裝修佬話你知：清潔床褥方法
2016年10月09日
6
398306
人嘅一生會有1/3時間係床上渡過，而每晚我地瞓覺都會排出汗液，滋生螨蟲，透過床單滲入床褥當中，如果長時間唔清潔會引起皮膚痕癢、濕疹、皮炎、蕁麻疹等皮膚疾病。當然以上情況都有解決方法，究竟係點？裝修佬話你知。
去除有色飲料造成嘅污漬
使用清洗劑或醋可以減低污漬程度，大部分飲料漬可以溶於醫用酒精，但酒精同時會令污漬擴散，所以要用一塊吸水性好嘅布浸小小酒精抹，而唔係將酒精直接倒上去。清洗之後，要令床褥徹底乾透再鋪床單使用，否則會引起新嘅異味同發霉。
定期吸塵
對床褥定期吸塵，可以避免床褥潮濕後，灰塵形成污漬，而且每晚瞓覺都會滋生螨蟲，市面上有除螨吸塵機可以吸走螨蟲。
去除血漬
有睇警匪片都知，雙氧水可以去除血漬。係雙氧水發泡嘅時候，用乾淨、白色乾布抹乾便可。
裝修佬溫馨提示
發現好多朋友使用床褥嘅時候都無撕走表面塑膠包裝膜,其實係錯誤做法。因為去除包裝膜可以令床墊內部通風，保持乾爽而避免受潮。如果擔心床褥會容易污糟，可以係去掉包裝膜之後，用墊或床笠套住床墊，咁樣就可以確保其長期乾爽潔淨。
定期用吸塵機清理床褥，但唔可以用水或清潔劑直接清洗。同時，要避免啱沖完涼後或流汗時直接瞓低，更唔好係床上使用電器或吸煙。床褥應該避免持續受重壓：比如唔好經常坐係床邊，咁樣會容易損壞護邊彈簧，因為床褥4個角最脆弱。唔好床褥嘅局部受力重壓，以免造成局部凹陷變形影響使用。另外唔好俾小朋友係床上跳躍，以免單點受力過大令彈簧受損。
床單一定要買易於吸汗，使用時唔好繃緊床單，以免床褥嘅通氣孔塞死，造成床褥內空氣無法流通而滋生細菌。如果唔小心將茶或咖啡等其他飲料倒洩落床，應立刻用毛巾以重壓方式用力吸乾，再用風筒吹幹。當床褥唔小心沾染污垢時，可用番鹼及清水清洗，切勿使用強酸、強鹼性嘅清潔劑，以免造成床墊褪色及受損。
床褥有小霉點時，最好用吸塵器吸淨，然後開窗等太陽光曬下，去除霉菌。如果有大面積發霉時，就應該更換新床褥了。當然，發黴同床褥本身嘅材質有關係。如果一張床褥足夠透氣、環保，咁發生霉菌嘅幾率就會非常細。因此，選擇一張健康、環保嘅床褥係消除後期呢D瑣事嘅決定因素。
床褥要定期翻轉，第一年，每兩至三個月翻轉一次，次序包括正反兩面、左右上下四邊，咁樣床褥嘅彈簧可以受力均勻，延長使用壽命。第二年頻率可略微降低，半年翻轉一次便可。
(以上圖片均來自網路，如有任何版權問題，請與本站聯絡)
