裝修名人堂 Sunny 家裝底層基建為重工程講求快靚正

2020年08月26日

35371

「做師傅，要愛裝修，唔愛點都做唔好。」Sunny年輕時開始接觸水電工程，途中去過建築地盤工作，又擔當過管工，打滾二十年，滿身裝修工程技藝。最終決定自己開公司，自己親手掌控工程。

家裝底層基建為重

凡事看內在，裝修亦如是。除了表面美觀之餘，底層的基本水電，防水及設計也是Sunny著重的事。「做商鋪係幫佢著衫化妝，做家裝係由內到外美化佢，好唔同。」Sunny多番提醒，家居裝修工程從來不只有表面，客人看不到的地方，就要由師傅把關。

「暗藏嘅嘢都要小心，我哋水、電、防水都做到好足，因為一出錯就好大鑊。客人唔明要問，我哋都有責任要解釋俾佢聽，好處壞處都講，等客人可以作出選擇。唔睇實啲，到時漏落下面仲麻煩，新樓舊樓都一樣！」

有時設計圖與實際效果不同有可能來自對實際考慮的不足，所以Sunny早年自己開辦室內設計公司，以自己的施工經驗，配合畫圖能力服務客人。「有時唔可以只係睇幅設計圖幾靚，其實工程有好多實際考慮，例如整燈糟有冇諗冷氣位？冇嘅話，風喉位就要避嚟避去，辛苦師傅得嚟都未必做得好。」

「最好有木工底，知道手工嘢點樣先做得好，識得畫埋圖，自己畫同設計然後自己做到，包辦晒成功感係最大。」

除了根基扎實之外，裝修作為一門與時間競賽的工作，若工程進度夠快，足以展示裝修公司對時間控制的能力。Sunny最自豪的就是裝修工程做到快靚正，在極短的工期內，把師傅安排得宜，進場退場「冇甩漏」。

「知道自己啲師傅手要做幾耐，啲料幾時到，幾時進場退場，計到足。客人就可以快啲入住。」「做慣咗，對自己師傅夠熟，其實就可以計得準，只有早，唔會遲。」Sunny謙虛的言談間，仍包含著對自己的信心和對客人的負任心。

要工程進度快，也依賴師傅與客人的溝通。「有次一個Case四代同堂，分開問一人一句冇結果，我就話，不如大家坐埋一齊睇圖一齊夾，即時決定到我可以即刻開工。」Sunny喜歡與客人先同坐溝通，協助客人了解自己對家居的要求，了解清楚再動工，就更少改動，更順心。

入行二十年，面對行業轉變Sunny態度樂觀積極。「轉變其實唔係太多，主要係睇住啲建材不斷升級，日新月異。我一定會試，見到新嘢都自己買咗嚟試先，試咗就更加有信心介紹俾客。」

想裝修屋企/維修家居？登記「裝修佬」免費度尺報價服務，24小時內專人回覆，為你推介最適合你的裝修公司。

本文章內容及圖片均由本專欄作者提供及上載，並不代表本公司立場，如有任何版權問題，請與本公司聯絡。

關键字：裝修佬; 裝修; 故事;