛的理由，曾生可說是區區之眾。曾生訪問初時略顯緊張，笑言自己「唔識講嘢」，但隨著裝修話題展開，他侃侃而談，道出一個又一個裝修故事，流露著對裝修的熱愛。
學裝修如習武
入行三十年，跟阿哥學師作為起步做木工鬥木，不過他小時竟不愛木工鬥木。
「細個唔喜歡，因為當時學鬥木，佢地仲喺現場造，學師仔梗係要招呼好啲師傅做野，所以好多好多下欄嘢做。」工藝如練武，少年曾生與一堆雜活練習為伴，一邊訓練基本功，一邊觀察師傅的技藝。
「我學師嗰時師傅都係跟則樓做，則樓俾張三視圖紙（立面圖），睇三視圖要自己係腦入面將佢轉換成一個立體嘅櫃。見到啲好叻嘅師傅，拎住張圖望十分鐘，就可以放低圖紙，跟住就去開料，記憶力好強！」
見識到師傅厲害之處，少年曾生當然試著參透。「之後我睇得多啦，咪自己嘗試下開，原來真係好難。然後我自己諗咗個方法，因為以前讀機械，我就嘗試喺屋企將嗰啲三視圖變返一啲傢俬圖咁，轉返自己熟習嘅模式去做就做到啦。原來，我可以用自己嘅方法去解決一啲事。」工藝從反覆嘗試之中習得，邊做邊學的過程讓曾生明白解決裝修疑難的滿足感。拿起那將三視圖開始，對裝修的熱愛，就是一生。
裝修工程尺寸尤其重要 鬥木工藝助裝修思前想後
轉眼間三十年過去，少年曾生已是位老練的師傅。他憶想做木工的前半生生涯讓他掌握不少裝修的技巧，當中對尺寸的敏感度尤其重要。
「而家範範都識，但最喜歡都係鬥木。我哋做鬥木要對尺寸好敏感，呢樣好緊要，專木工，做起其他嘢上嚟一定會較為易上手啲同快手，解決問題都輕鬆啲。」
「其他範疇嘅師傅都會拎尺，但木工師傅會較為會專業啲，因為做木工多數係做配合嘅角色。做一個櫃，做完之後仲有好多裝修工序跟你尾，跟住你個櫃去做嘢，電燈啊、水喉啊，咁你就要喺做櫃前因應現場情況去作出變動。」
「例如經常要遷就櫃裡面啲插蘇位，水喉啊，呢啲係工程成日出現嘅問題。就要睇你做櫃嗰時，同電燈水喉夾得好唔好。唔得只諗個櫃做得靚唔靚，好多嘢要諗要顧。」
向則樓學習 交代清晰細緻免意外
曾生現有自己的公司，努力帶更好的裝修工藝給予客戶。他說要為客人帶來更好的服務，則樓就是他這方面的「師傅」。
「我做咗判頭差唔多都十年，主要都係做則樓嘅Job，因為則樓做嘢嘅方式同流程夠嚴謹，要我哋跟足圖紙做好佢，呢樣好值得學習，我而家都似用呢套做法。」
曾生翻閱他手中的圖紙，清晰仔細。「做圖紙就係要樣樣都清清楚楚。未做嗰件嘢之前我會同designer睇晒啲圖紙有冇問題，傾完先會開工做件傢俬。其實做窗、做瓦仔，做咩都好，都會畫圖紙俾客過目，解釋過明晒先動工。」
「跟住就係現場彈墨，牆身都照彈墨，彈得清清楚楚，啲插蘇位啊，全部仔細嘅位置都要俾個客知道，就可以避免有咩爭執。裝修有意外係必然嘅，而圖紙同彈墨就係盡力減低意外嘅其中一個方法。」
裝修盛載客人大半生
工藝之複雜裝修客人未必全面了解，曾生回歸簡單道理，道出了貼地的初心。「以後會安排自己抽離啲，盡可能唔會落太多手，因為做管理就要宏觀啲睇，咁樣先可以提高質素。」
「因為客始終係俾咗錢出嚟做裝修，客人黎講佢地出錢裝修一間屋，住嘅係講緊差唔多半世人，你要對得住個客，等佢可以住得有質素有水準，要襟用啲，咁先可以嘛！」
裝修盛載著曾生的大半生，家居同樣盛載著住戶的大半生，豈能看輕？曾生以謙虛，以實力，以嚴謹看待每一個工程，正是一個練武之人的態度。
想裝修屋企/維修家居？登記「裝修佬」
免費裝修報價，24小時內專人回覆，為你推介最適合你的裝修公司。
