「當初入則樓做學師仔，因為自己對設計有好大興趣，係則樓主要畫圖入則為主，落地盤同接觸客人較少，個感覺好似冇咁實在。則樓分工好細，好多部門，3D就3D，做效果就效果，施工圖就施工圖，你係一細部份，出到嚟大樓設計係人哋嘅。」
「但自己做一個單位，客人同你face to face，出圖確認再自己做，真係自己follow up晒。」
Jacky親身掌控一個單位的建造，項目繁多也不假手於人。Jacky曾安排判頭處理工程，結果發現還是自己監管比較好，盡力自己精心安排，結集一班自己信任的師傅，為了把成品質素提高。
除了師傅的質素，Jacky於設計上也從不馬虎。明白香港家居空間較小，他的設計盡可能想為這些家居帶來空間感，所以都從結構入手，提供多個方案，最重要合客人心意
「我哋設計都會拆一啲牆身令到單位空間感可以提升，客人通常會好有驚喜，『原來可以咁改！』，但如果單位好多結構牆嘅時候，即係梗局啦，我哋就會盡力，好似捏下massage咁，捏下捏下捏出三五七個option客人都唔奇㗎！」
另一方面，則樓出身的Jacky，則師十多年的經驗中，畫施工圖讓他發現裝修細節，並將其帶入家居裝修。
「畫得多施工圖，你就會知有好多施工細節冇乜人留意，好似一個層板櫃我會設計到層板邊凹少少，咁一定好睇嘅，因為你個駁口會見到係退入去。好多人唔理或者冇留意，但設計上呢啲細節，樣樣都唔係咁fit，加埋加埋嘅時候，其實好影響觀感同使用，所以我哋會喺傢俬上用心設計呢啲細節。」
「可能起大樓，大建築，細緻位冇乜人留意，大家唔會停留太耐，但家居住客會睇到好仔細，因為日日對住。」
「所以要喺畫圖嘅時候就諗多啲，做到就會令視覺上舒服好多。同埋到施工層面，師傅動手做會順好多，唔會望住幅圖諗根本做唔到啊，難做啊，變相其實係減低咗時間成本。」
Jacky嚴謹對待每一個單位，視客人的單位是自己的示範單位，是最實際的向外界展示自己實力的機會。
「每個單位，我覺得都係放喺客人度嘅show flat嚟。客人拎錢出嚟，我哋公司幫佢起間靚屋，然後客人嘅朋友探訪嘅時候，我哋嘅裝修就變左係一個showroom。俾錢你賺，提供地方同機會俾你賣廣告，點可以唔做好佢？要求點可以低？」
要完成優秀的設計，Jacky從不馬虎，詳細了解客人真正需要才開始設計。「一定會問客人方唔方便我上佢舊居睇，要了解每個客人嘅習性，現況，要諗點樣將佢嘅習慣融入新居。」
「例如廚房原本有好多裝修後先購入嘅電器，令佢只可以放檯面，變相感覺好唔整齊，新居設計就要安排好位俾佢放置得整齊同靚，因為你唔諗，到時裝修完，都係擺到亂晒，客人朋友嚟嘅時候就觀感唔好，會諗『點解你有明明有設計，點解都用得咁唔方便，咁亂？』。」
到開始設計，Jacky面對搜集得來的資料與自己的靈感所設計出來的成品，也不是輕易能過自己的標準，還要好好為設計評分。「你諗個設計圖，當然要第一時間自己都覺得掂先，先可以俾個客睇。設計啲自己嘅美感唔認同嘅嘢，人哋都唔會buy你啦。」
「自己評左自己個設計幾多分先，基本你俾得客睇，至少個設計你自己評分都要有……九十幾分啦！咁先可以KO到佢㗎嘛！」
九十分從不是易事，嚴謹的Jacky從不看輕每個設計。要先對自己有高標準的要求，設計才會好，繼而成品才會變成更好的展示。
