讀工商管理最後投身裝修設計行業的Mike談吐得宜，帶著一種爽朗和充滿活力的氣息，原來他早在十幾歲時已接觸裝修行業。
「其實都幾陰差陽錯入咗呢行。細個十幾歲做parttime，就係地盤同餐廳入面幫人裝傢俬，覺得裝傢俬原來咁得意，同埋識咗呢班朋友，結果讀完書真係去做。」
「後來大家見到我都讀過下書，覺得我唔應該停係落手做嘅層面，不如去做下設計，做下管理，咁我都係讀相關科目，進修工程設計同時又喺則樓公司度做PM，一直咁行，儲夠經驗，就自己出嚟做。」
建材日新月異 保持對裝修的好奇心
屈指一算Mike在裝修行業十年，十年不是一段短時間，因此裝修設計必須是Mike喜歡的，從中感受到樂趣才能如此堅持下去。
「其實工程工序上十幾年都真係差唔多，例如以前做匯豐銀行，匯豐總行三十年前起出嚟，同我哋而家起出嚟嘅樓做法設計都係大同小異，做得多就能夠熟能生巧，但最大分別，最令人驚歎嘅位係物料。」
「例如早五六年前唔會有水泥特色牆，又例如出咗藝術油漆，印落去有唔同圖案。物料嘅技術真係發展得好快，令到家居設計變得係美觀同質量上不斷有進步，有新鮮嘢。」
五金配件提升生活質素 致力為客人提供最新最正物料
物料的千變萬化日新月異，令Mike對裝修行業充滿驚喜，他認為特別是五金配件的進步能提升人們家居的生活質素。「例如而家好hit嘅電動升降檯，油壓床又可以係電動嘅，真係每個月都有新嘢。」
「我成日會去外國網站或者唔同建材公司供應商，去睇下新嘅五金配件，例如有客人想做趟門但又想係暗門嚟㗎喎，咁上網睇下，啊，原來德國出咗啲新嘅路軌係啱用㗎，又例如有好多反床、可摺式飯檯嘅五金配件大把嘢發掘。」
「成日上網睇呢啲五金配件想介紹俾客人，就算喺外國見到，香港冇得買，都會send個email問下，如果寄過黎要幾錢，或者個配件會唔會有教學睇返點樣安裝。想帶多啲又新又正嘅俾戶主。」
一般戶主未必能了解五金的重要性和細節，但它的力量卻是非常大，好好利用就能提升生活美感與質素，而Mike就致力把其美好發揮於客人的家居及傢俬裡。
「有啲客人唔喜歡設計上有咁多特別嘢咁花巧，我哋就可以喺五金配件上面花心思，用五金去凸顯設計感，唔好睇少佢，其實呢樣嘢係俾到好多空間我哋發揮。」
「好多五金配件圖型其實好特別，例如見到凸出嚟個圖型好靚嘅，咁我哋就會選購呢啲，單係一個配件就可以令成個櫃有唔同配搭，唔單調。」
「又例如凹入去手抽，例如好簡單一隻全高嘅門，唔洗下下都係凸出嚟嘅手把，揀個凹入去嘅，留返20mm，你就可以涉隻手入去拉門，又靚又慳位，又唔怕撞到其他地方。」
設計講求平衡 大方向與小細節互相配合
非常著重細節的Mike認為設計的方向由客人角度出發，如何展現就由他操刀，細節是其中一樣展現的方法。
「有一啲好強勢設計師，好想完全地show到佢哋嘅設計，但呢個唔係我風格。我覺得要平衡客人喜好，跟據佢嘅思路同喜好方向，然後設計一啲你認為啱用，特別為佢訂製嘅設計。細節上一定要有設計，有啲更改，唔好咁常規，咁就可以凸顯到自己嘅風格同時又唔會違背客人意願。」
Mike所指的細節都是一些一般裝修戶主不太會留意的項目，而Mike藉著他對物料的好奇心與施工經驗，配搭出著以細節呈現設計感的方案。
「我其實好喜歡傢俬設計，除咗傢俬可以做到啲特別嘅形狀，或者門上面可以落一啲裝飾，條紋條子或者花線，花線可以有三個面、五個面，或者一個平面再變三個面，好多款，咁我地就會客人未必好知道嘅細節位度做更換，我哋就好注重呢啲。」
家居裝修見證人生百態 好工程速進家庭關係
家居裝修十年，Mike見證了不少人生百態，深切明白家居其重要性，足以引致家庭關係的成長或衰落，而身為做設計與管理工程的Mike認為他的身份也能為此出一份力。
「見過有夫婦因為裝修而鬧交，又見過男女戶主因為設計上嘅爭執差唔多要打交，爭執嗰時覺得大家唔適合，結果一發不可收拾。見過唔少多人家庭為裝修上嘅事爭執，所以協調真係好重要，而我應該用嘅身份同經驗去協調。」
「我哋要了解清楚客人各自有乜需求，將佢哋想要嘅嘢分開一個個部份，然後建議一人負責一部份，例如房同廚房就女戶主搞，個廳同洗手間就男戶主設計，咁我哋就會將兩個唔同嘅idea結合，令到紛爭會少啲。」
「『不如咁啦，佢咁關注個廚房，你又都唔點入個廚房，其實咪由個女戶主去設計囉。』廳同廚房點樣過渡，顏色方面就我哋會幫佢地去配合啦，或者諗下點將嗰啲唔同嘅元素結合咗佢。」Mike在中間協調過渡，互相遷就配合的戶主，才能共建完善舒適的家。
裝修疑難不斷 關關難過關關過
家庭協調的工作也在Mike的掌握中，他明言裝修本身就是一樣不斷解難的工作。例如面對客人不理解技術層面的困難處，Mike不斷地反覆嘗試多個方案，直到成功。
「有客人要將白色雲石，同鋼琴黑既麻石拼埋，拼落去嘅時候要求好細條30mm闊，但因為密度唔同好難做到，一鎅雲石就會斷，我哋就用一件人造石放底令厚度增加，我哋切割就唔會斷。」
「裝修就係不斷解決問題，不斷用腦，乜都要試要做。做到最好先可以交貨。」無論是對建材的熱衷研究、對設計平衡細節與客人喜好、對協調客人對家居的要求、對工程施工的疑難解斷，Mike十年仍全力以赴。
案例欣賞：
想裝修屋企/維修家居？登記「裝修佬」
免費裝修報價，24小時內專人回覆，為你推介最適合你的裝修公司。
