裝修佬話你知：年尾大掃除攻略(二)
2017年01月19日
5
373060
大掃除三個字，相信好多朋友都覺得係一件好麻煩好頭痛嘅事，平時無勤力打掃，將所有家務堆埋一齊的確棘手。其實，打掃衛生都可以輕鬆簡單，當然你要知道佢嘅個中奧妙，以下裝修佬同大家分享大掃除攻略part 2。
實木地板
可用擰乾嘅拖布清潔，但唔建議用清潔劑，因為化學產品可能會同地板漆面產生化學反應從而損壞地板，有必要嘅話可用專用木地板蠟護理，首先徹底清潔地板並等地板完全乾燥後，將地板蠟、精油或保養液均勻噴係地板上，然後立刻用乾燥軟布順同一個方向抹，見到地板表面光亮即可。
地板或木質傢俱出現空隙
可將舊報紙剪碎，加入適量明礬，用清水煮成糊狀，用刀仔將其埋係空隙中，再抹平，等乾咗後就會非常穩陣，再塗同種顏色嘅油漆，傢俱就可以恢復本來面目。
白色傢俱表面污漬
屋企白色傢俱特別容易整污糟，只用抹布係難以抹去污痕，不妨將牙膏擠係乾淨抹布上，只需輕輕一抹，傢俱上嘅污漬便會去除，但注意用力唔可以太大，以免傷到漆面。
房間周圍角落
最難打掃嘅死角位，非常容易產生霉垢，可用舊牙刷清理刷淨，如果遇到比較頑強嘅污垢，可用牙刷加洗滌劑刷除，再用水抹乾淨，保持乾燥即可。
牆面
對於牆面嘅普通灰塵，可用雞毛掃掃走便可，而牆面鉛筆印可用擦膠擦，一般都可去除。而圓子筆印、茶漬、紅酒漬、油漬等滲透到漆面裡嘅污漬，先用濕毛巾抹污漬位，注意唔使加清潔劑，只要用清水即可。如果污漬無去除，可用毛巾加少許牙膏擦，如果仲唔得，咁代表污漬已經滲入漆面較深，只可以選擇用砂紙打磨污漬處，然後用同色嘅牆漆補刷，掩蓋污漬。
瓷磚罅黑垢
擠適量牙膏係刷度，打橫刷洗瓷磚罅，然後將蠟燭塗係罅位，先打橫塗一次，再打豎塗一次，等蠟燭嘅厚度同瓷磚厚度一樣，以後就好難再沾染上油污。
茶葉有助於除塵
由於茶葉渣可以吸附灰塵，清掃房間時，可先撒上沖泡過嘅茶葉渣，再用掃把掃乾淨便可。
粘貼式掛鉤
掛鉤雖然相當方便，但一要拆除時，就要大費周章，只要將加咗醋嘅棉花鋪係掛鉤四圍，幾分鐘之後，就可用一字螺絲批輕易拆除掛鉤，殘留嘅粘著劑亦可用醋清除乾淨。
紗窗清潔
將舊報紙整濕，再將濕報紙貼係紗窗背面，等五分鐘後，將紗窗上嘅報紙擰走，你會發現潮濕嘅報紙上粘滿咗紗窗上嘅灰塵污漬，慳時間又慳力。
(以上圖片均來自網路，如有任何版權問題，請與本站聯絡)
