裝修佬教你鋪地膠
2016年11月24日
21
371899
咩係地膠？地膠其實係地板膠，係以PVC為主要材料，經過加工造成嘅地板材質，亦都叫做塑膠地板。地膠係近年裝修市場上興起嘅室內裝飾材料，地膠施工方便、價格實惠、耐磨、抗菌，唔會蟲蛀、霉變、唔會變形、花款種類多、防污能力強、保養容易等，地膠咁多好處，好難唔受歡迎。咁究竟地膠要點鋪呢？以下裝修佬為大家示範鋪地膠嘅方法，一齊去文！
裝修佬係網上購入地膠一卷，佢嘅尺寸係2米嘅闊度，地膠鋪嘅方法有兩種，一種係市面上購買黃膠，黃膠係木質工藝嘅常用膠水，佢黏力強，但施工起身會較麻煩，所需時間當然會較長。另外一種簡單方法係直接用雙面膠紙，施工簡單快捷，所需時間短。
鋪地膠首先要量好房間尺寸，再手起刀落切割，注意要沿住直線切，否則邊緣位置會唔夠平整，從而影響整體效果。
注意施工前要必須保持地面乾燥、平整、潔淨，否則會影響鋪膠效果，例如翹起、鼓起等問題，翹起情況會有機會日後地膠底面會滲水、甩膠、受潮發霉等，所以一定要注意。另外，黐雙面膠只需要邊緣位置便可。
每個房間難免會有樑位同轉角位，所以係正式鋪前就要預先將邊緣位置嘅尺寸一齊切割好，施工就會方便好多，裝修佬提提大家係黐雙面膠嘅時候記得要將四邊拉直，否則會有中間鼓起情況出現。
木紋地膠嘅效果令成個空間充滿大自然感覺，散發溫暖氣息，同時亦令整體空間升級許多！
最後裝修佬溫馨提示，凡事無十全十美，地膠雖好，但始終係膠，經唔起尖銳硬物嘅折磨，所以日常保養方面要多加留意，遠離火源，咁樣就會經久耐用架啦！
