設計名人堂 Figo 裝修工程承諾為大 裝修前後 家居內外給予100分關注
2021年03月03日
0
36225
Figo從建築設計學科出身，對大型建築有深入理解的他卻投身室內設計和家居裝修的行業。從宏偉的大廈建築走入精美的家居裝修，Figo認為建築設計與室內設計有不少共通之處。
「建築設計呢科包含嘅嘢，就唔只係建築物嘅外型，個建築入面點樣設計到每個人都用得舒服同符合人嘅生活，都可以套落我哋家居裝修嘅理念入面。有時建築設計會考量嘅嘢甚至會比室內設計更加多。」
「建築佢考慮嘅可能唔止係生活，室內設計就可能重視個idea或者物料上嘅認用，而建築就要考慮呢啲物料到底合唔合理咁喺呢間屋入面出現，又或者通風，再引伸啱唔啱法例，啱唔啱一個人嘅使用，因為由你一踏入呢個建築物開始，其實入面都係我哋做設計要諗嘅嘢。」
家裝根基扎實最緊要
從步入大廈再走入家居，Figo對於細節的考慮一點也沒有馬虎，從他對裝修根基的重視就知道了。原來Figo第一份工作就是在泥水公司，自然養成了非常重視泥水工程的習慣。
「我成日都同啲客講，泥水之前你哋鍾意點改都冇所謂，我滿足到你，但就到鋪磚嗰刻就已經定實。」
「泥水係其中一樣最難改嘅嘢，因為泥水第一手做，一次過鋪就最靚，哪怕只係得一件有問題，我就算真係鎅出嚟再做，永遠做唔到第一手嘅狀況，所以呢樣嘢喺我哋眼中係冇得改嘅情況，萬一真係有呢個情況就算我地肯做，個客都唔會喜歡，都唔會係原本嘅效果，所以我哋特別著重。」
為了能讓根基打得好，Figo特意選用一班非常有經驗豐富的師傅，同時一般裝修戶主認為做管理的人大多只會到工地「望兩眼」就離開，但Figo對泥水工程的重視，使他花更多時間去監管。
「例如工序啱唔啱，沙落得足唔足，鋪得夠平唔平，我自己一定會睇得好緊，唔可以有甩漏。」因此至今，Figo所管理的泥水工程從沒過失。
為戶主建造獨出心裁特色牆
根基「打得好」，就到室內設計。Figo同樣有設計師的眼光，他喜歡遊走於不同示範單位和大型商場之中，吸收各種有別於一般裝修的設計概念引入家中，只為帶給客人一個驚喜。
「我特別喜歡特色牆。特色牆係一間屋嘅點綴，而家傢俬流行生態板，一般上下限已經冇以前嗰分野咁大，甚至而家冇一啲好大嘅細節，根本冇辦法展示到間屋嘅特色。而特色牆就可以，融合客人喜好，加入多方面嘅物料應用。又可以令人一入間屋，都可以有一個聚焦點，有一個睇頭。」
「例如會留意到商場會用假植物做特色牆，或者加水元素，哪怕佢未必真係水，可能係做一個水嘅意景，果嗰我覺得擺喺間屋其實幾適合，或者用一啲深色鏡，反光物料相對油漆嚟講，可以令個空間感覺冇咁壓逼。」
Figo憶起大埔明雅苑的一個案例，他為喜歡日本的客人設計了一幅帶有日式溫泉旅館氛圍的特色牆，客人一見非常驚喜。「一般特色牆常見做油漆，我會同客講其實可以用好多其他物料整，可以用木、鏡、不鏽鋼，或者做拼花等等。有時客人未必有idea，到真實做咗出嚟，佢哋會嘩一聲，佢哋滿足，我見到佢哋嘅表情我都好滿足。」
承諾為大 裝修前後 家居內外給予100分關注
Figo致力為客人設計更美更好的家居，其實來自一種承擔。「我由第一日拆客人間屋就已經要背負住要幫客人間屋還原返，仲要靚過之前。我自己對承諾比較著重，我會覺得應承咗個客我一定要做得返，仲要好過佢以前，或者我喺圖紙上show到嘅idea我一定要做到。」
「裝修前同後冇嘢唔關我哋事，我建築出身做協調位，大廈內內外外都關我事，我就將呢個理念引入家居裝修之中。」
「例如屋企外面有喉漏水，我哋都會主動同佢跟進，同個大廈協調返。又或者客人買物料，我就會同個客講，你所有物料俾咗我睇先，我會幫你諗咗先，我唔想你買一樣嘢你哋係用唔到嘅。」
在實際文件處理上，Figo為求讓客人安心，也引用了建築行業的收貨準則來讓客人在裝修上有更詳細的了解。
「始終裝修係人手嘅嘢，人手一定有瑕疵，所以我自己都會草稿返一本基本收貨嘅標準俾客人參考，而呢個收貨標準其實都係喺大型工程合約度節錄落去。例如合約方面會主張係，大型建築遲會罰錢嘅，我哋都有放喺我哋自己既工程裡面。」
「另一樣要留意嘅係報價單，我有時寧願報價客人會覺得貴而唔選擇我哋，都唔想因為客人覺得報價平入咗嚟，其實個價做唔到佢想要嘅嘢，然後不斷再後加費用，我唔喜歡咁。」
