設計名人堂 Michael 鍾意家居裝修原因?因為香港人好重視「家」呢個字

2020年05月06日
2
24587
設計名人堂 Michael 鍾意家居裝修原因?因為香港人好重視「家」呢個字

四個兄弟一齊打邊爐,竟成了今日一同追夢的好伙伴。身為公司Project Director的Michael回想召集大家開裝修設計公司的火鍋之夜,心裡盡是回憶。

「有一個本身唔識呢行,係專業咖啡師。我都有問過佢,會唔會覺得俾我「水」咗去做裝修,佢話『冇啊,沖咖啡好飲幾時都可以沖。』,冇問題㗎,到時佢做到咁上下,之後再去沖咖啡都得!」

「Designer就係我做老闆前最後一份工識嘅,我哋識咗個幾月,佢坐我隔離,傾傾下偈發現大家都係鍾意追夢嘅人嚟。機緣之下,約咗大家一齊打邊爐,講咗成晚,原來大家都好有夢想,咁不如一齊搞啦!」

娓娓道來每位好兄弟的故事的Michael,早於20出頭就追隨著家人的腳步走進了裝修界,然而他卻想以家族生意為目標,自己殺出一條新血路,與三位兄弟一同成立屬於自己的公司。

不甘被掣肘 與兄弟創立新公司

「如果話咩契機想要自己公司,就係想唔再受人掣肘。嗰時做到Project Manager,都係覺得處處被綁手綁腳。」不希望被掣肘而鼓起勇氣走出來的人並不多,Michael正是其中一。年輕人的拼勁總是能成就大事,因為他們不固步自封,有無限的想象力和實行能力。

「正常知道呢一行嘅人,年紀都係偏向50以上,我哋係最後生嗰批,俾人換血入黎嘅。我哋鍾意同返後生仔夾,就算師傅團隊都唔過四十歲,哈哈。因為好溝通,大家都係同一代。而且好肯接受新思維,唔會想自己做落一套得,就keep住咁做廿幾年,我想帶多啲新嘢俾客。」

現代思維融入裝修服務

不要覺得年輕人的經驗欠缺,Michael視裝修工程是一種服務,多年的project management經驗,完善的配套與服務態度令他們從多個裝修工程公司中突圍而出。

「我哋project management做得比較好,以program形式去做。我哋會定時定後做報告,以%嚟顯示進度,而家差啲乜嘢,下次我哋開會會傾啲乜嘢議題。講真,客人俾得舊錢你,除左間屋裝得靚之餘,其實都想要一個好嘅服務。」

港人珍重之物——「家」

講到最愛的工程項目,四人不約而同覺得家居裝修是他們的最愛。「因為對香港人黎講「home」呢個字好緊要,特別我哋渴望自己有一個屋企嘅時候,會好珍惜。呢樣我覺得好緊要,好想自己有份建造嘅「家」可以成為他人嘅寶物。」

做管理是細心的訓練

細心是Michael認為Project Director的必要條件。「做管理,就係以宏觀角度去睇件事嘅人。但睇得夠大同時要睇得夠細,因為每一樣大大小小嘅嘢都會影響成個flow嘅行法。我以前比較粗心大意,做得多之後就發覺,細節嘅重要性。例如喺個客平時小小行為喜好,其實好影響個design要點設計先得到客人認可。」

「佢哋做之前,我會睇定,推斷會發生咩問題,預防出錯。」管理要站在團隊的最前線,以預示的能力去化解問題。

追夢之路 任重道遠

追夢的過程風浪從來不少,除了曾經開初資金缺乏所捱過的難關,更是難免與兄弟有過一次大爭執,但猶如戲般的兄弟情,Michael笑言,「冇計,做兄弟嘅真係有今生冇來世,就算有咩炒咗大獲,最後都係坐返埋一齊。」半年後一個聚舊的飯桌上,自然而然把往事抹去,結伴重新上路。

理想的藍圖不容易達成,他謙虛的說開業2年半,自己追夢的階段僅完成了10%左右,但Michael謹記他所敬重家人的人生哲學,「屋企人由細教我,凡事要有自信,讀書唔叻唔緊要,最緊要識做人處事。」以年輕人的熱情與自信,在追夢的漫漫長路上拼搏。
設計名人堂 Michael 鍾意家居裝修原因?因為香港人好重視「家」呢個字
裝修名人堂
151篇