設計名人堂 Raymond 室內設計需要分析力強與內外呼應 貼心為客人控制成本
2021年02月10日
2
28212
從小以設計為志向，Raymond早在中學已發現自己對設計的熱誠，一路走過來已三四十年。和Raymond言談間，以80年代90年代去描述不同時期的變化，可見他見盡了裝修設計行業的變遷。
「我嗰時80年代初，兩科最流行，電腦同設計，因為我鍾意畫圖，於是乎我就朝早讀設計，跟住夜晚就跟啲港大則師仔（建築師），幫佢做功課囉。」Raymond笑笑講述小時對設計的喜愛程度，別人可能覺得是刻苦，但其實他是默默地為自己的未來鋪路。
後來移民海外，最終他回流香港扎根，跟有名的建築師學習設計的技巧，走入室內設計行業，走過90年代的金融風暴，到現今有自己公司已二十年。走過多少風波，每刻也是堅持和學習。「疫情好多行家話頂得好辛苦，除非轉行㗎啦，否則都要照頂架啦。我哋係適者生存，力爭上游，正如我師傅話齋，做到老學到老，唔會放棄。」
設計需分析力強與內外呼應 貼心為客人控制成本
Raymond為人踏實直接，除了人生經歷外，在管理裝修設計工程上也能體現。「我鍾意同客人現場傾，上嚟寫字樓傾可以傾到嘅唔多，要直接去嗰個地方傾，因為客人其實好需要好實在地睇到先會想象到，現場可以指俾你聽講想法，我又可以即刻覆尺。」
事事為客人著想，Raymond知道香港住宅設計講求實用，以自己的分析力，為客人度身訂造適合他們又實用的家居。「其實everyone is a designer，乜嘢係靚各花入各眼，所以我哋要做嘅係分析同轉化。」
「個客坐低，就可以開始了解佢性格，由佢嘅衣著，到有冇乜宗教信仰等等，好多野要睇要了解。每個人個性唔同，所以佢既意見好緊要，你要分析下佢適唔適合呢啲idea。我會保持心境young啲，咁通常啲客同我傾十分鐘，就肯同我講佢內心期望乜嘢。」
「當你知道客人需要乜，喜歡乜嘢，跟住就到我哋做轉化，要符合設計元素，色彩學最重要，加埋人體工學再配合黃金比例，所有都要有條理，唔係隨便嚟。」
「仲要做study，以前跟建築師，我要睇本身個環境，個歷史，翻查好多歷史資料。如果單純裝修，只係收集客人資料，做安排嘅服務，但設計唔可以咁，要考慮客人住嘅地方，同個客講返佢本身對住個乜環境呢，例如對山對海或好多屋嘅，你就要喺色彩學燈光各方面配合㗎，要做到內外呼應。」
「然後仲要控制成本，有時客人想要一啲高雅又感覺名貴嘅嘢，預算有限以為做唔到，其實好平㗎咋！我哋會不斷發掘同接觸好多供應商，了解建材新資訊，諗下點幫你平平地咁整靚整好佢，幫你控制成本，計好條數。」
「咁用心，因為住宅日日都對住，所以一定要做好，做得適合佢。有好多嘢要考慮，呢個都係設計住宅有趣玩味之處啊！」
親力親為盡顯耐心 良好關係從此建立
在管理工程方面，Raymond也從不馬虎，別看他文質彬彬，為求達盡快完成得到客人要求，甚至落手落腳，親力親為，此舉也讓他結下了不少好客源。
「記得有次印象好深刻，裝修完，客人想加個地庫，我哋用咗十日時間挖通佢，真係全手動挖，我有份做，一食完飯就挖，朋友話我傻嘅，哈哈！但應承得就要做得到，幾辛苦都係。最後完成得到，客人滿意，跟住都介紹咗六單job俾我！」
整個工程的管理，其中一大部份就是管理好師傅，Raymond認真對待員工，員工自然更落力工作，得益的其實是所有人。「做裝修工程管理，首先當然係安全第一，我實買晒保險，放心。」
「然後要有耐心同師傅溝通，正確有禮咁同師傅交待客人想要啲乜，耐心觀察師傅達唔達標。當然，有時工程有甩漏錯手其實係必然，我會教啲師傅要即刻出聲，即時補救，咁先啱。」
「再者就係唔拖得，對客對師傅都係。師傅都肯同我做嘢，佢哋講過『阿關，你係全香港出糧最快嘅人』，我唔會拖佢哋。同理，應承得客人就要做到。關係要咁先建立到。」
盡心服務客人 是責任 是緣份
八十年代開始，走到今日，熱誠從未退卻。「我唔會放棄，我會做到退休，我呢啲辛苦命嚟，我係服務人嘅人嚟。心態同態度好緊要，當你當個project係你自己嘅，你當單位係你自己嘅，係你自用，就唔會唔計較咁多。」
「我覺得緣份都好緊要，個客咁多間裝修設計公司，佢都想搵我呢間，我點都要同完成佢。」曾答應的承諾，Raymond定全力完成你的美好家居，因為這是責任，這是緣份。
想裝修屋企/維修家居？登記「裝修佬」免費裝修報價，24小時內專人回覆，為你推介最適合你的裝修公司。
