裝修佬話你知:牆紙發霉解決方法
2017年01月12日
5
382134
牆紙花款多、色彩豐富、高檔大方等好處，一直備受裝修界歡迎，但由於香港近海，長年處於潮濕狀態，會容易引起發霉問題。唔講唔知，原來牆面上嘅霉菌會對人體健康造成危害，呢D霉菌會隨空氣流動，長期接觸吸入，會引起頭痛發燒、呼吸道疾病及過敏症狀，所以絕對唔可以掉以輕心，以下裝修佬同大家分享牆紙發霉嘅解決及預防方法，一齊分享俾你身邊嘅朋友啦！
解決方法
當牆體已出現霉斑時，可用牙刷將霉漬刷走,再用軟布沾酒精輕刷,咁樣可以令牆面乾燥, 阻止霉菌滋生。
發霉面積較大，霉點較多且嚴重嘅話，將發霉牆紙撕走，然後將牆面上嘅霉點去除，（可用砂紙打磨去除，如果霉菌已深入牆就要重新批灰）再重新貼牆紙。
霉點唔大嘅話，發霉時間係2~3個月內嘅可以用濕毛巾擦霉點，將大量嘅霉菌先處理咗，然後將防霉劑噴到牆紙發黴地方，殺死牆紙上嘅黴菌，通風乾燥之後，小面積嘅霉斑基本可以消除，乾燥之後重複噴多幾次可以有效避免牆紙再次發霉。
仲有一種除霉方法就係用漂白水，但會容易刺激皮膚，所以使用時一定要戴膠手套，而且要過水，但只適用於白色牆紙，因為會漂白深色牆紙，建議用專門處理牆壁霉斑嘅除霉劑。
窗台下部有機會係外牆滲水導致發霉，一般牆面會變得鬆軟，需要將牆面剷除，重新批灰再貼牆紙。
點樣預防牆紙發霉
保持牆面乾燥
牆面必須保持乾燥，新水泥施工一般須保養20~40日，先可以進行牆紙鋪貼，裝修時要注意唔要俾牆面粉刷嘅海沙混入，海沙含鹽量高，會容易吸水分，為後期牆面帶來麻煩。細鋪新牆紙前，需要先將基層處理好，如果係舊樓翻新，牆面缺口必須填平，否則牆紙會容易鼓起。
做好事前功夫
鋪牆紙嘅時候必須注意牆紙與牆紙紙巾有無較大嘅空隙，拼花有無對齊，另外，鋪牆紙時要淋水，乾後會有一定嘅收縮，要留好伸縮位，牆面嘅收縮位要注意處理。
選擇透氣材料
目前市面上牆紙材料眾多，無紡布、木纖維、PVC、玻璃纖維、布面等，以PVC材質嘅牆紙最唔透氣，最容易將牆體排出嘅水汽焗係入面，時間耐咗就容易形成霉點。
堅持保養
適當嘅保養可以延長牆紙壽命，增強防潮功能。施工期間及施工結束後24個鐘內要關閉門窗，通風過大會造成牆紙乾燥、收縮唔均勻引起連接位裂開，鋪貼3日後再開始通風。日間應打開門窗，到夜晚要關閉，防止濕氣進入，從而影響粘貼度。
防潮處理
在天氣潮濕期間，儘量少開窗，儘量令牆壁乾爽，潮濕天氣可借助抽濕機、冷氣機、風扇，吸走牆上水分。 一旦牆體或傢俱有水汽出現，就應該立即用乾布抹。
