【裝修名人堂】 Wallace 對裝修熱誠不斷 仔細確認客人所需 多方案達成客人所想
2021年06月23日
2
35392
Wallace年輕有為，有豐富多種行業的經驗，曾有測量經驗，對地盤有基本認知；又有裝修配對平台經驗，對裝修戶主需求有透徹了解；及後有裝修公司經驗，聯繫一班優質師傅，繼後成立自己的公司，把其習大成，學以致用於裝修行業中已經數年。
Wallace了解到自己的優勢，也明白裝修的困難其實出於溝通不善，因此特別重視溝通。「有時客人唔識裝修，你又理解唔到佢講乜，只會不停兜圈，然後做唔啱個客想要嘅嘢。有呢啲經驗主要係好快已經可以理解到個客，好快可以知道到個客想要啲乜，之後就唔會同佢兜圈。」
工程管理是溝通橋樑 多方案達成客人心中所想
Wallace作為工程的管理人，面對師傅與客人之間難以溝通的問題，Wallace擔當起橋粱的角色，同時也從解難中得到樂趣。
「我自己最喜歡嘅其實係成個裝修過程中，同客人溝通，同佢哋傾偈了解佢哋嘅想法。」
「我呢個角色係要將師傅同客人嘅表達同理解接軌，裝修呢一行業好傅統，師傅會好專注於佢哋嘅工藝，相對唔會花咁多心力精神慢慢同客人溝通，當面對客人想做嘅嘢，同佢做開嘅嘢唔同，佢哋有機會會拒絕。」
「而我唔同，我非常享受解難，同客人傾過程入面，我會幫你諗下一啲解決方案。唔需要第一下就同個客講唔得，就算喺工程知識上係天馬行空，我可以諗一個方法，接近你嗰樣嘢，甚至我俾第二個可行同時接近你想法方案你會唔會去考慮呢？我喜歡用呢樣嘢去解決問題。」世上無難事，Wallace為了完成客人心中所想，也從萬難中找到了樂趣。
以清晰報價及優質工藝 真誠地提升客人信任
Wallace由裝修配對平台出身，觀察裝修行業的變化，一方面裝修戶主主動性提高，另一方面戶主面對自己找裝修公司，不安也會相對提高，需要多番確認公司的可信度。
「講真，一個工程幾十萬，客人當然會問，點解我要信你先？俾著我都會咁諗。加強信心嘅方法在於清晰，透明度高。我哋見面報價要好清晰，邊個項目要包啲乜唔包啲乜，一定要俾客人知咗先。唔好有鬼祟位，有地方會後加收費嘅，我哋會講清楚。」
「同埋一定要睇手工。首先，呢一班由我接觸裝修行業開始，慢慢累積嘅師傅團隊，全部嘅手工都好，我哋會提供到啲而家差唔多完工嘅單位參觀，客人上嚟望一望，見有人工開，又見到手工靚嘅，咁樣去加強佢信心。」
「做裝修，客一定格價，一定搵幾間睇，好人之常情。呢幾十萬報價嘅背後，代表公司提供緊一個乜嘢嘅質素俾你，所以客人就真係要去睇嗰件貨（完工單位）。」
仔細確認客人所需 工程自然暢通無阻
客人在人海中挑選了你，是難能可貴的合作。除了在裝修過程中不斷解難，為了確保工程萬無一失，Wallace深信在工程起初已徹底清晰地展現工程內容，先確認後動工，才會令工程暢通無阻，效率培增。
「令裝修順利，圖好重要。容易連結客人嘅想象之外，其實都幫到個工程效率。我自己做法就係一開始簽約之前我已經解釋埋俾客聽，我出埋平面圖俾客睇，解釋清楚晒先，然後有圖俾客睇，就好容易就可以想象到。」
「客人自己心目中嗰想法係點，睇到圖發現唔係咁，可以同我講：『個櫃唔係想咁喎。』，咁當下嗰刻，就已經可以搞清楚好多好多問題，免咗日後嘅誤會。」
「另一方面，清晰嘅圖都係幫到我哋。繼續做落去，多數都係用圖紙，傢俬、水電等等。例如做水電我哋有細緻嘅水電圖，冷熱水邊個位置，啲電制邊個位，我哋都會標得好清楚。」
「一嚟唔會亂，二嚟又俾客人做紀錄，倒轉頭我哋又可以做檢查，我拎住呢張圖我落到去地盤，我就即時知道我自己個師傅做得啱定錯，有冇做多，有冇做漏。」客人更清晰，自然能加強信心，把自己的家交付給Wallace與他的團隊。
協調成就效率 努力只因火不熄滅
在動工之後，就不單是面向客人，Wallace更要與師傅溝通。投身行業多年，為了讓工程效率提升，確保客人師傅有雙贏的局面，Wallace一直用心思考裝修中的道理。
「於客而言，有意見係絕對嘅，你幫到佢解決，佢就冇必要同你爭執。而師傅就要清晰俾佢接收到客人所需，指導好點做法就可以。」
「結果係我呢個把關嘅要做得好，假設師傅做咗樣嘢出嚟，唔係個客人想要嘅，個客會唔開心，倒轉，師傅要翻手做，師傅就更加唔開心，就變咗大家都喺唔開心嘅程況底下去做呢件事，加加埋埋去到最後，就會好多唔開心，所以我哋必須確認客人講嘅嘢師傳明白，然後先動工。」
「工程話長唔長，話短唔短，大家最起碼要相處三個月，當中要決定嘅項目過百項，某啲位達唔到客要求其實都真係啲細位，但影響深遠，例如師傅做落可能十分鐘嘅嘢，但拆出嚟其實要成個鐘，咁點解唔睇咗同確認咗先，然後用返嗰十分鐘去做一啲啱嘅嘢呢？」
透徹了解客人需要，清晰且多番確認後動工，再配合優秀師傅團隊，每個成功單位背後，都是靠Wallace盡全力的協調，如此費神只因火從未熄滅。
「其實我由接觸裝修到而家，心態冇轉變過。記得初初喺平台接到單，客人係好評嘅，多謝我，其實自己都好有滿足感。然後兩個盤以上都係咁，咁我就知自己嘅方法做啱。做裝修確實係多嘢做，但我都係想繼續落去。因為果團火仲喺度，好似之前咁熱情冇減退過。」
裝修室內設計案例欣賞：
想裝修屋企/維修家居？登記「裝修佬」免費裝修報價，24小時內專人回覆，為你推介最適合你的裝修公司。
