裝修名人堂 黃師傅 師傅風範 裝修講求誠信 說到做到
2021年03月10日
0
35391
耳聞黃師傅之名，你可能會聯想起佛山黃飛鴻，正氣，大仁大義，而這位香港黃師傅，寡言，又有份平易近人的氣質，當然同樣有正氣的眉目與內在。
黃師傅多年裝修經驗，練得一手好工藝，對他來說裝修「心」為首要，用心做裝修。「有心對待客人同佢個單位，當個單位係自己屋企，心態就完全唔同。無論細節上，諗法上都好唔同。」
「有心對待客人，自然就知道要有誠信，唔會隨便吹水，話做就要做到，幫緊你幫緊你，唔係講完就算，係真係幫緊你。」
做師傅要有擔帶 細節不馬虎
黃師傅明白客人一擲千金全屋裝修，處處著緊是理所當然。所以他在細節處理從不馬虎，管控好師傅手工，在裝修後段親自出馬，執漏其間為了客人來回跑數十趟，比客人更要上心，只想把他的家每一個細節也做得完善。
「埋尾出手，傢俬收口，執漏，就算係簡單嘢都要整得好整得靚，如果條玻璃膠打得醜打得hea，咁交唔到貨㗎嘛，過到我嗰關先可以交俾個客。」
「我覺得有責任，既然呢個係我親身建造出嚟嘅家，我就應該有責任去保全佢成件事出嚟係完美嘅，令到你滿意嘅。」
然而，裝修作為工藝行業，大家也知道100單工程並不能100單都完美無瑕，當發現漏洞缺陷時，「有膊頭」才是好師傅。
「其實做我哋呢行任何人都有機會出錯，有甩漏真係無可避免，咁我哋最緊要承認責任，第一時間check清楚，清晰了解問題，再承擔責任，要面對。唔可以第一下就推卸責任先，一嚟就話唔關我事，咁個業主只會覺得你狡猾鬼崇，咁只會影響呢個行業俾人嘅觀感。」
光明正大 建立業界好形象
現在網絡流行，每人一部手機電腦，不良的裝修公司容易無所遁形。黃師傅不只有獨自在山上修行，反其道而行，善用網路力量，建立自己的youtube頻道，拍攝不同的完工案例，向大眾展示其誠信厚實。
「記得有個walk in客人同我講，佢點解最尾會選擇我哋，就係覺得我哋唔會走佬。如果一間公司有心想走佬，個老闆啲資料唔會提供比你，換個角度諗，出晒樣拍晒片，要搵我哋一啲都唔難，點會走數？行得正企得正，用youtube頻道其實係一種證明自己嘅方法，信任係會無形間提升。」
堅持信念 關關難過關關過
youtube頻道的成立來自上年開始的逆市，裝修業面對打擊，想要繼續前行，黃師傅靠的都是信念。
「真係捱，好多嘢都係講緊個信念。相信好嘅裝修係可以留喺度，如果因為生意難少少就放棄，或者即刻做其他嘢，其實損失嗰個可能就係你。」堅持信念再加上即時行動，不固步自封，不斷發掘更多客源。
堅持多年，山上山下也長年拼命努力為客人帶來美好家居的黃師傅，會否有覺得疲憊的一刻？「冇諗，因為做邊行都係辛苦㗎啦，有啲嘢冇得妥協嘅，太容易妥協，嚟緊個市場就冇你份。」
唔好怕蝕底 有真誠付出自有美好收獲
不斷真誠付出，黃師傅相信會否極泰來，經常跟同事說「唔好怕蝕底」，只要工程做得好，實事求事，回報從來不會少。「人就係要give and take，係要give咗先有得take，永遠冇得諗我拎咗先，好多時肯give就有得take，有第二單工程有得俾你take。」
