【裝修名人堂】 Kita 裝修「唔等人」 工程最緊要「快同準」
2021年04月21日
1
35370
Kita從做裝修到建築，人生不斷反覆回轉，結果還是重投裝修行業，到現在與拍檔創立自己的裝修公司，回望已是十年之久。
「誤打誤撞入咗裝修行業，做咗幾年，發覺冇乜進展，覺得自己仲後生，就試下做建築，到做咗建築發覺制肘好大，挫敗感好強，結果又返去做裝修。」
人生跌跌撞撞，對Kita來說最重要的還是在挫敗中學習。「但返去做裝修嘅時候，發現自己睇裝修成件事唔同咗。後生嘅時候會覺得裝修就係將啲嘢塞落去，有同做得靚就可以。」
「但做建築之後發現原來好多工序，你係唔可以亂嚟，所以嘢粗中都有細，細節好緊要。之前冇呢個概念，而家就知邊個行先，邊個行後，邊個跟尾，一定要咁，唔亂得。」
裝修細節環環相扣 特色設計是一整個配套
裝修細節環環相扣，影響可以很深遠，所以Kita無論在工程上和設計上都非常著重每個扣連的細節。
「其實每一環都要小心，都重要。唔係話你做完一part就可以走咗去。好簡單例子，水電做漏咗兩個掣位，到做左泥水啦，如果你話要翻手做，其實都好麻煩。同樣地，你做完泥水，我再做其他，如果泥水漏咗嘢，我第二啲嘢又做唔到，每一樣都係有關係，唔可以獨立嚟睇。」
「就算係設計部份，都有扣連。問到客人嘅喜好同需要，除咗要有條理咁問，由區域再到物料再到款式之外，要加埋我哋嘅工程經驗，話俾佢知佢哋嘅需要會扣連到乜。」
「例如客人要做特色牆，跟手會問『你有冇諗住做埋燈糟？白色燈糟？下面要洗唔洗加射燈？』，通常特色牆一定下面會加返射燈，做返個燈光效果。你唔做都得，不過件事效果就冇咁出，諗特色牆就要諗埋燈光，諗埋點同空間配合，所以其實每一樣嘢都係個配套嚟。」
裝修「唔等人」 工程最緊要「快同準」
Kita深明細節連結成與敗，他反覆提起他一次的過失，看出他常常告誡自己，從錯誤中學習。
「比起講成功例子，我反而最記得最失敗嘅例子。開公司第一單工程因為啲傢俬誤咗期，所以就延長咗兩個星期，個教訓好大，到而家幾年後都好記得。無論你成件事做得幾好，要客人等，個印象即刻就係一個叉叉。由嗰次開始就好著緊工期，因為呢樣係必須。」
「要點樣準時交貨又做得好？例如，最主要我就係設計傢俬嗰個人，理論上嚟講我係最清楚成套傢俬係點做法，所以我會落場，要話返俾啲師傅聽，呢件傢俬係邊度嘅，加快返個工程進度，唔洗佢哋花額外時間去諗去睇。自己跟得足啲。」
「一日廿四個鐘，時間呢樣野冇得呃，每日每人只可以做到咁多，面對點樣去拎得返準個期，冇花巧嘢，就係每日做多幾個鐘。每日都做多三幾個鐘，一星期落嚟即係多咗兩日時間，一個月就係多咗一個星期時間，時間就係呢度追。」
「即係為咗件事，我哋係唔介意花多啲時間同精神去做。啲嘢唔好等啦，你等得聽日，後日，有幾日可以等呢？裝修冇得等㗎。」Kita追上裝修密鑼緊鼓的工期節奏，跟緊每一個細節。
回歸初心 想客人住得開心
體會到做裝修當中的道理，懂得認真對待每一個細節，其中的樂趣也油然而生。「喜歡起貨嗰刻，起貨嗰刻你有嗰個成功感，完成到件事啦，哪怕個過程幾咁困難刻苦。唔完全因為錢，而係話，你能夠做好一件事，你個人嘅心情係唔同啲。」
「其實同初初諗法一樣，就係想幫業主快快做返間靚屋出嚟，等佢可以快啲住得開心啲。」是初心，Kita兜兜轉轉最終回歸初心，在裝修行業中再次堅定航行。
案例欣賞：
屯門山景邨：黑白簡約風室內設計
西貢日出康城：型格黑白混搭木系室內設計
想裝修屋企/維修家居？登記「裝修佬」免費裝修報價，24小時內專人回覆，為你推介最適合你的裝修公司。
