「請問一下，用牆紙貼裝飾牆及隱藏門是不是伏？有人話牆紙鋪隱藏門會披囗，師傅都認為板會靚啲。我地有考慮過用西德板，但一萬蚊好似貴左少少。比較之下，牆紙平很多呀！多謝答覆。」
究竟用牆紙、牆貼、廣告貼代替膠板，有什麼要注意的地方？有什麼優點/缺點呢？
---版主意見如下---
其實裝修呢家野，你諗到既用料，都係可以的。
但要注意兩樣野：
1. 唔同用料有唔同既優點同缺點
2. 師傅的喜好和能力
點解要考慮2.呢？睇落去就知。
先講膠板。
膠板物料上自然較耐用，唔會好似牆紙咁飛起。而且佢既好處係常見，所以師傅一定熟手。唔好處係一般會見到接駁口(如有錯，請在留言更正)，另外亦要慎選花紋。因為暗門的紋理是很難與裝飾牆「完全對花」的，導致「唔係真係咁暗」，這點可透過揀款減低問題。至於具體點揀點就，太detailed我就唔多講啦，還是問番各自師傅意見吧。
再講牆紙。
牆紙代膠板，接駁位應會冇咁覺眼，但好多戶主會擔心披口問題。門邊可以「翻埋入去」，但牆紙與牆紙之間的接駁位，就是比較難搞的。其中一個可以考慮的解決方法，是用一些較特殊的牆紙，例如有硬身竹面、海棉墊面等等，它們的物料令牆紙較難彎曲，因此要佢地披口飛起並唔係咁易。至於牆紙的施工技巧，當然有關，但又不是我的角色去講了。
再講牆貼。
其實一般師傅都不太喜歡用一些平日冇用過的物料，因為要take risk。例如你叫師傅幫你貼些DIY建材，佢可能唔比你熟手，隨時出錯又未必可以得撕下貼過，真係唔知點收你錢好，所以未必想戶主咁做。
牆貼和牆紙一樣，有很多種類。選擇得宜就不會有披口的問題。但要注意三點：
第一，施工難易度。
有些牆貼是撕不掉的。一貼貼錯就玩完。師傅未必接、你也要共同承擔收貨質素的風險。版主建議盡可能避免這種選擇，除非是你自己施工而你又有天份和信心 (版主也算成功過)。
第二，牆面平滑度。
如果是廣告貼紙那種，甚至是淘寶的貼紙，有些是很薄的，個底有少少氣孔或者唔平都分分鐘現哂出黎。效果會唔靚。
第三，牆貼厚度。
有些牆貼係好厚的(好像 裝修資源中心介紹過的那種防撞牆貼)，但也有比紙更薄的，一般來說，越薄就越會有透底的問題、邊疊邊的話也會有明顯的深淺分別，會好核突的。如版友有興趣，可來裝修資源中心找我，我展示給你看看一個實體案例。
PS：無論用任何選擇，亦記得要考慮清潔保養、陽光照射、未來更換/更新時的工序。
附上兩張效果幾good的網圖俾大家參考一下~ (圖源： AnI Interiors 網頁)
---
