裝修名人堂 Ken師傅 好心態為上 與客人共建美好家居

2020年08月19日
8
24587
裝修名人堂 Ken師傅 好心態為上 與客人共建美好家居

裝修佬是一個講求心態的專業工作,Ken師傅如是說。從16歲開似接觸水喉工程,當時仍是好玩的心態上班,誰料裝修工程成了他終身的職業。

「16歲人工200蚊,當車錢咁,就坐人哋架車走嚟走去,學下嘢遞下嘢,嗰時就望到人啲水喉點樣做,就開始接觸到水電。好玩在真係手作嚟,由冇整到有。」從破落的工地,隨著眾多裝修佬的手,成了一個又一個家居,這個過程唯有做工程的人才能深切體會。

傢俬為家居增添層次感 體現師傅細心與周全

談及最喜歡的裝修領域,Ken師傅說是傢俬。「家裝做出黎靚唔靚,最主要睇油漆同傢俬。傢俬令家居多嘢睇,協調到間屋嘅話係會為家居帶嚟層次感,做出嚟嘅滿足感好大。」

一般人會看到家具的美觀,裝修師傅則要看到更多。「要做件好傢俬,無論咩形式,最緊要都係現場尺寸。」

「度準晒,現場再裝嵌就快。唔會去到現場要改,斬到個櫃爛晒嚟改,咁唔靚。要考慮埋入電梯,入到電梯入到屋仲要入到房,做得耐就知道尺寸好重要。係設計嘅時候,交俾廠整之前就要諗好晒。」傢俬的建造可說是體現了Ken師傅細心和考慮周全的性格。

好心態自然思考更多 為客戶思前想後是必要條件

「其實會唔做呢啲好睇裝修師傅既心態。」Ken師傅認為心態才是好裝修佬必備條件,因為只有好心態自然願意走多步,服務更貼心。

「心態就係想唔想做好件事。有好心態就會衍生好多諗法,例如你會唔會喺客嘅角度諗啦,你做件傢俬會唔會考慮多方面,日後維修等等。而如果你係諗住hea做,接左單嘢求其做就算嘅,慢慢就會衍生好多問題。」

「好多時啲趟門好靚,但啲人唔會諗日後維修。日後度門塌咗推唔到,就要鎅天花鎅門先拎到出嚟維修,其實拎得出嚟都要重新做過隻。呢啲就係佢冇去係客嗰方面諗,初初做出嚟好靚,但人哋住落幾年之後就痛苦啦!」

「如果真係想方便維修,將條路軌露出嚟,就隨時都可以執到隻門。如果唔想加個殼遮住都可以,殼要係可活動嘅。有時有啲設計師好鍾意將度門縮上假天花,唔緊要,但假天花要整返個散口,可以伸隻手入去,可以搞吊馬個配件,呢啲有做到嘅話維修就唔怕架啦。」

「裝修好多時都有小問題,出咗問題就諗方法解決,通常唔好諗晒自己嗰邊,盡量就晒雙方。」作為裝修師傅不卑不亢地為事情著想,才是應有態度。

不懼怕接手爛尾工程 重建客人對裝修界信任

令業主最頭痛的莫過於爛尾工程,對裝修師傅師傅失去了信任同時又要找新的裝修師傅執爛尾。另一方面,不少裝修師傅也不願接手爛尾單位,但Ken師傅則有不同看法。「我覺得客人遇著心態唔好嘅師傅,搞到爛尾真係好慘,所以更加要幫返佢。」

「師傅唔接其中一個原因係唔知上一手啲水電暗喉做成點。所以每次接到呢類case,我都會同客咁講:『我真係唔知上一手做成點,但我搵專業人士去check。』盡量check清楚,咁有啲咩問題同個客講返。搞得掂,佢就有返個好屋企去入住,大家都高興。」

為事情著想,顧念業主的感受。這不單是對客人的關懷,更是一種對裝修界的承擔。

溝通為上 與客人共建美好家居

客人把金錢交給一門工藝的專家,是一種莫大的信任,因為他們不懂該工藝的深度與闊度。Ken師傅明白許多客人都是人生第一次裝修,難免會無助,所以雙方都主動溝通才是正途。

「好多客都係第一次裝修,溝通過程得知佢哋唔了解,我哋會用多啲時間耐心同佢解釋,點樣襟用啲。正因為客人唔識,我哋咪就係要幫佢諗多啲,企係佢角度諗。」

「同時都要客人主動同我哋溝通,有啲客鍾意上工地睇,我就多啲陪佢睇。佢唔上嚟嘅時間,就多啲拍片影相報告。客人有問題就即時講,因為好多嘢你當時出聲好易搞,你完左工之後其實就好難搞。」

建構家居是戶主與裝修師傅共同作業,Ken師傅交出了工藝和誠意,客人花心思給予意見,大家也著緊,互相溝通配合,才能成就美好家居。

Ken師傅20多年的裝修生涯不會停止,他仍相信與承擔著裝修界。「一路做到而家,亦都會一路做落去。」

想裝修屋企/維修家居?登記「裝修佬」免費裝修報價,24小時內專人回覆,為你推介最適合你的裝修公司。
裝修名人堂 Ken師傅 好心態為上 與客人共建美好家居
裝修名人堂
151篇