所謂青春無敵，
裝修界正湧入一股充滿幹勁的新血，阿民正是其中一份子。年紀輕輕的阿民由學師起步，現已搖身一變成了管理裝修工程的一員，憑的是年輕人的活力和不怕刻苦且踏實的身驅和智慧。
阿民曾是酒店廚師，之前未有發現，唯有一次女友親人出意外，想用時間照顧卻無法於工作中抽身，他才反思飲食業困身之處。為了可以顧及更多方面，無論是家人朋友還是事業，他毅然走入裝修行。
你可能會問，裝修不困身嗎？生活於網絡流通發達世界的阿民並不這麼認為：「呢個就係現代年輕人嘅好，而家有手機，隨時隨地都可以跟進工程進度，24小時覆客都得，仲有可以隨時留意裝修界建材動向，外國有乜新建材啊近期人哋搞緊乜都可以知道。」
細心照顧客人所需 為求減輕客人憂慮
阿民靈活安排時間行程，奔走於不同工地、公司和建材舖之間，他與他的拍檔互相補足，每期工程可接十單之多，工程卻從不馬虎，非常耐心照顧每個客人需要，毫不介意花費時間精神。
「最成功嗰次經歷，由客人未收樓就開始同佢傾，傾足四個月，前前後後出咗八九份圖，報價單出過六七份，我覺得客同我好夾，好希望佢信任我哋，結果佢真係同我哋簽單，付出時間長，但下就覺得付出係有回報，乜都值。」
「一定要花時間覆客，其實一個客人要花咁多錢落去裝修，真係希望佢成個過程，唔會有咩任何憂慮，有啲疑心位。」
「咁我有工程經驗，所以客人問乜，我都一定會答，完全唔介意不斷講解，或者俾我哋案例佢睇。由客人本身唔係好信你，對你冇乜信心，經過解釋，之後就好信任你，呢個過程係好滿足。」
「只係想愈做愈好。報價單都改格式，要更加容易睇同清晰度再多啲，工程簽單之前我哋都會同客人rerun一次報價單，等客人可以逐個逐個問題問清楚晒我哋先簽。你好想知嘅，我會唔介意花好多時間去傾，傾實晒清晰晒先，就算客嫌我煩，我都會話『冇嘢穩陣得過穩陣』，哈哈！」
認真仔細的阿民付出無限的努力，換來客人的信任，無礙是最大的強心針，讓他更用心去處理工程。
敢於突破 致力為客人帶來最新最靚最實用建材
年輕人除了滿腔熱血，敢於突破，新意多多也是他們的優勢。「我好喜歡願意試新元素嘅客人，我哋公司主打三十幾歲後生仔市場，希望以一啲實惠嘅價格整到佢哋想要嘅嘢，所以報價單平面圖都係免費，然後錢用喺試新穎嘅嘢度。」
「試下多啲智能家居，我好密切留意啲新嘢，有時唔單只係靚同方便生活，仲可以慳錢。例如市面上有款新式啲嘅電掣面，可以令全屋做少啲電位，變相其實價錢反而會平咗，見到呢啲好嘢，就會想sell俾客人用。」
「仲有藝術漆，特色牆唔同紋路嘅物料，呢啲新穎嘢，一來我研究建材有得增廣見聞，有得試有得學，二來我覺得要進步，裝修呢行會進步，唔再只係老師傅，都有年輕人嘅新idea㗎！」
為了展示他們對
室內設計風格與裝修的研究，他們籌備很久的showroom即將開幕，希望更多人可以看到他們工藝與創新。「咁我哋主打網上市場，除左案例相，仲想整一個showroom俾客人睇，入面有唔同主題分佈，做咗好多唔同嘅特色牆，同特別嘅櫃，同埋浴屏，一次過睇晒。」
發掘市場需求 推行寵物友善家居
阿民團隊有足夠裝修經驗夠之餘，敢創新並洞察先機也是他們的優點。他深明要發掘市場隱藏需求才能突圍而出。「除咗推出唔同優惠之外，我哋都有留意市場動向同需要。我哋有個理念係「發掘市場需要」，點樣可以先可以係市場上面突圍而出呢？就係要做啲市場上面冇嘅嘢。」
其中一項就是寵物友善的家居裝修。「我發現裝修市場上好少貓相關嘅裝修設計同配套，就諗不如設計寵物友善家居啦。一嚟可以配合到寵物，我自己有養貓嘅，知道貓既習性，知道點樣會方便啲舒服啲，第二，設計上例如櫃上面會有貓嘅圖案，甚至有啲步行橋。」
「令到家居整個感覺係人貓一齊住，而唔係人養咗隻貓。人養寵物同人同寵物一齊住係兩個概念嚟，個感覺都唔同，所以想家居裝修都可以配合到呢樣嘢。」過往的裝修室內設計大多都是在不同家居領域「加設」符合寵物生活的設計，但阿民卻走前一步，以人貓共住的理念出發思考家居設計，愛貓戶主必然被其吸引。
阿民公司成立一年有多，已締結不少與客人的良緣，只因他繼承傳統刻苦耐勞之餘，從不乏創新破格。裝修界年代更替，現今人才輩出，新血引入為裝修界帶來新潮流，阿民正是一個好例子。
室內設計裝修 案例欣賞：
想裝修屋企/維修家居？登記「裝修佬」
免費裝修報價，24小時內專人回覆，為你推介最適合你的裝修公司。
