【裝修名人堂】鍾生 乘風破浪二十載 為工程全心全力
2021年07月14日
0
35392
裝修是門手藝，歷經多年工程經驗的師傅必然深得裝修戶主歡心。隨家人入行的鍾生由十幾歲起步投身裝修行業，歷經多年的工程訓練，現今已是獨當一面的裝修公司管理人。
多年的刻苦工作從沒令鍾生磨滅意志，鍾生仍表現出對裝修的喜歡及熱誠。鍾生由學師起頭，其辛酸對年輕人來說並不簡單，直到有能力自己掌控工程的全部，他坦言其滿足真的難以言語。
「開頭我乜都唔識跟師傅，一路做做做，結果到而家，可以做到由清拆開始做起，做到起貨，完成交返單位俾個客人，有客人嘅讚賞嗰個滿足感，其實真係非常非常之高。」
「三個月時間嘅努力，然後客人喜歡其實係一件好開心嘅事，就好似整一件藝術品咁。我覺得就算自己覺得自己做得幾好係都冇用，最緊要係客人認同你做法同手工係專業，先有最大成功感嘅地方。」
緊貼建材潮流 工藝水準高超
裝修工藝如創造一件藝術品般變化甚多，鍾生特別喜愛油漆，變化與細緻程度也是他著重之處。
「我覺得油漆係裝修範疇入面最千變萬化嘅，唔似泥水水電有啲固定嘅做法。而家流行全屋四圍裝燈槽，有射燈射住牆身，LED燈就照上天花，呢啲光線就會顯示到你做油漆嘅功力。」鍾生的油漆項目被多次被讚賞，客人儘管要求幾乎達到零瑕疵，鍾生說只要要花上無比的心思和時間也是能達標，可見其用心配合客人需要。
鍾生與他的團隊，每位都是裝修經驗豐富的老師傅，但他們從不固步自封，不斷找尋新建材並研究，緊貼時代變化，期望帶給客人更多最新建材選擇。
「油漆的款式亦非常多，都愈嚟愈多特色嘢，例如有隻絲絨漆。以前年代好興牆紙，牆紙多款色又靚，但因為香港潮濕其實好不利牆紙。咁既然而家新出咁多藝術油漆都有咁多款式，我盡可能都會介紹客人用。」
「以前唔覺，而家裝修行業都科技化咗好多，特別係建材。所以我哋要收集多啲新嘅市場建材資訊，成日周圍行睇下唔同國家嘅建材物料，睇下有乜啱用，又例如出面熟嘅門市，一有新資訊就會通知我哋㗎啦。收集返嚟就係同客人解釋同分析，呢啲物料對你哋有乜好處。同埋有得不斷試新嘢其實好開心，又學多樣嘢！」
乘風破浪二十載 為工程盡全力
鍾生成為判頭之後，和一眾兄弟班打拼，及後被友人賞識，邀請加盟他的裝修公司，自此他便成了公司的管理人。
鍾生的裝修公司成立已有二十載，營運多年也歷經金融海嘯，兄弟班同甘共苦，能乘風破浪營運至今，可見能刻苦用心之餘，裝修經驗必然豐富，鍾生和團隊更曾負責全港最大快餐業合作，備受客人所認同。
優質的裝修服務背後，鍾生認為成功是因為講求經驗與責任心。「首先，你同你嘅拍檔喺裝修行業要係專業嘅，客人未必好識裝修，你有經驗先可以了解得到客人嘅裝修需要係乜，同埋點樣提供到俾客人。」
「同埋責任心，對客人嘅責任、對公司伙記嘅責任。首先完美咁完成得到客人嘅要求，我先可以確保伙記有飯開，同一時間我又要保護好伙記係個安全嘅環境工作，確保佢哋質素係會令客人滿意，所有嘢都相輔相成，有關連。」
「例如有位客人想我哋搬部鋼琴上樓，搬嘢唔係我哋專長，但唔可以一句話『我哋唔搬』或者亂咁幫佢搬就算，最後係幫佢搵搬屋公司搬。」真正的責任心就是為客人設想，用最適合的方法完成客人心中所想。
溝通清晰免錯摸 持續令行業發光發亮
多年於裝修界打滾，鍾生明白客人人生裝修次數未必多，對裝修公司小心翼翼也不為過，不過鍾生深信：「疑人不用，用人不疑」，為了能讓客人於裝修過程中信任你而感安心，鍾生有如此的一番見解。
「其實做工程好多時因為大家溝通得唔夠清晰先會咁多爭執，有啲師傅可能會講：『得㗎啦！講個信字㗎嘛！』但好多時出事就係咁，冇講得清晰，但就叫客人信你做到佢要求，結果客人想象嘅嘢同師傅做出嚟嘅嘢係兩回事。」
「唔係因為師傅功力唔夠，只係冇機會俾客人講清楚佢嘅要求，所以溝通真係好重要。我哋通常都會係簽約嗰時就傾好晒，之後都繼續保持溝通，或者請客人上嚟睇我哋啲單位，呢個過程佢哋知道我哋手工之餘，我哋又可以了解返客人需要乜。」
多年公居屋、豪宅、商舖等各式各樣工程經驗，鍾生和他團隊於裝修上絕對是得心應手，靠的是一直累積下來的經驗與認真對待工程的熱誠，二十載仍未磨滅的意志，未來將會繼續發光發亮。
裝修室內設計案例欣賞：
想裝修屋企/維修家居？登記「裝修佬」免費裝修報價，24小時內專人回覆，為你推介最適合你的裝修公司。
