香港設計公司 - 設計名人堂 Jason 設計要比客人走得更前引領建構貼心實用家居

2020年07月15日

35373

人生迎來第一次的裝修後，徹底改變了Jason的前路，現在他已是裝修界的一員。文武雙全的Jason有施工經驗，亦會室內設計，於設計公司香港工作，這是他十年來慢慢累積的經驗，做學師學施工、做工程助理學習協調設計師與師傅之間的問題，讀夜校學室內設計，一步一步成就今天的他。

熱情真誠對待裝修設計與實際之間取平衡

設計師不只有天馬行空，Jason就是一個好實例，他的施工經驗令他能在設計與實際之間取得平衡。「我自己親手做過，喺地盤做過。以前基本上朝早喺地盤做嘢，夜晚先有時間喺屋企畫圖，有啲人話咁嘅設計師，會限制咗一啲才華同設計空間，呢個係我覺得唯一差少少嘅地方。」

「但我設計得出嚟俾個客嘅嘢，就一定做得到。天馬行空嘅設計係好靚，但做出嚟嘅時候有機會發現係做唔到，所以最重要係拎到個平衡，而我哋做到。」

裝修工程公司與設計工程公司不同，就Jason的十年經驗，他認為設計公司要比客人走得更前。「裝修工程公司多數係聽取咗客嘅生活需求同建議，好多時偏向等客人自己決定，follow住個答案去做好佢。」

「設計工程公司就掉返轉，喺客人嘅基本需求同喜好上，篩選啲款啲顏色俾佢揀，幫佢襯色、幫佢諗設計、幫佢裝修，由我哋提供返啲選擇俾客人，由我哋帶領客人去建構一個家。」

Jason公司有大量的中小型單位經驗，口耳相傳下，他優質的服務在不同屋苑間流傳。「每個落成屋苑，通常業主都會有個群組，群組入面大家就會share唔同裝修公司嘅工程成品相。大群之外再有每座嘅細群，業主們會拎一堆案例比較，自己傾。我哋係呢啲地方接單嘅成功率都幾高嘅。」

「我記得開業冇耐，第一個屋苑荃灣尚翠苑落成，一開始做咗2，3間，一年做多咗幾個同類型case，做到去屏欣苑就做咗20-30單，之後再做麗翠苑等等都有30-40單。」Jason驚見網絡脈絡之大，同時讓樂見自己的成果能流傳於客人口中。

每對格局相同的數十個單位，Jason仍對每一個case感到新鮮。「其實每一個case都有自己嘅嘢，就算係同一間隔，但個客要求間幾多個房，揀嘅顏色都唔同。我暫時只係遇過2，3個客要copy我之前做嘅project，其他我都認為係唔同，仲係有新鮮感，仲係設計得開心。」

Jason明白客人對家的重視，積極且細心了解他們的渴求。「新落成居屋，中左嘅客都會覺得自己中咗獎。佢哋會好專注喺呢樣嘢上面，會懷住好期待嘅心，我感受得到。除咗人數限制咗幾多房之外，佢哋會喺群度拎相，同你講要呢個design，要幾多房，有冇小朋友床，呢啲單位業主都做好多資料搜集，好專注呢件事上。」

Jason希望自己能帶領伙伴和員工更上一層樓，接觸更多大型單位project，這正正是很多裝修公司面對的一大難關。「我諗過好多方法，最後都係覺得要做實事，盡量做多啲好設計，參加比賽，增加人氣，吸引多啲客，令客人信任我哋。」

上年，他們迎來了第一個獎項。「我哋舊年拎咗2019 REA室內設計大獎。當時提交咗一啲唔同類型嘅project，私樓、公屋、居屋，但冇豪宅，最後係一間公屋單位拎到大獎。」

「我哋好疑惑，受寵若驚，走去問主辦單位，其他得獎名單我哋睇過晒啲相，全部都係豪宅嚟，點解我哋公屋單位會得獎？評審話標準就base on設計、預算、尺寸評審出嚟。就算到而家都有啲半信半疑，哈哈。」

其實為一家尺數不大的家居設計，反而更要用心思，精打細算。他所得獎的單位是一個溫馨的小家居，為客人重要的家建構一個貼心且實用的設計，認真對待每個個案更是知易行難，而Jason與他的團隊做到了，並堅守這原則持續走下去。

Jason在領獎典禮，身旁全是西装革履，上台介紹自己公司的設計時的景象他至今難忘。「亦都係因為呢個project，令我哋覺得原來我哋都唔係冇得比㗎喎！」Jason相信天外有天，但他們本著細心耹聽、設計、建構家居的心，踏實地不斷往前。

如果想知道自己適合的設計風格？歡迎到裝修學院做個裝修設計心理測驗！

想裝修屋企/維修家居？登記「裝修佬」免費裝修報價，24小時內專人回覆，為你推介最適合你的裝修公司。

本文章內容及圖片均由本專欄作者提供及上載，並不代表本公司立場，如有任何版權問題，請與本公司聯絡。

關键字：裝修佬; 裝修; 故事;