裝修佬話你知 : 廚具清潔方法
2017年01月17日
1
398129
廚房係烹飪美食嘅地方，但每次用完廚房都會一片狼藉，廚房用品多又雜，油膩嘅廚房成為咗眾多家庭主婦嘅煩惱。其實，唔同嘅材質有唔同嘅清潔方法，只要用啱方法，清潔就會輕鬆得多，以下裝修佬同大家分享廚具嘅清潔技巧。
玻璃器皿
長期使用嘅玻璃油瓶，瓶底會沉澱一層油垢，瓶身亦非常油膩，仲會有異味。可先係瓶內放幾塊碾碎嘅雞蛋殼，滴幾滴洗潔精，再倒少許熱水，不停咁"CHOK"，然用清水沖洗，油垢就會被清洗乾淨，或者可以用梳打粉水倒入油瓶度"CHOK"一陣，最後用熱水沖洗乾淨。
不鏽鋼製品
不鏽鋼製品用過一段時間後，表面會起一層霧狀物，導致表面發暗發黑。可用軟布沾去污粉或洗潔精抹，如果食物黐鍋，可係鍋內加水煮一陣，然後用百潔布或鋼絲球輕輕刮去，唔好用菜刀、生果刀等銳器鏟刮。
塑膠容器
塑膠容器用一段時日會黐手，可以用稀釋過嘅漂白水浸一晚，第二日用清水沖乾淨，有蓋嘅開住蓋，晾乾後就好似新嘅咁。
陶瓷餐具
將啱買返來嘅陶瓷餐具放咗白醋水中浸一陣，再倒入鍋度煮滾，可去除大部分有害物質。用過嘅陶瓷碗碟，如果太油膩唔易洗刷乾淨，可以先用熱水沖洗一次，再撒D麵粉洗刷，最後用清水沖洗，就會特別乾淨。
鋁製品
鋁鍋、鋁盆、鋁水壺用一段時間後就會變黑，可將香蕉皮、蘋果皮等果皮放係鋁製品內，加水煮滾，生果皮中嘅果酸同鋁器氧化層會發生作用，然後用清水沖洗，即可光亮如新，切忌用鋼絲球用力刷鋁製品。
鐵製品
鐵製品包括鐵鍋、鐵鏟、菜刀等，關鍵係除鏽同防鏽。每次用鐵鍋炒完餸後，用刷將鍋中油污清洗乾淨，再用抹布擦乾就唔會生鏽，如果炒餸時炒燶鍋，用刷刷唔甩，可以撒D粗鹽略炒下，然後再用刷清洗，就會發現輕鬆將鍋清潔乾淨了。鐵鏟、菜刀用完後，係表面擦一層油或用薑片擦乾，可以防鏽，如果鐵製品已經生鏽，可以用薯仔皮擦，鏽跡好快就會消除。
水垢
先把空水壺放係火度煲一陣，當水壺煲到無水蒸氣時，立刻浸入凍水盆中(但唔好俾水進入壺內)，被燒熱嘅壺底接觸凍水急劇收縮，水垢就會碎裂、脫落。
洗菜籃
洗菜籃嘅空隙多，清洗時先係洗菜籃中加滿水，再倒入相應比例漂白水浸一晚，就可以將附係空隙嘅細菌同污漬清洗乾淨。
(以上圖片均來自網路，如有任何版權問題，請與本站聯絡)
