鐡鍋生鏽點算好？裝修佬話你知
2016年11月14日
10
370808
鐵鍋，相信大部分家庭都會有，用鐵鍋炒出來嘅餸特別有鍋氣，特別好味，係其他炊具不能媲美嘅。但你又有無發現，個鐵鍋用咗一段時間，就會成日生鏽，而鐵鏽無及時清潔乾净，混合食物食咗落肚係會對人體有害架，究竟點算好呢？無有怕，以下裝修佬教大家鐵鍋生鏽嘅處理方法。
去除鐵銹方法
白醋、肥豬肉
先用白醋煲一陣，將鐡鏽洗走，再用清水洗乾淨，再開火燒乾個鍋，用肥豬肉，熱鍋後放落去，唔好放油，等豬肉嘅油脂一DD咁煎出來，直到用油將鍋塗滿，等豬肉望落無咩油，再加熱，熄火等佢自然冷卻，放一晚，以後就唔會生鏽了。
洗米水
浸幾個鍾嘅洗米水有弱酸性可幫助除鏽，再將洗米水煲滾，可起到填充鐵鍋毛細孔嘅作用。
油
係鍋內倒少許食用油，將鍋加熱，令熱油浸透鍋面，目的係令熱油滲透到鐵鍋嘅毛細孔，起填充同防銹作用，倒咗D油，將鍋洗乾净便可，之後一般都唔容易生鏽。
如何預防鐵鍋生鏽
洗米水防鏽，如果將菜刀、鍋鏟、鐵羹等鐵制炊具清洗乾淨後，浸入濃度高嘅洗米水中，可以防止佢地較快地生出鏽斑，因為洗米水會為其增添一層保護膜。
茶葉渣防鏽，鐵鍋受潮容易出現鏽斑，難以去除，可用裝有茶葉渣嘅紗布抹鐵鍋，就可以防止鐵鍋生鏽。
此外，每次洗鍋可以唔使太徹底，係鍋面留D油，將鐵鍋燒熱，然後倒小小油，用厨房紙抹均勻，然後熄火，第二日用嘅時候再用清水沖下便可。
裝修佬溫馨提示
一般來講，只要經常使用，鐵鍋就會唔生鏽，新鍋或一段時間唔用，鍋中留有水分就會生鏽。如果鐵鍋已經生鏽，白醋嘅方法就可以解決呢個問題。另外，鐵鍋唔適合擰來煲湯，因為長時間處於有水同高溫嘅狀態下，鐵鍋表面保護其唔生鏽嘅油層消失，所以當鐵鍋表面有輕微鏽跡嘅話都唔好用大量洗滌劑清洗，清洗之後要及時將鐵鍋擦乾。最後裝修佬提醒大家，因為鐵鍋容易生鏽嘅特性，所以唔適宜擺食物過夜。
(以上圖片均來自網路，如有任何版權問題，請與本站聯絡)
