裝修這門傳統行業，每一位小學師也是靠著刻苦捱出一番事業，而吳生也是由學師開始，講求踏實與真誠，歷經二十年，今日有一番成就。
當年年少氣盛的吳生，自從跟過一位好師傅，他也踏上了正軌。「以前真係學徒制，十七歲入行跟過幾位師傅都唔夾，好反叛，直到遇到一個師傅，佢比我好深刻體驗，佢覺得做裝修呢行唔係世界末日嘅話，裝修永遠冇失業。咁點解都會有啲做裝修嘅人失業，係因為佢哋唔認真對待呢一份工作。」
師傅帶領吳生從被看低的地盤電工進入住家裝修，因為住家裝修中的電力工程追求的精細，才是展現電力工程的重要性，也是更能提升電工工藝的環境。
「『人必須有一個技能，唔可以抗拒佢，係要適應佢，更加要融入使用呢個技能嘅地方，你先可以喺呢個社會生存。』佢令到我明白到，你唔能夠仲係個細路咁抗拒呢份工，你只能夠去接受。慢慢我就被開導，覺得呢個工作都唔係想象之中只係返工收工，好多時要變通，就會唔再討厭呢份工作，要認真對待裝修。」
隨著師傅的退休，脫胎換骨的吳生有了自己的事業，再不只有以前對著工地默默做。背著多年經驗在住家裝修裡，吳生更明白到誠實和溝通的重要性。「裝修好特別，係講經驗，一定係靠你一路捱同慢慢學，工藝先會精。而客人未必了解，佢哋會預想同期望自己請到嘅一定係全部「博士級」裝修師傅，想家居盡善盡美，而係一個冇對到嘴嘅情況下，佢哋就會有期望落差。」
「所以我而家做嘅管理，就係守門嘅角色。所以我每一部份都會跟到足，點都要去現場，因為睇相你永遠唔會知師傅係咪真係達到客人要求。就算係同一棟大廈，只要唔同單位裝修，唔係同一個則，佢個變化會有唔同。」
「師傅通常會使用一個最快捷，佢覺得係最合理去解決件事，但掉轉係客人既角度，係必須要依照客人嘅方式去做，而兩者並唔認識，我就係中間一條橋，依條橋係要達成到雙贏局面。作為中間呢條橋樑，你要確保到每一範都唔會錯，你係有責任可以令每一範工程完成後，交比下一手唔會有問題，下一手做得順利，流程就更好更順詳，客人又滿意。」
「客人對住嗰個就係你，冇得偷懶，要用行動俾客人感受到你中途係跟得貼，同埋認真，個客先會信你，唔可以只用把口講，講到天花龍鳳又點？裝修係講務實，係工藝。」
「要誠心老實，應賺嘅錢我會去賺你，但係我唔應該收嘅錢，我會同客講點樣可以盡量避免啲收錢嘅位置，點都一定盡量幫你慳。」吳生經常笑言自己行事是老一派，但其為人老實深得客人歡心。
裝修戶主最怕莫過於遇上爛尾，裝修公司同時仍怕接到爛尾單位，而吳生卻反其道而行，有豐厚的接手爛尾單位的經驗，擔起改善誤解的責任，致力改善裝修行業形象。
「裝修公司好多唔願意接爛尾，第一接手爛尾工程對班底要求好高，好精細，要有做開爛尾嘅經驗，第二，處理一單爛尾需要既時間係多過你重新做，但賺嘅錢唔會多咗，相對花嘅時間又多咗。」
「但我就覺得呢個係一個機會建立信任，可以多一個熟客嘅機會。好多時一個爛咗尾嘅裝修戶主會對裝修有誤解，覺得上一手嘅裝修公司都係花言巧語，所以下一個應該都唔係好人嚟。我非常明白，就好似你啱啱比條蛇咬，你又要咁快咁比第二條蛇有機會咬，好多時就會帶住唔信任同質疑，但係我好相信處理得好，呢份信任會一直持續落去。」
「前年接過一單爛尾，間屋做到一半，啲嘢半天吊，但業主忙冇辦法跟得好足，我好感謝佢非常信任我。業主已經交咗樓急住入住，得一個幾月時間緊拙，冇得所有推倒重來，一般正常派兩個電工師傅一個水喉師傅，但呢單工程就唔係咁做，派四個電工，兩個水喉，分別去搵個源頭。」
「因為電同水係埋咗入牆身，必須要由有牌同有經驗嘅師傅去負責，一個爛尾盤，最驚最煩係水電，客人交托俾你，你就唔可以得失。處理得到水電，其他都係門面可見嘅嘢，發揮我哋如常嘅水準，就好順利。呢單都係我接觸過覺得非常成功同高興嘅一次。」
面對科技資訊發達，裝修公司必需考慮營運模式的轉變，除了傳統模式，依賴熟客的轉介，裝修戶主現在也自行找尋裝修公司，加大了戶主們的主動性。
「以前客人會好信任朋友轉介嘅公司，而家佢哋多咗途徑去自己揀公司，都會知道好多裝修相關嘅資訊，但我仍然相信，經驗係可以取勝。」
「上網睇案例相片，甚至手機睇油漆顏色，總有好多唔夠細緻同失實嘅地方，例如佢哋唔會睇到相入面嘅收口位做得好唔好，客人到現場細睇就會發現，所以就算講到天花龍鳳都好，結果都係睇師傅功力，同管理嘅人點做協調，明白客人要求同協調師傅完成客人心目中所想。而我嘅師傅團隊都合作多年，有能力，所以我唔擔心行業點變，以踏實同認真嘅態度，必然可以得到客人嘅信任，必然可以帶到好嘅屋企俾佢。」
儘管行業變遷，工藝的本質從未改變，吳生二十年來仍堅持誠信和實力的重要性，以此贏取客人的信任。
想裝修屋企/維修家居？登記「裝修佬」免費裝修報價，24小時內專人回覆，為你推介最適合你的裝修公司。
