裝修佬話你知：各種被去除異味方法
2016年10月13日
8
396108
秋風起，夜晚涼陣陣嘅感覺就知道夏天就快完，差唔多係時候要出動收埋咗幾個月嘅厚被啦。但你係個櫃度拎張被出來嘅時候會發現有陣味，咁大張被又洗唔到。拎出去太陽底下曬去味係好方法，既可以殺菌、去潮、殺螨蟲仲可以去味，但其實唔係所有被都可以曬，唔同材質嘅被曬嘅時間都唔同。究竟係點曬呢？裝修佬話你知。
棉花被
棉花被應該係最普遍嘅被子。基本上比太陽曬下之後，係被身嘅被放幾袋乾燥劑，(比如平時零食袋入面嘅乾燥劑，或者日本城10蚊3包個隻), 過幾日張被正常就唔會再有異味。
纖維被
纖維被唔需要特別保養但係建議要定期攞去太陽下暴曬(曬到古天樂咁上下)，達到抗菌除濕效果。水洗、機洗都得，中性洗潔劑或洗衣粉己經可以搞掂,冇咩話要特別處理。
羊毛被
羊毛（羊羢）被係最貼身嘅被子。經過碳化、清洗、梳理嘅羊毛一般唔會有任何異味，包括羊騷味, 但係放耐咗難免會有陣怪味。如果係咁,可以試下將酒精噴係羊毛上，再將少量黃米撒上面輕輕拍打或用軟毛刷順住刷幾次，記住力度要輕，然後將羊毛被卷埋放D臭丸擺兩個月左右，羊毛上嘅騷味可隨酒精同臭丸揮發走。
羊毛被最好不好用水洗，建議乾洗，或者拎太陽下曬1個鐘即可，唔可以長時間暴曬。曬嘅時候係被上鋪塊布，避免烈日對羊毛纖維造成傷害。
羽絨被
羽絨被係最輕嘅被子。陽光充足時，可以將羽絨被拎除來曬陣，但時間唔可以太長。係室外陰涼通風位置晾2~3日，然後均勻輕拍，就會消除難聞氣味。亦可以用檸檬水噴係被度，將被放係陰涼處晾一晚，咁就可以去除被上氣味。呢個方法好簡單，但係記得最好噴，唔係灑，要噴得均勻D。
蠶絲被
放係通風處吹係一個有效方法，太陽底下曬效果會仲好，因為溫度升高會加速氣孔裡空氣替換。除咗夏天曬嘅時間唔可以太長外，其他非太陽直射嘅情況下，可以曬2個鐘，但時間唔可以過長，因為桑蠶絲係紫外線下會變脆。所以有D人經常曬蠶絲被，過咗一年發現蠶絲被越來越唔保暖，而且變薄，就係呢個原因。
(以上圖片均來自網路，如有任何版權問題，請與本站聯絡)
