【裝修名人堂】 Edward 堅守承諾 為客人設計最合適的家居生活

自小喜歡畫畫，愛好美麗事物的Edward，誤打誤撞之下走入室內設計裝修行業已有十八年之久，於大則樓工作開始，工商裝修經驗豐富，再到自己創立公司，加入家居裝修行列，Edward毫無間斷地為客人服務。

由室內設計師起行的Edward最深的感受是裝修設計從來不只有自己，並不是完全設計自己喜歡的事物，更重要的是為客人「設計生活」。

「細個嘅時候，唔係好清楚原來呢一行除咗設計之外，仲有一個工程呢一範。以前純粹以為設計就真係設計，設計一啲自己覺得靚嘅嘢。而家我會同返一啲新人講：『你可以設計一啲你自己鍾意嘅嘢，但都要實際。』。」

室內設計是設計生活 放下身段權衡美感與現實

「我成日講一個例子：你冇理由設計一張三角型嘅櫈，確實係好有創意，但個問題係用唔到啊嘛！如果你咁做出嚟只係純粹個人展，表現自己藝術造詣，但我哋做工程就唔係，尤其係做室內設計，係『設計生活』。」室內設計要貼近生活需要，也有眾多實際考慮，Edward經練多年，自然懂得取得平衡放下身段，專心一致為客人設計家居。

「比人reject無數次，慢慢就會發現原來真係唔可以太過主觀去做呢一行，始終要顧及返客人需要，要記得設計師設計嘅生活唔係我哋生活，我哋設計緊人哋嘅生活，唔多唔少要學識放低自己，係一個領悟嘅過程嚟。」

「仲有好多實際嘅考慮，我好想盡量幫個客人喺有限嘅budget同時間入面，思考點樣做到最好。你可能要花好長時間去研究，有乜嘢物料有同一個效果。」

即時覆客準時交貨 把工程細節掛在心上

除了設計上花上心思，Edward也著重客人與他們之間的信任。只要客人給予信任，Edward也致力回饋美好家居予客人，因為這是「承諾」，也是Edward公司營運十年十分著重的事，當中他亦以「準時交貨」而備受眾多客人的加許。

「因為做咗好多年工商工程，工商工程大原則就係快同準時，遲多一日客人就賺少日錢。所以我工程交貨從來都準時，呢個優勢我非常自豪，融入落住家裝修入面。」

而讓客人於開初漸漸建立信任的方法，Edward認為就是同理心和細心。

「可能個性使然，我成日會講同諗要對客人要有同理心，如果間屋係自己嘅，你都緊張啦，你都會想做到最好啦。只要咁掉返轉去諗呢，你好多嘢都會盡力去做。」

「有時細微到可能客人揀個廁紙架都會問我要出唔出去一齊睇，睇個設計合唔合適。你要諗下因為佢真係住喺度，甚至細到一個門鉸都確實要諗。倒返轉係你間屋，你都會緊張啦，冇理由乜都唔理。呢啲係基本，如果你個思路諗到呢啲就會好自然識同個師傅講要做得仔細同小心。

「同埋，當客人仔細到廁紙架都問我意見，其實代表佢對我有信任，相信我眼光，佢咁信任我，我點可以唔努力呢？」

Edward明白客人緊張自己家居，所以有問必答即時回覆也是Edward深得客人欣賞的地方。「啲客一問我，我就即刻覆，客人都話『乜你覆得咁快嘅』，其實問得都係因為想知答案，答咗個客就會安心啲，都會覺得你跟得緊，覺得被重視。」

「除咗影相拍片定期報告，我習慣主動邀請客人上嚟睇個單位，不論有冇問題。有問題就唔好做住先，叫佢上嚟一齊睇一齊傾點樣去做，慢慢客人就會對你有信任，客人會明白原來有問題我哋都會幫你解決嘅，絕對唔會遮遮掩掩。」對工程的上心程度、工程透明度令客人對Edward非常信任。

Edward於室內設計及裝修行業打滾十八年，心態轉變領略客人各方所需，由工商工程到住家裝修也能包辦，細緻度與以客為本的心態受到客人所歡迎，接下來Edward與他的團隊繼續堅守承諾，為客人帶來完善工程。

想裝修屋企/維修家居？登記「裝修佬」免費裝修報價，24小時內專人回覆，為你推介最適合你的裝修公司。